Лукаша 3 разьдзел

 

 

А ў пятнаццаты год панаваньня цэзара Тыбэрыя, калі Понтый Пілат панаваў у Юдэі, Ірад быў тэтрархам у Галілеі, Філіп, брат ягоны, — тэтрархам у Ітурэі і раханіцкай краіне, а Лісані — тэтрархам у Абіліне,

 

У пятнаццаты год панавання цэзара Тыберыя, калі Понцій Пілат быў намеснікам Юдэі, а Ірад быў тэтрархам Галілеі, Філіп, брат ягоны, тэтрархам Ітурэі і Траханіцкай зямлі, а Лізанія тэтрархам Абілены,

пры першасьвятарах Аньне і Каяфе было слова Божае да Яна, сына Захарыі, у пустыні.

 

пры першасвятарах Анне і Каяфе, было скіравана слова Божае да Яна, сына Захарыі, у пустыні.

І ён праходзіў па ўсіх ваколіцах Ярданскіх, прапаведуючы хрышчэньне навяртаньня дзеля адпушчэньня грахоў,

 

Ён прайшоў усе ваколіцы Ярдана, абвяшчаючы хрост пакаяння дзеля адпушчэння грахоў,

як напісана ў кнізе словаў прарока Ісаі, які кажа: «Голас таго, хто кліча ў пустыні: “Падрыхтуйце шлях Госпаду, простымі рабіце сьцежкі Яго;

 

як напісана ў кнізе слоў прарока Ісаі: «Голас таго, хто кліча ў пустыні:“Падрыхтуйце дарогу Пану,простымі рабіце сцежкі Яму!

усякі дол няхай напоўніцца, і ўсякая гара і ўзгорак няхай панізяцца, крывізны няхай выпрастуюцца, і няроўныя шляхі зробяцца гладкімі;

 

Кожная даліна ўзвысіцца,кожная гара і пагорак панізяцца,і выбоістыя дарогі стануць раўнінай,а ланцугі гор — далінаю.

і ўгледзіць усякае цела збаўленьне Божае”».

 

І ўбачыць кожнае целаБожае збаўленне”».

І казаў ён натоўпам, якія прыходзілі хрысьціцца ў яго: «Спараджэньні яхідны, хто перасьцярог вас, каб уцякалі ад гневу, які надыходзіць?

 

Ён казаў натоўпам, якія прыходзілі да яго хрысціцца: «Племя змяінае, хто навучыў вас уцякаць ад будучага гневу?

Зрабіце плады, годныя навяртаньня, і не пачынайце гаварыць у сабе: “Бацьку маем Абрагама”, бо кажу вам, што Бог можа з камянёў гэтых падняць дзяцей Абрагаму.

 

Прынясіце ж годны плён пакаяння і не думайце казаць сабе: “Маем Абрагама за бацьку”; бо кажу вам, што Бог можа з камянёў гэтых абудзіць дзяцей Абрагаму.

Ужо і сякера ля кораня дрэваў ляжыць; усякае дрэва, якое не прыносіць добрага плоду, сьсякаецца і кідаецца ў агонь».

 

Ужо і сякера прыкладзена да карэння дрэў. Таму кожнае дрэва, якое не дае добрага плоду, будзе ссечана і кінута ў агонь».

І спытаўся ў яго натоўп, кажучы: «Дык што нам рабіць?»

 

І пыталіся ў яго людзі, кажучы: «Што мы павінны рабіць?»

А ён, адказваючы, кажа ім: «Хто мае дзьве вопраткі, няхай дасьць таму, хто ня мае; і хто мае ежу, няхай робіць тое самае».

 

Ён казаў ім у адказ: «Хто мае дзве вопраткі, няхай аддасць таму, хто не мае, і хто мае ежу, няхай зробіць тое самае».

Прыйшлі і мытнікі хрысьціцца, і сказалі яму: «Настаўнік, што нам рабіць?»

 

Прыйшлі і мытнікі хрысціцца і сказалі яму: «Настаўнік, што мы павінны рабіць?»

А ён сказаў ім: «Нічога не бярыце больш таго, што вам загадана».

 

Ён адказаў ім: «Нічога больш за вызначанае вам не спаганяйце».

Пыталіся ў яго таксама жаўнеры, кажучы: «А нам што рабіць?» І ён сказаў ім: «Нікога ня крыўдзьце, не абвінавачвайце фальшыва і задавальняйцеся платай сваёй».

 

Пыталіся ў яго таксама і жаўнеры, кажучы: «А мы што павінны рабіць?» Ён адказаў ім: «Нікога не крыўдзіце, не абвінавачвайце несправядліва і задавольвайцеся сваёй платай».

І народу, які чакаў і разважаў у сэрцах сваіх адносна Яна, ці не Хрыстос ён,

 

Калі народ чакаў і калі ўсе разважалі ў сэрцах сваіх пра Яна, ці не Месія ён,

адказаў Ян усім, кажучы: «Я хрышчу вас вадою, але ідзе Дужэйшы за мяне, у Якога я ня варты разьвязаць рамень сандалаў Ягоных. Ён будзе хрысьціць вас Духам Сьвятым і агнём.

