Выслоўяў Саламонавых 18 разьдзел
Кніга выслоўяў Саламонавых
Пераклад Васіля Сёмухі → Пераклад Чарняўскага 2017
Сваволі шукае прымхлівы, паўстае супроць усяго разумнага.
Зручных выпадкаў шукае той, хто жадае пазбавіцца сябра; раздражняе яго ўсякая парада.
Неразумны ня любіць думаць, а толькі паказаць бы свой розум.
Бязглузды не адчувае асалоду ад разважлівасці — а толькі ад паказу ўласнага розуму.
З прыходам бязбожнага прыходзіць і пагарда, а з вартым пагарды — ганьба.
Калі прыйдзе бязбожнік — прыйдзе і пагарда, а з ганьбай — знявага.
Слова з вуснаў чалавечых — глыбокія воды; крыніца мудрасьці — бруісты паток.
Словы з вуснаў чалавека — глыбокая вада, а крыніца мудрасці — багатая плынь.
Нядобра быць ласкавым зь бязбожным, каб абвергнуць праведнага ў судзе.
Нядобра прымаць чалавека бязбожнага, каб пахіснуць справядлівага ў законнасці яго.
Вусны бязглуздага цягнуць у незлагадзь, а словы яго выклікаюць бойку.
Вусны бязглуздага змешваюцца са сваркамі, а рот яго выклікае пабоі.
Язык бязглуздага — пагібель яму, а вусны яго — сетка на душу ягоную.
Рот бязглуздага — яго пагібель, а вусны яго — пастка для душы яго.
Словы нагаворшчыка — як прысмакі, і яны гладка ўваходзяць у нутро чалавека.
Словы плеткара — быццам салодкія, і самі даходзяць да глыбіні чэрава.
Нядбалы ў працы сваёй — брат марнатраўцы.
Той, хто ў працы сваёй млявы і нядбайны, той — брат знішчыцеля.
Імя Госпада — моцная вежа: убягае ў яе праведнік, і ў бясьпецы.
Наймацнейшая цытадэль — імя Госпада; да яе спяшаецца справядлівы, і там ён узвысіцца.
Маёмасьць багатага — як моцны горад ягоны, і высокім мурам здаецца яму.
Маёмасць багатага — трывалы горад яго, яна — быццам мур высокі ў думцы яго.
Перад падзеньнем узносіцца сэрца чалавека, а сьціпласьць ідзе наперадзе славы.
Перад знішчэннем узвышаецца сэрца чалавечае, і перад услаўленнем — уціхамірваецца.
Хто дае адказ, ня выслухаўшы, той неразумны і брыдка яму.
Хто спярша гаворыць, а потым слухае, — таму бязглуздасць і ганьба.
Дух чалавека пераносіць яго немачы; а прыгнечаны дух — хто можа ўмацаваць яго.
Дух чалавечы пераносіць немач сваю, але хто зможа падтрымаць зруйнаваны дух?
Сэрца разумнага набывае веды, і вуха мудрых шукае ведаў.
Сэрца разважлівае будзе валодаць ведамі, і вуха мудрых шукае ведаў.
Дарунак дае чалавеку прастору і да вяльможаў давядзе яго.
Дар чалавека пашырае дарогу яго і да кіраўнікоў даводзіць яго.
Першы ў цяжбіне сваёй мае рацыю, але прыходзіць супернік ягоны і паняверыць яе.
Хто першы гаворыць у спрэчцы — лічыцца справядлівым, а прыходзіць сябар яго і выкрые яго.
Жэрабя спыняе спрэчкі і вырашае паміж моцнымі.
Жэрабя спыняе спрэчкі і таксама вырашае паміж магутнымі.
Азлоблены брат няпрыступнейшы за моцны горад, і свары падобныя на замкі замка.
Брат, якога абражаюць, мацнейшы за моцны горад, а сваркі — як крэпасці гарадоў.
Ад плоду вуснаў чалавека напаўняецца чэрава ягонае; вытворамі вуснаў сваіх ён насычаецца.
З плода вуснаў чалавека насыціцца чэрава яго, а спараджэнні ўласных вуснаў уволю накормяць яго.
Сьмерць і жыцьцё — ва ўладзе языка, і хто любіць яго, скаштуе ад плоду яго.
Смерць і жыццё ў руцэ языка; хто яго любіць — будзе есці плады яго.
Хто знайшоў жонку, той знайшоў дабро і атрымаў мілату ад Госпада.
Хто знайшоў добрую жонку — знайшоў дабро і атрымаў ласку ад Госпада.
З мальбою гаворыць убогі, а багаты адказвае груба.
Калі бедны гаворыць з маленнямі, то багаты будзе гаварыць жорстка.
Хто хоча мець сяброў, той і сам павінен быць прыязны; і бывае сябар больш прыязны за брата.
Чалавек можа быць паранены сябрамі, але ёсць сябар, які бліжэй за брата.
