Выхад 40 разьдзел
Выхад
Пераклад Антонія Бокуна → Пераклад Яна Станкевіча
І прамовіў ГОСПАД да Майсея, кажучы:
І гукаў СПАДАР Масею, кажучы:
«У першы месяц, у першы дзень месяца паставіш Сялібу Намёту Спатканьня.
«У дзень першага месяца, першага дня месяца ўстанаві вітальню будану збору,
І паставіш там Каўчэг Сьведчаньня, і закрыеш Каўчэг заслонаю.
І пастанаві там скрыню сьветчаньня, і закрый скрыню запінахаю,
І ўнясеш стол, і разложыш на ім тое, што належыць, і ўнясеш сьвечнік, і запаліш лямпы ягоныя.
І ўнясі стол, і разлажы паложанае на ім, і ўнясі сьветач, і запалі лянпы яго;
І паставіш ахвярнік залаты для каджэньня перад Каўчэгам Сьведчаньня; і завесіш заслону на ўваходзе ў Сялібу.
І пастанаві залаты аброчнік да кадзеньня перад скрыняю сьветчаньня; і запні запону ля ўходу ў вітальню;
І паставіш ахвярнік цэласпаленьня перад уваходам у Сялібу Намёту Спатканьня.
І пастанаві аброчнік усепаленьня перад уходам у вітальню будану збору;
І паставіш мыцельнік паміж Намётам Спатканьня і ахвярнікам, і нальеш у яго вады.
І пастанаві мыцельнік памеж вітальні збору й аброчніка, і налі ў яго вады.
І паставіш панадворак наўкола, і завесіш заслону ў браме панадворку.
І расстанаві панадворак наўкола, і запні запону ў браме панадворку.
І возьмеш алей памазаньня, і памажаш Сялібу і ўсё, што ў ёй, і асьвяціш яе і ўсе прыналежнасьці ейныя, і будзе Сьвятой.
І вазьмі алею памазаньня, і памаж вітальню і ўсе, што ў ёй, і пасьвяці яе й усі рэчы яе, і будзе сьвятая.
І памажаш ахвярнік цэласпаленьня і ўсё начыньне ягонае, і асьвяціш ахвярнік, і будзе ахвярнік Сьвятым Сьвятых.
І памаж аброчнік усепаленьня й усе судзьдзе яго, і пасьвяці аброчнік, і будзе аброчнік сьвятое сьвятых.
І памажаш мыцельнік і падставу ягоную, і асьвяціш яго.
І памаж мыцельнік а падложак яго, і пасьвяці яго.
І наблізіш Аарона і сыноў ягоных да ўваходу ў Намёт Спатканьня, і абмыеш іх вадою.
І дабліж Аарона а сыноў ягоных да ўходу будану збору, і ўмый іх вадою.
І апранеш Аарона ў адзеньні сьвятыя, і памажаш яго, і асьвяціш яго, і ён будзе сьвятаром Маім.
І адзень Аарона ў сьвятыя адзецьці, і памаж яго й пасьвяці, і будзе Імне сьвятарстваваць.
І сыноў ягоных наблізіш, і апранеш іх у хітоны,
І сыноў ягоных дабліж, і адзень іх у хітоны,
і памажаш іх, як ты памазаў бацьку іхняга, і яны будуць сьвятарамі Маімі, і будзе ім памазаньне іхняе на сьвятарства вечнае ў пакаленьнях іхніх».
І памаж іх, як памазаў ты айца іхнага, і будуць сьвятарстваваць Імне, і будзе ім памазаньне іхнае на сьвятарстваваньне на векі ў вусіх родах іхных».
І зрабіў Майсей усё; як загадаў яму ГОСПАД, так і зрабіў.
І зрабіў Масей усе; як расказаў яму СПАДАР, так і зрабіў.
І сталася, у першы месяц другога году, у першы дзень месяца была пастаўлена Сяліба.
І было, што першага месяца другога году, першага дня месяца выстаўлена вітальня.
І паставіў Майсей Сялібу, і палажыў падстаўкі яе, і паставіў дошкі яе, і палажыў жэрдкі яе, і паставіў слупы яе,
І выставіў Масей вітальню, палажыў падложкі яе, пастанавіў дошкі яе, і палажыў завалы, і пастанавіў стаўпы яе,
і расьцягнуў намёт над Сялібай, і палажыў пакрыцьцё намёту зьверху над ім, як загадаў ГОСПАД Майсею.
І разапнуў будан над вітальняю, і палажыў пакрыцьце будану зьверху над ім, як расказаў СПАДАР Масею.
І ўзяў, і палажыў Сьведчаньне ў Каўчэг, і ўлажыў насілы ў Каўчэг, і палажыў накрыўку на Каўчэг зьверху.
