Да Эфэсянаў 6 разьдзел
Пасланьне да Эфэсянаў
Пераклад Праваслаўнай Царквы → Пераклад Чарняўскага 1999
Дзеці, слухайцеся ў Госпадзе бацькоў вашых, бо гэта праведна.
Дзеці, слухайце бацькоў вашых у Госпадзе, бо гэта справядліва.
«Шануй бацьку твайго і маці» — гэта першая запаведзь з абяцаннем:
Паважай бацьку твайго і маці тваю; гэта першае прыказаньне з абяцаньнем:
«каб добра табе было і ты доўга жыў на зямлі».
каб добра было табе і каб быў ты даўгавечным на зямлі.
І вы, бацькі, не раздражня́йце дзяцей вашых, а выхоўвайце іх у вучэнні і настаўле́нні Гасподнім.
І вы, бацькі, не раздражняйце дзяцей вашых, але ўзгадоўвайце іх у навуцы і напамінаньні Госпадавым.
Рабы, слухайцеся гаспадароў сваіх па плоці са стра́хам і трымце́ннем, у прастаце́ сэрца вашага, як Хрыста,
Нявольнікі, са страхам і дрыжаньнем у прастаце сэрца падпарадкоўвайцеся цялесным гаспадарам вашым, як Хрысту,
слу́жачы не напака́з, як чалавекаўго́днікі, а як рабы́ Хрыста, выко́нваючы волю Божую ад душы,
не для вока служачы, каб людзям падабацца, але як слугі Хрыстовыя, выпаўняючыя волю Божую ад душы,
шчыра слу́жачы, як Госпаду, а не як лю́дзям,
з добрай воляй паслугуючы, як Госпаду, а ня людзям,
ведаючы, што кожны, ці то раб, ці свабодны, калі зробіць нешта добрае, тое ж атрымае ад Госпада.
ведаючы, што кожны, хто б зрабіў дабро, той і ад Бога атрымае, ці ён нявольнік, ці вольны.
І вы, гаспадары, рабіце ім тое самае, стрымлівайце суровасць, ведаючы, што і над вамі самімі, і над імі ёсць на нябёсах Гасподзь, Які не зважа́е на асобы.
І вы, гаспадары, падобна рабіце ім, зьмяншаючы пагрозы, ведаючы, што і іхні і ваш Госпад ёсьць ў небе, і што Ён не ўзіраецца на асобу.
Нарэшце, браты мае, умацоўвайцеся ў Госпадзе і ў магутнасці сілы Яго;
Наастатак, браты, умацоўвайцеся ў Госпадзе і ў сіле моцы Ягонай.
апранíцеся ва ўсе даспехі Божыя, каб маглі вы супрацьстая́ць кава́рству дыявала;
Апранецеся ў зброю Божую, каб змаглі ўстаяць супраць хітрыкаў д'ябла.
бо змаганне наша не супраць крыві і плоці, а супраць начальстваў, супраць улад, супраць сусветных уладароў цемры веку гэтага, супраць злых духаў паднябесных.
Бо нашае ваяваньне ня супраць крыві і цела, але супраць начальстваў, супраць ўладаў, супраць уладальнікаў гэтага сьвету цемры, супраць духаў злосьці нябесных.
Дзеля гэтага вазьміце ўсе даспехі Божыя, каб маглі вы супрацьста́ць у дзень ліхі і, усё адолеўшы, выстаяць.
Дзеля таго вазьміце зброю Божую, каб маглі ў дзень ліхі ўстаяць і ва ўсім застацца дасканалымі.
Так што станьце, падпераза́ўшы сябе ісцінай і апрануўшы браню праведнасці,
Дык стойце, падперазаўшы паясьніцы вашыя праўдаю і надзеўшы панцыр справядлівасьці,
і абуўшы ногі ў гатоўнасць дабраве́сціць мір;
і абуўшы ногі ў гатоўнасьць абвяшчаць Эвангельле супакою;
а перш за ўсё вазьміце шчыт веры, якім вы зможаце пагасіць усе распа́леныя стрэлы злога;
на ўсякую нагоду вазьміце шчыт веры, якім зможаце патушыць усе агністыя стрэлы ліхога;
і шлем спасення вазьміце, і меч духоўны, які ёсць слова Божае;
і вазьміце шалом збаўленьня разам з мячом Духа, якім ёсьць Слова Божае,
усякаю малітваю і прашэннем маліцеся ва ўсякую пару́ духам і пра гэта дбайце з усёй цярплівасцю і прашэннем за ўсіх святых
усьцяж молячыся ўсякаю малітваю і просьбаю ў Духу, і чуваючы з вытрываласьцю і просьбаю за ўсіх сьвятых
і за мяне, каб мне да́дзена было́ слова — вуснамі маімі з адвагаю не́сці тайну дабраве́сця,
і за мяне, каб дадзены быў мне дар слова на адчыненьне вуснаў маіх, каб адважна выяўляў таямніцы Эвангельля,
паслом якога я з’яўляюся ў аковах, каб я адважна прапаведаваў, як мне і належыць.
якога я пасланец у путах, каб меў адвагу так, як мне належыцца, гаварыць.
А каб і вы ведалі, што́ са мною і што́ я раблю, усё паведаміць вам Ціхік, узлю́блены брат і верны ў Госпадзе служыцель,
Каб жа і вы ведалі пра мае справы, што раблю, пра ўсё гэта раскажа вам Тыхік, найдаражэйшы брат і верны слуга ў Госпадзе,
якога я і паслаў да вас дзеля таго, каб вы даведаліся пра нас і каб ён суце́шыў сэ́рцы вашы.
якога я паслаў да вас на тое, каб вы ведалі, што ў нас робіцца, і каб ён пацешыў сэрцы вашыя.
Мір братам і любоў з вераю ад Бога Айца і Госпада Іісуса Хрыста.
Супакой вам, браты, і любоў з вераю ад Бога Айца і Госпада Езуса Хрыста.
Благадаць з усімі, хто любіць Госпада нашага Іісуса Хрыста непарушна. Амінь.
Ласка з усімі, якія любяць Госпада нашага Езуса Хрыста ў незьнішчальнасьці.
