Да Эфесянаў 5 Да Эфесянаў 5 разьдзел

¹ Дык будзьце пераймальнікамі Бога, як улюбёныя дзеці,

² і жывіце ў любові, як і Хрыстос палюбіў нас і аддаў Сябе за нас як прынашэнне і ахвяру Богу ў духмяны пах.

³ А распуста і ўсялякая нячысціня ці сквапнасць няхай і не ўспамінаюцца між вас, як належыць святым,

⁴ і непрыстойныя паводзіны, і дурная гаворка, але лепей — падзяка.

⁵ Бо вы гэта ведайце, што ніякі распуснік, ці нячысты, ці хцівец, які ёсць ідаласлужка, — не мае спадчыны ў царстве Хрыста і Бога.

⁶ Няхай ніхто вас не зводзіць у зман пустымі словамі, бо з-за гэтага прыходзіць гнеў Божы на сыноў непакорлівасці.

⁷ Дык не рабіцеся іх супольнікамі;

⁸ бо некалі вы былі цемраю, а цяпер — святло ў Госпадзе; як дзеці Святла — жывіце,

⁹ бо плод Святла2 ва ўсялякай дабрыні, праведнасці і праўдзе, —

¹⁰ правяраючы, што да спадобы Госпаду [Богу],

¹¹ і не ўдзельнічайце ў бясплодных справах цемры. А лепей нават выкрывайце іх.

¹² Бо пра тое, што робіцца імі патаемна, сорамна і казаць,

¹³ але ўсё, што выкрываецца, выяўляецца святлом,

¹⁴ бо ўсё, што робіцца яўным, ёсць святло. Таму Ён кажа: «Уставай, хто спіць, і ўваскрэсні з мёртвых, і асвеціць цябе Хрыстос».

¹⁵ Дык глядзіце ўважліва, як вы жывяце, — не як нямудрыя, а як мудрыя,

¹⁶ выкарыстоўваючы кожную хвіліну3,

¹⁷ Таму не будзьце неразумнымі, але пазнавайце, што ёсць воля Гасподняя4.

¹⁸ І не напівайцеся віном, у якім распуста, а напаўняйцеся Духам,

¹⁹ размаўляючы між сабою псалмамі, гімнамі і духоўнымі песнямі, сэрцам сваім спяваючы і іграючы псалмы Госпаду,

²⁰ дзякуючы заўсёды за ўсё Богу і Бацьку ў імя нашага Госпада Ісуса Хрыста,

²¹ падпарадкуючыся адзін аднаму ў страху перад Хрыстом5:

²² жонкі — сваім мужам, як Госпаду,

²³ бо муж ёсць галава жонкі, як і Хрыстос — галава Царквы, Ён Збаўца цела.

²⁴ Але, як Царква падпарадкоўваецца Хрысту, так і жонкі няхай падпарадкоўваюцца мужам ва ўсім.

²⁵ Мужы, любіце [сваіх] жонак, як і Хрыстос палюбіў Царкву і аддаў Сябе за яе,

²⁶ каб асвяціць яе, ачысціўшы праз абмыванне вадою ў слове,

²⁷ каб Яму паставіць перад Сабою Царкву слаўнай, якая не мае ні плямы, ні зморшчыны, ні чаго-небудзь падобнага, а каб яна была святая і беззаганная.

²⁸ Так і мужы павінны любіць сваіх жонак, як свае целы. Той, хто любіць сваю жонку, любіць самога сябе.

²⁹ Бо ніхто ніколі не меў нянавісці да свайго цела, а кожны корміць і грэе яго, як і Хрыстос Царкву,

³⁰ таму што мы члены Яго цела, [ад Яго цела і ад Яго касцей].

³¹ Таму чалавек пакіне [свайго] бацьку і маці і прылепіцца да сваёй жонкі, і будуць двое адным целам.

³² Таямніца гэта вялікая, але я кажу пра Хрыста і пра Царкву.

³³ Аднак і вы — кожны з вас няхай любіць так сваю жонку, як самога сябе, а жонка няхай баіцца мужа.