Выхад 25 разьдзел

 

 

І прамовіў ГОСПАД да Майсея, кажучы:

 

І гукаў СПАДАР Масею, кажучы:

«Прамоў да сыноў Ізраіля, і няхай яны зьбяруць для Мяне дары. Ад кожнага чалавека, у якога сэрца ягонае дабраахвотна [пажадае] даць, бярыце дар Мой.

 

«Гукай сыном Ізраелявым, і возьмуць Імне дары; ад кажнага чалавека, каторы ад сэрца самахоць даў бы, бярыце дар Мой.

І вось дары, якія вы будзеце зьбіраць ад іх: золата, срэбра і медзь,

 

І во дар, каторы вы маеце ўзяць ад іх: золата а срэбла а медзь,

і блакіт, і пурпур, і барвовы кармазын, і вісон, і казіную [поўсьць],

 

І васільковую, пурпуровую, і чырвовую, і цянюсенькае палатно, і ад козаў поўсьць,

і скуры бараноў, фарбаваныя на чырвона, і скуры тахаш, і дрэва акацыі,

 

І скуры баранія, пахварбаваныя на чырвана, і скуры барсуковыя, і дзерва акацу,

алей для асьвятленьня, пахошчы для алею памазаньня і для пахкага каджэньня,

 

Аліву да сьвяценьня, пахі да алею памазаньня і пахнючага да кадзеньня,

камяні оніксу і камяні для аздабленьня эфоду і нагрудніку.

 

Камяні оніксы і каменчыкі ўстаўныя ў наплечнік а нагруднік.

І няхай зробяць для Мяне сьвятыню, і Я буду жыць сярод іх.

 

І зробяць Імне сьвятыню, і буду вітаць сярод іх.

Усё, як Я пакажу табе, паводле ўзору сялібы і паводле ўзору ўсяго начыньня яе, так і зрабіце.

 

Усе, як Я паказую табе, і зразу вітальні, і зразу ўсіх судзінаў яе, і так зрабіце.

І няхай зробяць каўчэг з дрэва акацыі; два з паловаю локці даўжыня яго, і паўтары локці шырыня яго, і паўтары локці вышыня яго.

 

І зрабіце скрыню зь дзерва акацы; два з палавіцаю локці ўдаўжкі ёй, і паўтара локця ўшыркі ёй, паўтара локця ўвышкі ёй.

І пакрыеш яго шчырым золатам; знутры і звонку пакрыеш яго; і зробіш наверсе наўкола вянок залаты.

 

І пацягні яе шчырым золатам; знутра й знадворку пацягні яе; і зрабіце наверсе наўкола залаты вянок.

І выльеш да яго чатыры колцы залатыя, і прыладзіш [іх] на чатырох кутах яго, два колцы на адным баку яго, і два колцы на другім баку яго.

 

І вылі да яе чатыры колцы залатыя, і прыладзь на чатырох ножках яе: і два колцы на адным баку яе, і два колцы на другім баку яе.

І зробіш насілы з дрэва акацыі, і пакрыеш іх золатам.

 

І зрабі нашулкі зь дзерва акацы, і пацягні іх золатам.

І ўложыш насілы ў колцы па баках каўчэгу, каб на іх насіць каўчэг.

 

І ўвядзі нашуліны ў колцы па бакох скрыні, каб імі насіць скрыню.

У колцах каўчэгу маюць быць насілы, ня будуць іх вымаць адтуль.

 

У колцах скрыні маюць быць нашулкі, ня маюць іх адыймаць ад яе.

І ўложыш у каўчэг Сьведчаньне, якое Я дам табе.

 

І ўкладзі ў скрыню сьветчаньне, каторае Я дам табе.

І зробіш накрыўку са шчырага золата, два локці з паловаю даўжыня яе, і паўтары локці шырыня яе.

 

І зрабі века із шчырага золата, два локці з палавіцаю ўдаўжкі, а паўтара локця ўшыркі.

І зробіш двух херувімаў з золата, каванымі зробіш іх з абодвух бакоў накрыўкі.

 

І зрабі двух херуваў із золата, з каванага зрабі іх з двух канцоў века.

І зробіш аднаго херувіма на тым баку, і аднаго херувіма на гэтым баку; разам з накрыўкай зробіце херувімаў на абодвух баках яе.

 

І зрабі аднаго херува на гэтым канцу, і аднаго херува на гэным канцу; зь века зрабіце херувы на абодвых канцох яго.

І будуць херувімы, распусьціўшы крылы ўгару, захінаць крыламі сваімі накрыўку, а абліччамі сваімі [будуць зьвернуты] адзін да аднаго; да накрыўкі будуць [зьвернутыя] абліччы херувімаў.

 

І будуць херувы распусьціўшы крылы ўгару, нахінаючыся над векам крыламі сваімі, а відамі адзін да аднаго; да века будуць віды херуваў.

І паложыш накрыўку на каўчэг зьверху, і ў каўчэг паложыш Сьведчаньне, якое Я дам табе.

 

І палажы века на скрыню зьверху, і ў скрыню палажы сьветчаньне, каторае Я дам табе.

І Я буду сустракацца з табою там, і гаварыць з табою з-над накрыўкі, паміж двух херувімаў, якія над Каўчэгам Сьведчаньня, пра ўсё, што буду загадваць табе для сыноў Ізраіля.

