1 да Фесаланікійцаў 5 разьдзел
Першае пасланьне да Фесаланікійцаў
Пераклад Васіля Сёмухі → Пераклад Яна Станкевіча
А пра часы і часіны няма патрэбы пісаць вам, браты,
Праз часы ж а поры, браты, не маеце вы патрэбы, каб пісаць вам,
бо самі вы дакладна ведаеце, што дзень Гасподні так прыйдзе, як злодзей уначы.
Бо самы вы дабрусенька ведаеце, што дзень Спадароў, як злодзей ночы, прыйдзе.
Бо, калі будуць казаць: «мір і бясьпека», тады зьнянацку спасьцігне іх пагібель, як мука родамі спасьцігае цяжарную, і ня ўнікнуць.
Як будуць гукаць: «Супакой а бясьпечнасьць», тады зьнецікі прыйдзе загуба на іх, як трудненьне на тую, што зь дзяцём, і ніяк не ўцякуць.
Але вы, браты, ня ў цемры, каб дзень застаў вас, як злодзей;
Але вы, браты, ня ў цемні, каб дзень засьпеў вас, як злодзей;
бо ўсе вы — сыны сьвятла і сыны дня: мы — ня сыны ночы, ні цемры.
Бо ўсі вы сынове сьвятліні а сынове дня: мы — ня сынове ночы ані цемні.
Дык вось, ня будзем спаць, як іншыя, а будзем чуваць і цьвярозіцца.
Дык ня сьпіма, як засталыя, але будзьма чукавыя а цьвярозыя.
Бо, хто сьпіць, сьпіць уночы, і хто ўпіваецца, упіваецца ўночы.
Бо сьпячыя сьпяць ночы, і п’янчачыя п’янчацца ночы.
Мы ж як сыны дня, будзем цьвярозіцца, апрануўшыся ў браню веры і любові і ў шалом надзеі на збавеньне,
Мы ж, будучы сынамі дня, цьверазімася, надзеўшы панцыр веры а міласьці і шолам надзеі спасеньня.
таму што Бог вызначыў нас не на гнеў, а на атрыманьне збавеньня праз Госпада нашага Ісуса Хрыста,
Бо Бог прызначыў нас не на гнеў, але на адзяржаньне спасеньня пераз Спадара нашага Ісуса Хрыста,
Які памёр за нас, каб мы, ці то чуваем, ці то сьпім, жылі разам зь Ім.
Памерлага за нас, каб, ці чукавыя мы, ці сьпім, жылі разам ізь Ім.
Таму ўмаўляйце адно аднаго і навучайце адно аднаго, як вы і робіце.
Дык цешча адны адных і будуйце адны адных, як вы й робіце.
Просім жа вас, браты, паважаць тых, якія працуюць у вас, і якія пастаўлены над вамі ў Госпадзе, і якія на розум вас настаўляюць,
І просім вас, браты, знаць працуючых у вас і тых, што дамяняюць вам,
і шанаваць іх пераважна зь любоўю за справу іхнюю; будзьце ў згодзе паміж сабою.
І надта паважаць іх у любосьці за працу іхную; будзьце ў супакою мяжсобку.
Молім вас таксама, браты, настаўляйце на розум бясчынцаў, суцяшайце маладушных, падтрымлівайце слабых, будзьце цярплівыя з усімі.
Мы ж заклікаем вас, браты, дамяняйце ляным, цешча лентых, памагайце слабым, будзьце цярплівыя з усімі.
Глядзеце, каб хто каму не плаціў злом за зло; а заўсёды шукайце дабра і адно аднаму і ўсім.
Глядзіце, каб ніхто не аддаваў каму ліхам за ліха, але заўсёды імкніцеся да дабра адзін да аднаго і да ўсіх.
Заўсёды радуйцеся.
Заўсёды цешчася.
Бесьперастанку малецеся.
Бязупынку маліцеся.
За ўсё дзякуйце: бо такая за вас воля Божая ў Ісусе Хрысьце.
За ўсе дзякуйце, бо гэта ё воля Божая праз вас у Хрысту Ісусу.
Духа не гасеце.
Духа не гасіце.
Прароцтваў не прыніжайце.
Прароцтвы ўлегцы ня майце.
Усё выпрабоўвайце, добрага трымайцеся.
Усяго прабуйце, добрага моцна дзяржыцеся.
Ухіляйцеся ад ліхаты ў любым яе выглядзе.
Узьдзержуйцеся ад кажнага роду нягоднасьці.
Сам жа Бог міру няхай асьвеціць вас ва ўсёй поўніцы, і ваш дух і душа і цела ва ўсёй цэласьці няхай захаваюцца без пахібы ў прышэсьце Госпада нашага Ісуса Хрыста.
Сам жа Бог супакою няхай супоўна пасьвяціць вас, і ўвесь дух вашы, і душа, і цела няхай захаваюцца беззаганнымі на прыход Спадара нашага Ісуса Хрыста.
Верны Той, Хто заклікае вас, Які і зьдзейсьніць гэта.
Верны Тый, Каторы гукае вас, Каторы запраўды ўчыне гэта.
Браты! малецеся за нас.
Браты, маліцеся за нас.
Вітайце ўсіх братоў цалаваньнем сьвятым.
Паздаровайце ўсіх братоў ізь сьвятым цалаваньням.
Заклікаю вас Госпадам прачытаць гэта пасланьне ўсім сьвятым братам.
Прысягаю вас Спадаром прачытаць гэты ліст усім братом.
Мілата Госпада нашага Ісуса Хрыста з вамі. Амін.
Ласка Спадара нашага Ісуса Хрыста з Вамі.
