Лукаша 3 разьдзел

 

 

У пятнаццаты год панавання цэзара Тыберыя, калі Понцій Пілат быў намеснікам Юдэі, а Ірад быў тэтрархам Галілеі, Філіп, брат ягоны, тэтрархам Ітурэі і Траханіцкай зямлі, а Лізанія тэтрархам Абілены,

 

Пятнанцатага году дзяржавы цэсара Тыбэра, як Понт Пілат быў намесьнікам Юдэі, Гірад быў чацьвертнікам у Ґалілеі, а Піліп, брат ягоны, чацьвертнікам Ітурэі а Трахоніцкае краіны, а Лізан чацьвертнікам Абіленеі,

пры першасвятарах Анне і Каяфе, было скіравана слова Божае да Яна, сына Захарыі, у пустыні.

 

За найвышшых сьвятароў Ганны а Каяпы, было слова Божае да Яана Захаронка на пустыні.

Ён прайшоў усе ваколіцы Ярдана, абвяшчаючы хрост пакаяння дзеля адпушчэння грахоў,

 

І ён праходзіў па ўсёй краіне ля Ёрдану, абяшчаючы хрэст каяты дзеля дараваньня грахоў,

як напісана ў кнізе слоў прарока Ісаі: «Голас таго, хто кліча ў пустыні:“Падрыхтуйце дарогу Пану,простымі рабіце сцежкі Яму!

 

Як напісана ў кнізе словаў Ісаі прарокі, кажучы: «Голас гукаючага на пустыні: гатуйце дарогу Спадарову, прастайце сьцелжі Ягоныя;

Кожная даліна ўзвысіцца,кожная гара і пагорак панізяцца,і выбоістыя дарогі стануць раўнінай,а ланцугі гор — далінаю.

 

Кажная даліна напоўніцца, і кажная гара а ўзгорак паніжыцца, і скрыўленыя выпрастаюцца, і драгкія дарогі стануць гладкімі;

І ўбачыць кожнае целаБожае збаўленне”».

 

І кажнае цела абача спасеньне Божае».

Ён казаў натоўпам, якія прыходзілі да яго хрысціцца: «Племя змяінае, хто навучыў вас уцякаць ад будучага гневу?

 

Тады сказаў ён гурбе, што прыходзіла хрысьціцца ў яго: «Родзе яшчарыны! хто перасьцярог вас уцякаць ад надыходзячага гневу?

Прынясіце ж годны плён пакаяння і не думайце казаць сабе: “Маем Абрагама за бацьку”; бо кажу вам, што Бог можа з камянёў гэтых абудзіць дзяцей Абрагаму.

 

Дык радзіце плады гожыя каяты. І не пачынайце гукаць сабе: "Айцец у нас Абрагам"; бо кажу вам, што Бог можа з камянёў гэтых узьняць дзеці Абрагаму.

Ужо і сякера прыкладзена да карэння дрэў. Таму кожнае дрэва, якое не дае добрага плоду, будзе ссечана і кінута ў агонь».

 

Ужо й сякіра да караня дзерваў прыложана; дык кажнае дзерва, што ня родзе добрага плоду, сякуць а кідаюць у цяпло».

І пыталіся ў яго людзі, кажучы: «Што мы павінны рабіць?»

 

І пыталіся ў яго гурбы, кажучы: «Дык што маем рабіць?»

Ён казаў ім у адказ: «Хто мае дзве вопраткі, няхай аддасць таму, хто не мае, і хто мае ежу, няхай зробіць тое самае».

 

Ён, адказуючы, сказаў ім: «Хто мае дзьве адзежы, дай нямаючаму; і хто мае ежу, рабі тое самае».

Прыйшлі і мытнікі хрысціцца і сказалі яму: «Настаўнік, што мы павінны рабіць?»

 

Тады прышлі таксама мытнікі хрысьціцца і сказалі яму: «Вучыцелю, што мы маем рабіць?»

Ён адказаў ім: «Нічога больш за вызначанае вам не спаганяйце».

 

І сказаў ім: «Нічога не вымагайце балей за прызначанае вам».

Пыталіся ў яго таксама і жаўнеры, кажучы: «А мы што павінны рабіць?» Ён адказаў ім: «Нікога не крыўдзіце, не абвінавачвайце несправядліва і задавольвайцеся сваёй платай».

 

І пыталіся ў яго таксама жаўнеры, кажучы: «А мы што маем рабіць?» І ён адказаў ім: «Не рабіце ўсілства нікому ані вінуйце хвальшыва, і будзьце здаволіўшыся з платы свае».

Калі народ чакаў і калі ўсе разважалі ў сэрцах сваіх пра Яна, ці не Месія ён,

 

І як люд спадзяваўся, і думалі ўсі ў сэрцах сваіх празь Яана, ці ня быў можа ён Хрыстос,

Ян адказаў усім: «Я вадою хрышчу вас, але ідзе мацнейшы за мяне, якому я няварты развязаць раменьчык на Яго сандалях. Ён вас будзе хрысціць Духам Святым і агнём.