 

Ян адказаў усім: «Я вадою хрышчу вас, але ідзе мацнейшы за мяне, якому я няварты развязаць раменьчык на Яго сандалях. Ён вас будзе хрысціць Духам Святым і агнём.

Веялка Ягоная ў руцэ Яго, і Ён ачысьціць ток Свой, і зьбярэ пшаніцу ў сьвіран Свой, а салому спаліць агнём незгасальным».

 

Лапату трымае ў руцэ сваёй, каб ачысціць гумно сваё і сабраць пшаніцу ў засекі свае, а мякіну спаліць агнём непагасным».

І шмат іншага дабравесьціў ён народу, навучаючы яго.

 

Шмат чаго іншага прапаведаваў ён, абвяшчаючы Добрую Навіну народу.

А Ірад тэтрарх, дакараны ім за Ірадыяду, жонку Філіпа, брата ягонага, і за ўсё, што Ірад зрабіў злога,

 

А тэтрарх Ірад, якога Ян дакараў за Ірадыяду, жонку яго брата Філіпа, і за ўсё зло, якое ўчыніў Ірад,

дадаў да ўсяго і тое, што замкнуў Яна ў вязьніцу.

 

да ўсяго дадаў яшчэ і тое, што замкнуў Яна ў вязніцы.

І сталася, калі хрысьціўся ўвесь народ, і Ісус, ахрысьціўшыся, маліўся, адчынілася неба,

 

Калі хрысціўся ўвесь народ і калі Езус, прыняўшы хрост, маліўся, раскрылася неба,

і Дух Сьвяты зыйшоў на Яго ў цялесным выглядзе, як голуб, і быў голас з неба, які казаў: «Ты — Сын Мой Улюбёны; у Табе Я маю ўпадабаньне».

 

і Дух Святы ў цялесным выглядзе, як голуб, сышоў на Яго, і быў голас з неба: «Ты Сын Мой умілаваны, Цябе ўпадабаў Я».

І меў Ісус, пачынаючы [служэньне], гадоў каля трыццаці, і быў, як думалі, сын Язэпаў, Гэліяў,

 

Езус, пачынаючы служэнне сваё, меў каля трыццаці гадоў і быў, як лічылі, сынам Юзафа, сына Элія,

Мататаў, Левіяў, Мэльхіяў, Янаяў, Язэпаў,

 

Матата, Левія, Мэльхія, Яная, Юзафа,

Мататыяў, Амосаў, Навумаў, Эсьліяў, Нагеяў,

 

Матація, Амоса, Навума, Эслія, Нагея,

Магатаў, Мататыяў, Сэмэяў, Язэпаў, Юдаў,

 

Маата, Матація, Сэмэя, Ёсэха, Ёды,

Яанаяў, Рэсаеў, Зэрубабэляў, Салятыэляў, Нэрыяў,

 

Янана, Рэсы, Зарабабэля, Салятыэля, Нэрыя,

Мэльхіяў, Аддыяў, Касамаў, Эльмадамаў, Іраў,

 

Мэльхія, Адзія, Касама, Эльмадама, Эра,

Ёсіяў, Эліезэраў, Ярымаў, Мататаў, Левіяў,

 

Езуса, Эліязэра, Ярыма, Матата, Левія,

Сымонаў, Юдаў, Язэпаў, Янанаў, Эліякімаў,

 

Сімяона, Юды, Юзафа, Ёнама, Эліяхіма,

Мэлеаяў, Маінанаў, Мататаў, Натанаў, Давідаў,

 

Мэлея, Мэны, Матата, Натана, Давіда,

Есэяў, Абэдаў, Боазаў, Сальмонаў, Наасонаў,

 

Есэя, Абэда, Бааза, Сальмона, Наасона,

Амінадабаў, Арамаў, Эсромаў, Пэрэсаў, Юдаў,

 

Амінадаба, Адміна, Арні, Эзрома, Фарэса, Юды,

Якубаў, Ісаакаў, Абрагамаў, Тэрахаў, Нахораў,

 

Якуба, Ісаака, Абрагама, Тарэя, Нахора,

Сэрухаў, Рагаваў, Фалекаў, Гэбэраў, Салаў,

 

Сэруха, Рахаба, Фалека, Эбэра, Салія,

Каінанаў, Арфаксадаў, Сэмаў, Нояў, Лямэхаў,

 

Каінама, Арфаксада, Сэма, Ноя, Ламеха,

Мэтушаляхаў, Энохаў, Ярэдаў, Магалялеэляў, Кейнанаў,

 

Матусала, Эноха, Ярэда, Малелеэля, Каінама,

Эносаў, Сэтаў, Адамаў, Божы.

 

Эноса, Сэта, Адама, сына Бога.