2 Карыньцянам 6 2 Карыньцянам 6 разьдзел

¹ І працуючы разам [з Ім], мы просім, каб ласка Божая не надарма была атрыманая вамі.

² Бо Ён кажа: «У час прыемны Я выслухаў цябе і ў дзень збаўленьня дапамог табе». Вось, цяпер час адпаведны, вось, цяпер дзень збаўленьня!

³ Мы нікому ні ў чым не даем спатыкненьня, каб ня ганілася служэньне,

⁴ але ў-ва ўсім адрэкамэндоўваем вам сябе, як служыцеляў Божых, у вялікай цярплівасьці, у прыгнётах, у патрэбах, у ўцісках,

⁵ у зьбіцьці, у вязьніцах, у забурэньнях, у працах, у чуваньнях, у пастах,

⁶ у чысьціні, у веданьні, у доўгацярплівасьці, у ласкавасьці, у Духу Сьвятым, у любові некрывадушнай,

⁷ у слове праўды, у моцы Божай, са зброяй праведнасьці ў правай і ў левай руцэ,

⁸ у славе і ганьбе, у ганьбаваньні і пахвале; нібы падманшчыкі, але праўдзівыя,

⁹ як невядомыя, але пазнаваныя; як тыя, што паміраюць, але, вось, мы жывыя; як караныя, але не забіваныя;

¹⁰ як засмучаныя, але заўсёды радасныя; як убогія, але многіх узбагачаем; як нічога ня маем, але ўсім валодаем.

¹¹ Вусны нашыя расчыніліся да вас, Карыньцяне, сэрца нашае пашырылася.

¹² Вам ня цесна ў нас, але ў сэрцах вашых цесна.

¹³ Дзеля гэткае ж платы кажу [вам], як дзецям, пашырцеся і вы.

¹⁴ Ня будзьце пад чужым ярмом з бязьвернымі, бо якое таварыства праведнасьці і беззаконьня? Якая супольнасьць у сьвятла з цемраю?

¹⁵ А якая згода ў Хрыста з Бэліярам? Ці якая частка ў вернага з бязьверным?

¹⁶ Ці якая лучнасьць у бажніцы Божай з ідаламі? Бо вы — бажніца Бога Жывога, як сказаў Бог: «Буду жыць у іх і буду хадзіць з імі; і буду іхнім Богам, і яны будуць Маім народам».

¹⁷ Дзеля гэтага: «Выйдзіце спасярод іх і аддзяліцеся, — кажа Госпад, — і не дакранайцеся да нячыстага, і Я прыйму вас».

¹⁸ «І Я буду вам Айцом, і вы будзеце Мне сынамі і дочкамі, — кажа Госпад Усеўладны».