 

Яан адказаў, кажучы ўсім: «Я запраўды хрышчу вас вадою, але йдзець дужшы за мяне, у Каторага я ня гожы разьвязаць рэменьчыка ў вобую Ягоным; Ён будзе хрысьціць вас Духам Сьвятым а агнём.

Лапату трымае ў руцэ сваёй, каб ачысціць гумно сваё і сабраць пшаніцу ў засекі свае, а мякіну спаліць агнём непагасным».

 

Веялка Ягоная ў руццэ Ягонай, і Ён ачысьце такаўню Сваю, і пшонку зьбярэць у сьвіран, а ўмецьце спале агнём няўгасным».

Шмат чаго іншага прапаведаваў ён, абвяшчаючы Добрую Навіну народу.

 

І шмат чаго іншага напамінаючы, даваў дабравесьць люду.

А тэтрарх Ірад, якога Ян дакараў за Ірадыяду, жонку яго брата Філіпа, і за ўсё зло, якое ўчыніў Ірад,

 

Гірад жа чацьвертнік, ганены ім за Гіродзяду, жонку брата свайго Піліпа, і за ўсе ліха, што Гірад зрабіў,

да ўсяго дадаў яшчэ і тое, што замкнуў Яна ў вязніцы.

 

Дадаў яшчэ да ўсяго тое, што пасадзіў Яана ў вязьніцу.

Калі хрысціўся ўвесь народ і калі Езус, прыняўшы хрост, маліўся, раскрылася неба,

 

І сталася, як хрысьціўся ўвесь люд, і Ісус, ахрысьціўшыся, маліўся, нябёсы рашчыніліся,

і Дух Святы ў цялесным выглядзе, як голуб, сышоў на Яго, і быў голас з неба: «Ты Сын Мой умілаваны, Цябе ўпадабаў Я».

 

І ісступіў Дух Сьвяты на Яго ў цялесным выглядзе, як галуба, і прышоў голас ізь неба, кажучы: «Ты Сын Мой любовы; Цябе Я ўпадабаў!»

Езус, пачынаючы служэнне сваё, меў каля трыццаці гадоў і быў, як лічылі, сынам Юзафа, сына Элія,

 

А Самому Ісусу, як пачынаў, было год трыццаць веку, будучы, як думалі, сынам Язэпа Гілянка,

Матата, Левія, Мэльхія, Яная, Юзафа,

 

Матфацёнка, Левянка, Мельшанка, Янянка, Язэпенка,

Матація, Амоса, Навума, Эслія, Нагея,

 

Маттафёнка, Амасёнка, Нагумёнка, Есьлянка, Наґґаёнка,

Маата, Матація, Сэмэя, Ёсэха, Ёды,

 

Маафёнка, Матгафёнка, Сэмеёнка, Язэпенка, Юдзянка,

Янана, Рэсы, Зарабабэля, Салятыэля, Нэрыя,

 

Яанёнка, Рысаёнка, Зэрувавеленка, Шэалфіеленка, Ніранка,

Мэльхія, Адзія, Касама, Эльмадама, Эра,

 

Мельшанка, Адзьдзянка, Косамёнка, Елмодамёнка, Іранка,

Езуса, Эліязэра, Ярыма, Матата, Левія,

 

Ёсянка, Елезэранка, Ёрыменка, Матфацёнка, Левянка,

Сімяона, Юды, Юзафа, Ёнама, Эліяхіма,

 

Сыманёнка, Юдзянка, Язэпенка, Ёнанёнка, Елякімёнка,

Мэлея, Мэны, Матата, Натана, Давіда,

 

Малеаёнка, Менанёнка, Маттафёнка, Нафанёнка, Давідзёнка,

Есэя, Абэда, Бааза, Сальмона, Наасона,

 

Есянка, Овідзёнка, Воозёнка, Салмонёнка, Наасонёнка,

Амінадаба, Адміна, Арні, Эзрома, Фарэса, Юды,

 

Амінадавенка, Арамёнка, Есромёнка, Фарэсёнка, Юдзянка,

Якуба, Ісаака, Абрагама, Тарэя, Нахора,

 

Якавёнка, Ісачонка, Абрагаменка, Фаранка, Нахаронка,

Сэруха, Рахаба, Фалека, Эбэра, Салія,

 

Сэрушонка, Раґавёнка, Фалечонка, Еверонка, Салянка,

Каінама, Арфаксада, Сэма, Ноя, Ламеха,

 

Каінанёнка, Арфаксадзенка, Сэмянка, Ноянка, Ламёшанка,

Матусала, Эноха, Ярэда, Малелеэля, Каінама,

 

Мефусаленка, Енашонка, Ярэдзёнка, Малелееленка, Каінанёнка,

Эноса, Сэта, Адама, сына Бога.

 

Еносёнка, Сыфянка, Адамёнка, каторы быў Божы.