Выхад 25 разьдзел

 

 

І прамовіў ГОСПАД да Майсея, кажучы:

 

І наказаў Гасподзь Майсею сказаць:

«Прамоў да сыноў Ізраіля, і няхай яны зьбяруць для Мяне дары. Ад кожнага чалавека, у якога сэрца ягонае дабраахвотна [пажадае] даць, бярыце дар Мой.

 

скажы сынам Ізраілевым, каб яны зрабілі Мне прынашэньне ад кожнага чалавека, у якога будзе руплівасьць, прымайце прынашэньне Мне.

І вось дары, якія вы будзеце зьбіраць ад іх: золата, срэбра і медзь,

 

Вось прынашэньні, якія вы павінны прымаць ад іх: золата, і срэбра і медзь,

і блакіт, і пурпур, і барвовы кармазын, і вісон, і казіную [поўсьць],

 

і воўну блакітную, пурпуровую і чырванёную, і вісон, і казіную поўсьць,

і скуры бараноў, фарбаваныя на чырвона, і скуры тахаш, і дрэва акацыі,

 

і скуры барановыя чырвоныя, і скуры сінія, і дрэвы сітым,

алей для асьвятленьня, пахошчы для алею памазаньня і для пахкага каджэньня,

 

алей у сьвяцільні, пахошчы ў алей памазаньня і дзеля пахучага каджэньня.

камяні оніксу і камяні для аздабленьня эфоду і нагрудніку.

 

камень анікс і камяні на аздобу эфода і на нагруднік.

І няхай зробяць для Мяне сьвятыню, і Я буду жыць сярод іх.

 

І ўладзяць яны Мне сьвятыню, і буду жыць сярод іх;

Усё, як Я пакажу табе, паводле ўзору сялібы і паводле ўзору ўсяго начыньня яе, так і зрабіце.

 

усё зрабеце, як Я паказваю табе, і ўзор скініі і ўзор усяго посуду яе; так і зрабеце.

І няхай зробяць каўчэг з дрэва акацыі; два з паловаю локці даўжыня яго, і паўтары локці шырыня яго, і паўтары локці вышыня яго.

 

Зрабеце каўчэг з дрэва сітым; даўжыня яго два локці з палавінаю, і шырыня яго паўтара локця, і вышыня яго паўтара локця;

І пакрыеш яго шчырым золатам; знутры і звонку пакрыеш яго; і зробіш наверсе наўкола вянок залаты.

 

і абкладзі яго чыстым золатам, зь сярэдзіны і звонку пакрый яго; і зрабі зьверху вакол яго залаты вянок;

І выльеш да яго чатыры колцы залатыя, і прыладзіш [іх] на чатырох кутах яго, два колцы на адным баку яго, і два колцы на другім баку яго.

 

і вылі для яго чатыры колцы залатыя і ўмацуй на чатырох ніжніх вуглах яго: два колцы з аднаго боку яго, два з другога боку яго.

І зробіш насілы з дрэва акацыі, і пакрыеш іх золатам.

 

Зрабі з дрэва сітым жэрдкі і абкладзі іх золатам;

І ўложыш насілы ў колцы па баках каўчэгу, каб на іх насіць каўчэг.

 

і ўкладзі жэрдкі ў колцы, з бакоў каўчэга, каб з дапамогаю іх несьці каўчэг;

У колцах каўчэгу маюць быць насілы, ня будуць іх вымаць адтуль.

 

у колцах каўчэга павінны быць жэрдкі і не павінны адымацца ад яго.

І ўложыш у каўчэг Сьведчаньне, якое Я дам табе.

 

І пакладзі ў каўчэг адкрыцьцё, якое Я дам табе.

І зробіш накрыўку са шчырага золата, два локці з паловаю даўжыня яе, і паўтары локці шырыня яе.

 

Зрабі таксама вечка з чыстага золата: даўжыня яго два локці з палавінаю, а шырыня яго паўтара локця;

І зробіш двух херувімаў з золата, каванымі зробіш іх з абодвух бакоў накрыўкі.

 

і зрабі з золата двух херувімаў: чаканнага вырабу зрабі іх на абодвух канцах вечка;

І зробіш аднаго херувіма на тым баку, і аднаго херувіма на гэтым баку; разам з накрыўкай зробіце херувімаў на абодвух баках яе.

 

зрабі аднаго херувіма з аднаго краю, а другога херувіма з другога краю; пукатымі зь вечка зрабеце херувімаў на абодвух краях яго;

І будуць херувімы, распусьціўшы крылы ўгару, захінаць крыламі сваімі накрыўку, а абліччамі сваімі [будуць зьвернуты] адзін да аднаго; да накрыўкі будуць [зьвернутыя] абліччы херувімаў.

 

і будуць херувімы з паднятымі ўгору крыламі, пакрываючы сваімі крыламі вечка, а тварамі сваімі будуць адзін да аднаго; да вечка будуць твары херувімаў.

І паложыш накрыўку на каўчэг зьверху, і ў каўчэг паложыш Сьведчаньне, якое Я дам табе.

 

І пакладзі вечка на каўчэг згары, а ў каўчэг пакладзі адкрыцьцё, якое Я дам табе:

І Я буду сустракацца з табою там, і гаварыць з табою з-над накрыўкі, паміж двух херувімаў, якія над Каўчэгам Сьведчаньня, пра ўсё, што буду загадваць табе для сыноў Ізраіля.

