Да Эфэсянаў 5 разьдзел
Пасланьне да Эфэсянаў
Пераклад Рыма-Каталіцкага Касцёла → Пераклад Чарняўскага 1999
Дык вось, наследуйце Бога, як дзеці ўмілаваныя,
Дык будзьце насьлядоўнікамі Бога, як дзеці найдаражэйшыя,
і паступайце ў любові, як і Хрыстус палюбіў нас і аддаў сябе за нас як дар і ахвяру Богу на прыемны пах.
і жывіце ў любові, як і Хрыстос узьлюбіў нас і выдаў самога сябе за нас як дар і ахвяру Богу на пах прыемны.
А распуста, і ўсялякая нячыстасць, і сквапнасць няхай нават не згадваюцца сярод вас, як гэта належыць святым.
Распуста ж і усякая нячыстасьць або сквапнасьць хай і не ўпамінаюцца ў вас, як належыць сьвятым,
Таксама і непрыстойнасць, і пустаслоўе, і вульгарнасць нягожыя для вас. Наадварот, няхай лепш будзе падзяка.
або разбэшчанасьць ці ліхая гаворка, ці насьмешка неадпаведная, але толькі падзяка.
Вы павінны ведаць, што ніякі распуснік, або нячысты, ці сквапны, гэта значыць ідалапаклоннік, не мае спадчыны ў Валадарстве Хрыста і Бога.
Вось гэта ведайце і будзьце перакананымі, што ні адзін распусьнік або нячысты ці сквапны, што значыць служыцель ідалам, ня мае ўдзелу ў Каралеўстве Хрыстовым і Божым.
Няхай ніхто не зводзіць вас марнымі словамі, бо праз гэта прыходзіць Божы гнеў на непаслухмяных сыноў.
Хай ніхто вас ня зводзіць пустымі словамі; бо за гэта прыходзіць гнеў Божы на сыноў праціўленьня.
Не будзьце ж іх супольнікамі.
Дык ня станьцеся ўдзельнікамі іх лёсу.
Калісьці вы былі цемрай, а цяпер вы святло ў Пану. Паступайце, як дзеці святла.
Былі бо вы калісьці цемраю, а цяпер вы — сьвятло ў Госпадзе, дык як сыны сьвятла і жывіце.
Бо плод святла ёсць ва ўсялякай дабрыні, справядлівасці і праўдзе.
Плод жа сьвятла выяўляецца ва ўсякай дабраце, і справядлівасьці, і праўдзе.
Імкніцеся да таго, што даспадобы Пану.
Глядзіце, што падабаецца Богу,
Не бярыце ўдзел у бясплённых справах цемры, а лепш выкрывайце іх.
і не прыймайце ўдзелу ў бясплодных справах цемры, але выкрывайце іх.
Бо пра тое, што яны робяць патаемна, нават сорамна казаць.
Бо сорамна і казаць аб тым, што робіцца імі, хаваючыся.
А ўсё, што выкрываецца праз святло, становіцца яўным, бо ўсё, што становіцца яўным, ёсць святло.
Усё, што ганіцца, становіцца яўным у сьвятле,
Таму сказана: «Прачніся, які спіш, і ўваскрэсні, і Хрыстус асветліць цябе».
бо ўсё, што выкрываецца, ёсьць сьвятло. Таму ў сказана: "Устань, каторы сьпіш, і паўстань з мёртвых, і асьвеціць цябе Хрыстос".
Глядзіце дакладна, як паступаеце, не як неразумныя, а як мудрыя.
Дык глядзіце, браты, асьцярожна хадзіце, не як неразумныя, але як мудрыя,
Выкарыстоўвайце час, бо дні ліхія.
выкарыстоўваючы час, бо дні цяпер ліхія.
Не будзьце ж неразважнымі, але пазнавайце, што ёсць воляй Пана.
Дзеля таго ня будзьце неразважлівымі, але разумеючымі, што ёсьць воля Госпада.
І не ўпівайцеся віном, ад якога бывае распуста, але напаўняйцеся Духам,
Ня піце лішне віна, у якім прычына распусты, але напаўняйцеся Духам,
настаўляючы саміх сябе псальмамі, гімнамі і духоўнымі песнямі, спяваючы і праслаўляючы Пана ў вашых сэрцах.
гаворачы між сабою псальмы, і гімны, і песьні духоўныя; сьпяваючы і граючы Госпаду ў сэрцах вашых.
Дзякуйце заўсёды за ўсё Богу і Айцу ў імя Пана нашага Езуса Хрыста.
Дзякуючы заўсёды Богу і Айцу за ўсё ў імя Госпада нашага Езуса Хрыста,
Падпарадкоўвайцеся адзін аднаму ў боязі Хрыстовай.
падпарадкоўвайцеся адны адным у страху Хрыстовым.
Жонкі, падпарадкоўвайцеся сваім мужам, як Пану,
Жанчыны хай слухаюць мужоў сваіх, як Госпада,
бо муж — галава жонкі, як і Хрыстус — Галава Касцёла. Ён — Збаўца цела.
бо муж — галава жанчыны, як Хрыстос — галава Царквы, свайго Цела, якога Ён Збаўца.
Таму, як Касцёл падпарадкоўваецца Хрысту, так і жонкі падпарадкоўваюцца ва ўсім мужам.
Але, як Царква пакараецца Хрысту, так і жонкі мужам сваім у-ва ўсім.
Мужы, любіце сваіх жонак, як і Хрыстус палюбіў Касцёл і аддаў сябе за яго,
Мужы, любіце жонкі свае, як і Хрыстос любіць Царкву, і самога сябе выдаў за яе,
каб асвяціць яго, ачысціўшы купеллю вады і словам,
каб асьвяціць яе, ачышчаючы купальняй воднаю ў слове,
каб ён з’явіўся перад Ім слаўным Касцёлам, які не мае плямы, ці заганы, ці чаго-небудзь падобнага, і каб ён быў святы і беззаганны.
каб паставіць самому сабе слаўную Царкву, без пляміны ці зморшчыны або чагосьці падобнага, але каб была яна сьвятая і беззаганная.
Так павінны мужы любіць сваіх жонак, як сваё цела. Хто любіць сваю жонку, любіць самога сябе.
Так і мужы павінны любіць жонак сваіх, як уласныя целы. Хто сваю жонку любіць, сам сябе любіць.
Бо ніхто ніколі не меў нянавісці да свайго цела, але корміць і даглядае яго, як і Хрыстус свой Касцёл,
Ніхто бо ніколі ня меў у нянавісьці цела свайго, але корміць і спагадае яму, як Хрыстос Царкве,
бо мы члены Ягонага цела.
бо мы — члены Цела Яго.
Таму пакіне мужчына бацьку свайго і маці і злучыцца са сваёй жонкай, і будуць двое адным целам.
Дзеля таго пакіне чалавек бацьку і матку і злучыцца з жонкай сваёй, і будуць двое адным целам.
Вялікая таямніца гэтая, а кажу я ў дачыненні да Хрыста і да Касцёла!
Гэта вялікая таямніца; а я кажу аб Хрысьце і Царкве.
Дык няхай кожны з вас любіць сваю жонку так, як самога сябе, а жонка няхай паважае мужа.
Вось жа і вы, усякі па сабе, кожны хай любіць жонку сваю, як самога сябе, а жонка хай баіцца мужа свайго.