І ўзяў і палажыў сьветчаньне ў скрыню, і палажыў нашулкі ў скрыню, і палажыў века на скрыню зьверху.
І ўнёс Каўчэг у Сялібу, і завесіў заслону, якая вісіць, і засланіў ёю Каўчэг Сьведчаньня, як загадаў ГОСПАД Майсею.
І ўнёс скрыню ў вітальню, і запяў запінаху запоны, і запяў над скрыняю сьветчаньня, як расказаў СПАДАР Масею.
І паставіў стол у Намёт Спатканьня, на паўночным баку Сялібы, звонку ад заслоны.
І пастанавіў стол у будан збору, на паўночным баку вітальні, вонках запінахі.
І разлажыў шэрагі хлябоў перад абліччам ГОСПАДА, як загадаў ГОСПАД Майсею.
І разлажыў хлябы ў парадак перад Відам СПАДАРОВЫМ, як расказаў СПАДАР Масею.
І паставіў сьвечнік у Намёт Спатканьня насупраць стала, на паўднёвым баку Сялібы.
І пастанавіў сьветач у будан збору супроці столу, на паўднявым баку вітальні.
І запаліў лямпы перад абліччам ГОСПАДА, як загадаў ГОСПАД Майсею.
І запаліў лянпы перад СПАДАРОМ, як расказаў СПАДАР Масею.
І паставіў ахвярнік залаты ў Намёце Спатканьня перад заслонаю.
І пастанавіў залаты аброчнік у будане збору перад запінахаю.
І кадзіў на ім пахкім кадзілам, як загадаў ГОСПАД Майсею.
І кадзіў на ім пахнючымі кадзіламі, як расказаў СПАДАР Масею.
І завесіў заслону на ўваходзе ў Сялібу.
І запяў запону ля ўходу вітальні.
І ахвярнік цэласпаленьня паставіў каля ўваходу ў Сялібу Намёту Спатканьня, і ахвяраваў на ім цэласпаленьне і ахвяру хлебную, як загадаў ГОСПАД Майсею.
І аброчнік усепаленьня пастанавіў ля ўходу ў вітальню будану збору, і аброк на ім усепаленьне а аброк хлебны, як расказаў СПАДАР Масею.
І паставіў мыцельнік паміж Намётам Спатканьня і ахвярнікам, і наліў у яго вады для абмываньня.
І пастанавіў мыцельнік памеж будану збору й аброчніка, і наліў у яго вады да ўмываньня.
І абмывалі ў ім Майсей і Аарон, і сыны ягоныя рукі свае і ногі свае.
І ўмывалі ў ім Масей а Аарон а сынове ягоныя рукі свае а ногі свае.
Калі ўваходзілі ў Намёт Спатканьня і калі набліжаліся да ахвярніка, яны абмываліся, як загадаў ГОСПАД Майсею.
І, уходзячы ў будан збору, бліжачыся да аброчніка, умываліся, як расказаў СПАДАР Масею.
І паставіў панадворак вакол Сялібы і ахвярніка, і завесіў заслону ў браме панадворку. І скончыў Майсей работу.
І выставіў панадворак наўкола вітальні й аброчніка, і запяў запону ў браме панадворку. І скончыў Масей работу.
І закрыла воблака Намёт Спатканьня, і слава ГОСПАДА напоўніла Сялібу.
І пакрыў булак вітальню збору, і слава СПАДАРОВА напоўніла вітальню.
І ня мог Майсей увайсьці ў Намёт Спатканьня, бо ляжала на ім воблака, і слава ГОСПАДА напаўняла Сялібу.
І ня мог Масей увыйсьці ў будан збору, бо вітаў над ім булак, і слава СПАДАРОВА напаўняла вітальню.
І калі падымалася воблака па-над Сялібаю, тады вырушалі сыны Ізраіля ў-ва ўсе падарожжы свае.
І як падыймаўся булак ад вітальні, тады пушчаліся ў дарогу сынове Ізраелявы ў вусіх падарожжах сваіх.
А калі не падымалася воблака, тады не вырушалі, аж да дня, калі яно падымалася.
А як не падыймаўся булак, то яны ня пушчаліся ў дарогу, пакуль ён не падыймаўся.
Бо воблака ГОСПАДА было над Сялібай удзень, і агонь быў над ёй уначы перад вачыма ўсяго дому Ізраіля ў-ва ўсіх падарожжах іхніх.
Бо булак СПАДАРОЎ над вітальняю ўдзень, і агонь быў ночы ў ёй перад ачмі ўсяго дому Ізраелявага ў вусіх падарожжах іхных.
