Лукаша 3 разьдзел

 

 

У пятнаццаты ж год гаспадараньня Тыбэрыя кесара (і) гаспадаруючага Понція Пілата (у) Юдэі, і зьяўляючагася чацьвертаўладнікам Галілеі — Гірада, Піліпа ж, брата ягонага — зьяўляючагася чацьвертаўладнікам Ітурэі і Траханіцкай краіны, і Лісанія зьяўляючагася чацьвертаўладнікам (у) Абілінэі;

 

У пятнаццаты ж год праўле́ння ке́сара Тыве́рыя, калі Понцій Пілат быў правíцелем у Іудзеі, Ірад быў тэтра́рхам у Галіле́і, а Філіп, брат яго, тэтра́рхам у Ітурэ́і і Траханíцкай зямлі, а Ліса́ній тэтра́рхам у Авіліне́і,

пры архірэях Ганьне і Каяхве было Слова Божае да Яана, Захаравага сына, у пустэльні.

 

пры першасвятарах Анне і Каіа́фе, было́ слова Божае да Іаана, сына Заха́рыі, у пусты́ні.

І (ён) прайшоў па ўсёй ваколіцы Ярдану, абвяшчаючы хрышчэньне пакаяньня дзеля дараваньня грахоў,

 

І прайшоў ён усё навако́лле Іарданскае, прапаве́дуючы хрышчэ́нне пакая́ння дзе́ля адпушчэ́ння грахоў,

як напісана ў кнізе слоў Гісаі прарока, які кажа: голас крычачага ў пустэльні: прыгатуйце шлях Госпада, простымі зрабіце сьцежкі Яму;

 

як напíсана ў кнізе слоў Іса́іі прарока: «голас таго, хто клíча ў пусты́ні: падрыхту́йце шлях Госпаду, про́стымі зрабíце сце́жкі Яму;

кожны дол няхай напоўніцца, і кожная гара і ўзгорак няхай панізіцца, і крывулі стануць простымі, і няроўныя дарогі (стануць) гладкімі;

 

кожны дол няхай напо́ўніцца, і кожная гара́ і ўзгорак няхай панíзяцца, і крывое няхай вы́прастаецца, і няроўныя дарогі стануць гла́дкімі,

і ўбачыць кожнае цела збаўленьне Божае.

 

і ўбачыць кожная плоць спасе́нне Божае».

І вось казаў (ён) людзям, якія прыходзілі хрысьціцца ад яго: спародзьзе яхідзінавае! хто нахіліў вас уцякаць ад надыходзячага гневу?

 

І вось сказаў народу, які прыходзіў хрысцíцца ад яго: адро́ддзе яхíдніна! хто намо́віў вас уцяка́ць ад будучага гневу?

Зрабіце ж плады годныя пакаяньня, і ня думайце гаварыць самі сабе: ба́цьку маем Абрагама, бо кажу вам, што Бог можа з каменьняў гэтых стварыць дзяцей Абрагаму.

 

Прынясíце ж годныя плады́ пакая́ння і не думайце гаварыць самі сабе: «айцец ў нас Аўраам»; бо кажу вам, што Бог можа з камянёў гэтых узве́сці дзяцей Аўрааму.

Бо ўжо і сякера каля караня дрэваў ляжыць; усякае дрэва, якое плоду добрага ня прыносіць, сьсякаецца й кіда́ецца ў вагонь.

 

Ужо і сяке́ра пры ко́рані дрэў ляжы́ць: бо ўсякае дрэва, якое не прыно́сіць добрага плоду, ссяка́юць і кíдаюць у агонь.

І пыталіся ў яго людзі, кажучы: што ж (нам) рабіць?

 

І пытаўся ў яго народ, ка́жучы: што ж рабіць нам?

Адказаўшы ж (ён) ім гаворыць: хто мае дзьве адзежыны, той няхай дасьць таму, хто ня мае, і, хто мае ежу, няхай робіць гэтаксама.

 

Ён жа гаворыць ім у адказ: хто ма́е дзве кашу́лі, няхай дасць таму, хто не ма́е, і хто ма́е ежу, няхай зробіць гэтаксама.

Прыйшлі ж і мытнікі ахрысьціцца і сказалі яму: настаўнік! што на́м рабіць?

 

Прыйшлі і мы́тнікі хрысцíцца ад яго і сказалі яму: настаўнік! што нам рабіць?

Ён жа адказаў ім: нічога большага за загаданае вам ня спаганяйце.

 

А ён сказаў ім: нічога больш за вы́значанае вам не спаганя́йце.

Пыталіся ў яго таксама і жаўнеры, кажучы: а нам што рабіць? І сказаў ім: ні ў ко́га ня вымагайце грошы і ня паклёпнічайце, і будзьце задаволены сваёй платай.

 

Пыталіся ў яго таксама і воіны, гаво́рачы: а нам што рабіць? І сказаў ім: не чынíце крыўды нікому, не даносьце і задавальня́йцеся пла́тай сваёй.

Калі ж народ мучыўся думкай, і разважалі ўсе ў сэрцах сваіх пра Яана, ці ня Хрыстос ён,

 

Калі ж народ быў у чака́нні і ўсе разважа́лі ў сэ́рцах сваіх пра Іаана, ці не Хрыстос ён, —

адказаў Яан усім, кажучы: я сапраўды хрышчу вас вадою. Але ідзе Дужэйшы за мяне, у Якога я ня варты разьвязаць рамень абутку Ягонага; Ён будзе хрысьціць вас Духам Сьвятым і агнём;

 

адказаў Іаан усім, гаворачы: я вадою хрышчу́ вас, але ідзе Мацнейшы за мяне, у Якога я нява́рты развяза́ць раме́нь абутку Яго; Ён будзе хрысцíць вас Духам Святым і агнём.