 

там Я буду адкрывацца табе і гутарыць з табою над вечкам, сярод двух херувімаў, якія над каўчэгам адкрыцьця, пра ўсё, што толькі буду наказваць празь цябе сынам Ізраілевым.

І зробіш стол з дрэва акацыі, два локці даўжыня яго, локаць шырыня яго, і паўтары локці вышыня яго.

 

І зрабі стол з дрэва сітым, даўжынёю ў два локці, шырынёю ў локаць, а вышынёю ў паўтара локця,

І пакрыеш яго шчырым золатам, і зробіш яму вянок залаты наўкола.

 

і абкладзі яго золатам чыстым, і зрабі вакол яго залаты вянок;

І зробіш яму наўкола ліштву [шырынёю] ў далонь, і зробіш наўкола вянок залаты да ліштвы ягонай.

 

і зрабі вакол яго сьценкі ў далоню і каля сьценак яго зрабі залаты вянок вакол;

І зробіш для яго чатыры колцы залатыя, і прыладзіш колцы да чатырох рагоў, якія пры чатырох ножках ягоных.

 

і зрабі для яго чатыры колцы залатыя і ўмацуй колцы на чатырох вуглах каля чатырох ножак яго;

Пры ліштвах маюць быць колцы, каб укладаць насілы і насіць стол.

 

пры сьценках павінны быць колцы, каб укладваць жэрдкі, каб насіць на іх стол;

І зробіш насілы з дрэва акацыі, і пакрыеш іх золатам, і будуць насіць на іх стол.

 

а жэрдкі зрабі з дрэва сітым і абкладзі іх золатам, і будуць насіць на іх гэты стол;

І зробіш да яго місы, і чашы, і збаны, і кубкі для складаньня ахвяраў вадкіх; са шчырага золата зробіш іх.

 

зрабі таксама для яго місы, кадзільніцы, чары і кубкі, каб паліваць зь іх: з золата чыстага зрабі іх;

І будзеш класьці на стол хлябы пакладныя перад абліччам Маім заўсёды.

 

і кладзі на стол хлябы ахвярныя прад абліччам Маім увесь час.

І зробіш сьвечнік з золата шчырага, каваным будзе зроблены сьвечнік; падстава яго, і сьцябло яго, чарачкі яго, яблыкі яго і кветкі яго маюць [выходзіць] з яго.

 

І зрабі сьвяцільню з золата чыстага; чаканная павінна быць гэтая сьвяцільня; сьцябло яе, галіны яе, чарачкі яе, яблыкі яе і кветкі яе павінны выходзіць зь яе;

І шэсьць сьцяблінаў маюць выходзіць з бакоў яго: тры сьцябліны сьвечніка з аднаго боку яго, і тры сьцябліны сьвечніка з другога боку яго.

 

шэсьць галін павінны выходзіць з бакоў яе: тры галіны сьвяцільні з аднаго боку яе і тры галіны зь сьвяцільні з другога боку яе;

Тры чарачкі, [падобныя] да мігдалу, з яблыкам і кветкаю, на адной сьцябліне, і тры чарачкі, [падобныя] да мігдалу, на другой сьцябліне, з яблыкам і кветкаю. Гэтак на шасьці сьцяблінах, што выходзяць са сьвечніка.

 

тры чарачкі накшталт міндальнай кветкі, зь яблыкам і кветкамі, павінны быць на адной галіне, і тры чарачкі накшталт міндальнай кветкі, на другой галінцы, зь яблыкамі і кветкамі: так на ўсіх шасьці галінах, якія выходзяць са сьвяцільні;

А на [камлі] сьвечніка маюць быць чатыры чарачкі, падобныя да мігдалу, з яблыкам і кветкаю.

 

а на сьцяблах сьвяцільні павінны быць чатыры чарачкі накшталт міндальнай кветкі зь яблыкамі і кветкамі;

І яблык пад двума сьцяблінамі, [што выходзяць] з яго, і яблык пад двума сьцяблінамі, [што выходзяць] з яго, і яблык пад двума сьцяблінамі, [што выходзяць] з яго, на ўсіх шасьці сьцяблінах, што выходзяць са сьвечніка.

 

у шасьці галін, што выходзяць са сьцябла сьвяцільні, яблык пад дзьвюма галінамі яе, і яблык пад другімі дзьвюма галінамі, і яблык пад трэцімі дзьвюма галінамі яе;

Яблыкі іхнія і сьцябліны іхнія будуць [выходзіць] з яго; ён увесь суцэльна [мае быць] каваны са шчырага золата.

 

яблыкі і галіны іх зь яе павінны выходзіць: уся павінна быць чаканная, цэльная, з чыстага золата.

І зробіш сем лямпаў для яго, і будуць прыладжаны лямпы ягоныя, і будуць сьвяціць на пярэдні бок яго.

 

і зрабі да яе сем лампад, і пастаў на яе лампады яе, каб сьвяцілі на відавы бок яе;

І абцужкі да яго, і папяльнічкі да яго [зробіш] са шчырага золата.

 

і абцугі да яе і латкі да яе з чыстага золата;

З таленту золата шчырага няхай зробяць яго з усімі гэтымі прыладамі.

 

з таланту золата чыстага хай зробяць яе з усімі гэтымі прычындаламі.

І глядзі, і зрабі паводле ўзору іхняга, які Я паказаў табе на гары.

 

Глядзі, зрабі іх паводле таго ўзору, які паказаны табе на гары.