 

І Я буду сустракацца з табою там, і гукаць із табою над векам, памеж двух херуваў, каторыя над скрыняю сьветчаньня, праз усё, што буду расказаваць табою сыном Ізраелявым.

І зробіш стол з дрэва акацыі, два локці даўжыня яго, локаць шырыня яго, і паўтары локці вышыня яго.

 

І зрабі стол ізь дзерва акацы, два локці ўдаўжкі, локаць ушыркі, а паўтара локця ўвышкі

І пакрыеш яго шчырым золатам, і зробіш яму вянок залаты наўкола.

 

І пацягні яго золатам шчырым, і зрабі яму залаты вянок наўкола.

І зробіш яму наўкола ліштву [шырынёю] ў далонь, і зробіш наўкола вянок залаты да ліштвы ягонай.

 

І зрабі яму аблямаваньне на даланю наўкола, і зрабі залаты вянок да аблямаваньня ягонага наўкола.

І зробіш для яго чатыры колцы залатыя, і прыладзіш колцы да чатырох рагоў, якія пры чатырох ножках ягоных.

 

І зрабі да яго чатыры колцы залатыя, і прыладзь колцы да чатырох рагоў, каторыя ў чатырох ножках ягоных.

Пры ліштвах маюць быць колцы, каб укладаць насілы і насіць стол.

 

Насупроці аблямаваньня маюць быць колцы як месцы нашулкам насіць імі стол.

І зробіш насілы з дрэва акацыі, і пакрыеш іх золатам, і будуць насіць на іх стол.

 

І зрабі нашулкі зь дзерва акацы, і пацягні іх золатам, і будуць насіць гэты стол.

І зробіш да яго місы, і чашы, і збаны, і кубкі для складаньня ахвяраў вадкіх; са шчырага золата зробіш іх.

 

І зрабі да яго місы а ложкі а жбаны а коўні, каб узьліваць імі; із шчырага золата зрабі іх.

І будзеш класьці на стол хлябы пакладныя перад абліччам Маім заўсёды.

 

І лажы на стол хлябы Выкладу перад Імною штачасна.

І зробіш сьвечнік з золата шчырага, каваным будзе зроблены сьвечнік; падстава яго, і сьцябло яго, чарачкі яго, яблыкі яго і кветкі яго маюць [выходзіць] з яго.

 

І зрабі сьветач із золата шчырага, з каванага мае быць зроблены гэты сьветач; сьцябло яго, галузы, чарачкі яго, апучкі яго а кветкі яго маюць выходзіць ізь яго.

І шэсьць сьцяблінаў маюць выходзіць з бакоў яго: тры сьцябліны сьвечніка з аднаго боку яго, і тры сьцябліны сьвечніка з другога боку яго.

 

І шэсьць галузаў маюць выходзіць із бакоў яго: тры галузы сьветача з аднаго боку яго, і тры галузы сьветача з другога боку яго.

Тры чарачкі, [падобныя] да мігдалу, з яблыкам і кветкаю, на адной сьцябліне, і тры чарачкі, [падобныя] да мігдалу, на другой сьцябліне, з яблыкам і кветкаю. Гэтак на шасьці сьцяблінах, што выходзяць са сьвечніка.

 

Тры чарачкі, падобныя да міндальнае кветкі, з апучкаю аднэй а з кветкаю, і тры чарачкі на друтой галузе, з апучкаю аднэй а кветкаю. Гэтак на шасьцёх галузах, што выходзяць ізь сьветача.

А на [камлі] сьвечніка маюць быць чатыры чарачкі, падобныя да мігдалу, з яблыкам і кветкаю.

 

А на сьветачу маюць быць чатыры чарачкі, падобныя да міндальнае кветкі, з апучкамі іх а кветкамі іх.

І яблык пад двума сьцяблінамі, [што выходзяць] з яго, і яблык пад двума сьцяблінамі, [што выходзяць] з яго, і яблык пад двума сьцяблінамі, [што выходзяць] з яго, на ўсіх шасьці сьцяблінах, што выходзяць са сьвечніка.

 

І апучка пад дзьвюма галузкамі зь яго ж, і апучка пад дзьвюма галузкамі зь яго, апучка пад дзьвюма галузкамі зь яго, — на ўсіх шасьцёх галузках, што выходзяць ізь сьветача.

Яблыкі іхнія і сьцябліны іхнія будуць [выходзіць] з яго; ён увесь суцэльна [мае быць] каваны са шчырага золата.

 

Апучкі й галузы іх ізь яго маюць быць; ён увесь суцэльна каваны із шчырага золата.

І зробіш сем лямпаў для яго, і будуць прыладжаны лямпы ягоныя, і будуць сьвяціць на пярэдні бок яго.

 

І зрабі лянпаў сем яго, і ўстанаві яго лянпы, каб сьвяцілі на пярэднім баку яго.

І абцужкі да яго, і папяльнічкі да яго [зробіш] са шчырага золата.

 

І абцужкі да яго, і папялянкі да яго із шчырага золата.

З таленту золата шчырага няхай зробяць яго з усімі гэтымі прыладамі.

 

З цэнтнару золата шчырага няхай зробяць яго з усім гэтым судзьдзям.

І глядзі, і зрабі паводле ўзору іхняга, які Я паказаў табе на гары.

 

І глядзі, і зрабі подле зразы іх, якую паказаў табе на гары.