і гархва Ягоная ў Руцэ Ягонай, і (Ён) ачысьціць гумно Сваё і зьбярэ пшаніцу ў сьвіран Свой, а мяккіну спаліць агнём няпагасным.

 

Лапа́та Яго ў руцэ́ Яго, і Ён ачы́сціць гумно́ Сваё, і збярэ́ пшаніцу ў жы́тніцу Сваю, а мякíну спа́ліць агнём непага́сным.

І вось, і многае другое, навучаючы, дабравесьціў (ён) народу.

 

І многа ў чым іншым настаўля́ючы, дабраве́сціў ён народу.

Гірад жа чацьвертаўладнік, дакараны ім за Гірадзіяду, жонку брата ягонага Піліпа, і за ўсё, што Гірад зрабіў благога,

 

А Ірад тэтра́рх, выкрыва́ны ім за Ірадыя́ду, жонку Філіпа, брата свайго, і за ўсё ліхое, што зрабіў Ірад,

дадаў да ўсяго і тое, што пасадзіў Яана ў вязьніцу.

 

дада́ў да ўсяго яшчэ і тое, што зачынíў Іаана ў цямнíцы.

І сталася, як хрысьціўся ўвесь народ, і Ісус ахрысьціўшыся маліўся, адчынілася неба,

 

І ста́лася: калі хрысцíўся ўвесь народ, і Іісус, ахрысцíўшыся, маліўся, раскры́лася неба,

і зыйшоў на Яго Дух Сьвяты ў цялесным выглядзе, як галуб, і быў голас зь неба, ка́жучы: Ты Сын Мой улюблены, Цябе (Я) упадабаў!

 

і сышоў на Яго Дух Святы́ ў цяле́сным вы́глядзе, як голуб, і голас быў з неба, які прамовіў: Ты Сын Мой Узлю́блены, Цябе Я ўпадаба́ў.

І Сам Ісус быў гадоў каля трыццаці, пачынаючы (Сваё служэньне), і быў, як думалі, Сын Язэпаў, Íліяў,

 

А Сам Іісус меў гадоў трыццаць, калі распачына́ў, і быў, як думалі, Сын Іо́сіфаў, Ілíеў,

Маттатаў, Ле́віяў, Ме́льхіяў, Яанаў, Язэпаў,

 

Матфа́таў, Левíеў, Мелхíеў, Іана́еў, Іо́сіфаў,

Маттаціяў, Амо́саў, Навумаў, Ясьлімаў, Нагеяў,

 

Матафíеў, Амо́саў, Нау́маў, Еслíмаў, Нагге́еў,

Маатаў, Маттаціяў, Самеяў, Язэпаў, Юдаў,

 

Маа́фаў, Матафíеў, Семеíеў, Іо́сіфаў, Іу́даў,

Яананаў, Рысаяў, Зараба́бэляў, Салятыілаў, Нірыяў,

 

Іаана́наў, Рыса́еў, Зарава́велеў, Салафіíлеў, Ніры́еў,

Мэльхіяў, Адзіяў, Касамаў, Ялмадамаў, Іраў,

 

Мелхíеў, Аддзíеў, Каса́маў, Елмада́маў, Íраў,

Ясіяў, Яліязэраў, Іярымаў, Маттатаў, Ле́віяў,

 

Іасíеў, Еліезе́раў, Іары́маў, Матфа́таў, Левíеў,

Сымонаў, Юдаў, Язэпаў, Яананаў, Яліякімаў,

 

Сімяо́наў, Іу́даў, Іосіфаў, Іана́наў, Еліакíмаў,

Мэлеаяў, Маінанаў, Маттатаяў, Натанаў, Давідаў,

 

Мелеа́еў, Маіна́наў, Маттафа́еў, Нафа́наў, Давíдаў,

Ясеяў, Абідаў, Баозаў, Салмонаў, Наасонаў,

 

Іесе́еў, Авíдаў, Вао́заў, Салмо́наў, Наасо́наў,

Амінадабаў, Арамаў, Ясромаў, Хварэсаў, Юдаў,

 

Амінада́ваў, Ара́маў, Есро́маў, Фарэ́саў, Іу́даў,

Якубаў, Ісагакаў, Абрагамаў, Тараў, Нахораў,

 

Іа́каваў, Ісаа́каў, Аўраа́маў, Фа́раў, Нахо́раў,

Сэрухаў, Рагабаў, Хвалекаў, Ябераў, Салаў,

 

Серу́хаў, Рага́ваў, Фале́каў, Еве́раў, Са́лаў,

Каінанаў, Архваксадаў, Сэмаў, Нояў, Ламехаў,

 

Каіна́наў, Арфакса́даў, Сíмаў, Но́еў, Ла́мехаў,

Матусалаў, Янохаў, Ярэдаў, Малеляіляў, Каінанаў,

 

Мафуса́лаў, Ено́хаў, Іарэ́даў, Малелеíлаў, Каіна́наў,

Яносаў, Сэтаў, Адамаў, Божы.

 

Ено́саў, Сíфаў, Ада́маў, Божы.