Псалцір 48 Псальм 48

¹ Кіроўцу хору. Сынам Карэя. Псалом.

² Слухайце ўсе народы,
Зразумейце ўсе насельнікі сусвету.

³ Земнародныя і сыны чалавечыя,
Бедныя і багатыя.

⁴ Вусны мае выкажуць прамудрасць,
І розум ў разважанні сэрца майго.

⁵ Да прыповесці прыхілю вуха мае,
Загадкі мае ў струнах псалціры адчыню.

⁶ Чаго мне баяцца ў дзень судны,
Калі бяззаконне шляхоў маіх абыдзе мяне?

⁷ Хто спадзяецца на сілу сваю
І хваліца багаццем сваім вялікім.

⁸ І брат нават не вымаліць яго,
Не дасць ён Богу выкуп за душу ягоную.

⁹ Кошту няма за ратаванне душы сваёй,
І не будзе такога ўвек,

¹⁰ Каб жыць без канца
І не ўбачыць магілы.

¹¹ Вось бачыш, і мудрыя паміраюць разам з невукамі,
Загінаюць і пакідаюць чужым багацце свае.

¹² І гроб — жыллё іх навекі і жытло вечнае ад роду да роду,
І клічуць зямлю імёнамі іх.

¹³ Не разумеюць людзі гонара свайго,
Прыпадабняюцца скату неразумнаму, і робяцца як скот.

¹⁴ На шляху сваім блазнавалі,
І ідучыя за імі таксама шлях гэты дабраславяць.

¹⁵ Яны як авечкі ў пекле і смерць пасвіць іх, і правядныя хутка запануюць над імі,
І не дапаможа ім ніхто ў пекле, і славы сваёй не ўбачаць болей.

¹⁶ Але збавіць Бог ад пекла мяне,
Калі прыме да Сябе.

¹⁷ Не зайздросць, калі разбагацее хто,
Ці калі памножыцца слава дому яго.

¹⁸ Бо калі памрэ, то не возьме нічога,
І слава ягоная не пойдзе за ім.

¹⁹ Дабраславіўся ён у жыці сваім,
І славіў цябе, калі патураў яму.

²⁰ Але пойдзе да роду бацькоў сваіх,
Што ніколі не ўбачаць святла.

²¹ І чалавек, што ў пашане жыве, і не разумее гэта,
Неразумнай жывёле падобны.