1 да Карынфянаў 11 разьдзел

 

 

Будзьце перайманьнікамі ў мяне, як я ў Хрыста.

 

Будзьце пераймальнікамі маімі, як я — Хрыста.

Але хвалю вас, браты, што вы ўсе мае памятуеце, і дзяржыце паданьні, як я падаў вам.

 

Хвалю вас, браты, што ва ўсім памятаеце пра мяне, ды трымаецеся ўсяго, што я вам перадаў.

Хачу таксама, каб вы ведалі, што кажнага мужа галава Хрыстос; галава жончына — муж; а галава Хрыста — Бог.

 

Хачу, каб вы ведалі, што галава кожнага мужчыны — Хрыстос, а кожнае жонкі галава — муж, а галава Хрыста — Бог.

Каторы муж моліцца альбо праракае з накрытай галавою, сароме галаву сваю.

 

Кожны мужчына, калі моліцца або праракуе з накрытай галавой, ганьбіць сваю галаву.

А кажная жонка, што моліцца альбо праракае праставалосая, сароме галаву сваю; бо гэта тое самое, як калі б яна была пагаліўшыся.

 

Кожная ж жанчына, калі моліцца або праракуе з ненакрытай галавой, ганьбіць сваю галаву, бо гэта тое самае, быццам яна аголена.

Бо калі жонка ня хоча накрывацца, няхай таксама стрыжэцца; а калі жонцы сорамна быць пастрыжанай альбо паголенай, няхай накрываецца.

 

Дык калі якая жанчына не накрывае галавы, хай абстрыжэ свае валасы. А калі ганьбіць жанчыну тое, што пастрыжана або паголена, дык хай накрывае галаву.

Бо муж ня мае накрываць галавы, бо ён абраз а слава Божая; а жонка — слава мужава.

 

Мужчыну не належыцца накрываць галавы, бо ён — вобраз і хвала Бога, а жанчына — хвала мужчыны.

Бо ня муж із жонкі, але жонка з мужа;

 

Бо не мужчына ад жанчыны, але жанчына ад мужчыны.

Бо таксама ня муж створаны дзеля жонкі, але жонка дзеля мужа.

 

і не мужчына створаны для жанчыны, але жанчына для мужчыны.

Затым і мае мець жонка на галаве сваёй знак улады дзеля ангілаў.

 

Таму жанчына мусіць мець на галаве знак падданасьці дзеля анёлаў.

Адылі, ані жонка бяз мужа, ані муж бяз жонкі ў Спадару.

 

Зрэшты, у Госпада ані мужчына без жанчыны, ані жанчына без мужчыны.

Бо як жонка з мужа, так і муж пераз жонку; усе ж — з Бога.

 

Бо як жанчына з мужчыны, так і мужчына (родзіцца) з жанчыны, а ўсе — ад Бога!

Разважча самы, ці гожа жонцы праставалосай маліцца Богу?

 

Рассудзіце самі: ці належыцца жанчыне маліцца да Бога з ненакрытай галавой?

Ціж сама прырода ня вуча вае, што калі муж мае даўгія валасы, няслава яму гэта;

 

Сама прырода вучыць нас, што ганьба для мужчыны насіць доўгія валасы,

Але калі жонка мае даўгія валасы, ёй слава, бо даўгія валасы даны ёй замест прыкрыцьця.

 

і наадварот, для жанчыны гэта — гонар. Бо валасы дадзены ёй на пакрыцьцё.

Але калі б хто думаў быць звадлівым, мы ня маем такога звычаю ані цэрквы Божыя.

 

А калі хто аб гэтым хоча спрачацца, хай ведае, што ані мы ня маем такога звычаю, ані цэрквы Божыя.

Але, сулячы гэта, не хвалю, што вы зьбіраецеся ня дзеля лепшага, але дзеля горшага.

 

Робячы вам гэтыя заўвагі, не магу вас пахваліць за тое, што зьбіраецеся не на лепшае, але на горшае.

Бо, першае, запраўды чую, што, як вы зыходзіцеся на збор, памеж вас бываюць падзелы, чаму часткава й веру.

 

Перад усім чую, што, калі зыходзіцеся разам як супольнасьць, бываюць у вас спрэчкі, і гэтаму я крыху веру.

Бо мусяць быць таксама гэрасі памеж вас, каб выявіліся памеж вас узумелыя.

 

Бо мусяць быць сярод вас і герэзіі, каб выявіліся выпрабаваныя людзі.

Адлі, як зьбіраецеся, дык ня дзеля вячэры Спадаровае;

 

Дык калі вы зьбіраецеся разам, няма ў вас спажываньня Вячэры Госпадавай.

Бо кажны барзьдзіць уперад есьці сваю ежу, і адзін галадуе, а другі п’яны.

 

Кожны бо з вас сьпяшаецца першым зьесьці сваю вячэру, ды бывае, што адзін галодны, а ў той час другі ўпіваецца.

Ціж у вас няма дамоў, каб есьці й піць? Або грэбуеце царквою Божай і сароміце тых, што ня маюць? Што сказаць вам? ці пахваліць вас за гэта? за гэта не пахвалю.

 

Ці ня маеце дамоў, каб там есьці і піць? Ці мо хочаце ганьбіць царкву Божую, ды засароміць тых, што нічога ня маюць? Што вам магу сказаць? Можа буду вас хваліць? Дык не! За гэта вас не пахвалю!

Бо я прыняў ад Спадара тое, што й перадаў вам, што Спадар Ісус тае ночы, каторае быў выданы, узяў хлеб

 

Бо я гэта атрымаў ад Госпада і перадаў вам, што Госпад Езус у тую ноч, калі меў быць выдадзены, узяў хлеб

І, даўшы падзяку, паламіў і сказаў: «Гэта цела Мае, каторае за вас ломіцца; гэта рабіце на Маю намятку».

 

і склаўшы падзяку, паламаў і сказаў: "Гэта ёсьць Цела Маё, якое за вас даецца. Рабіце гэта ў Маю памяць!"

Таксама й чару па вячэры, кажучы: «Гэта чара ё новая ўмова ў крыві Маёй, гэта рабіце так часта, як п’іце, на Маю памятку»,

 

Падобным спосабам па вячэры Ён узяў келіх і сказаў: "Гэты келіх ёсьць Новым Запаветам у Крыві Маёй. Рабіце гэта, колькі разоў будзеце піць, у Маю памяць".

Так часта, як вы ясьце хлеб гэты і п’іце чару гэтую, сьмерць Спадарову абяшчаеце, пакуль Ён прыйдзе.

 

Бо колькі разоў будзеце есьці гэты хлеб і піць гэты келіх, будзеце абвяшчаць сьмерць Госпада, пакуль ня прыйдзе.

Затым, хто будзе есьці хлеб гэты або піць чару Спадарову ня годна, вінен будзе Цела й Крыві Спадаровае.

 

Дзеля таго, хто нягодна есьць хлеб ды п'е з келіха, той вінаваты што да Цела і Крыві Госпадавай.

Няхай жа спрабуе сябе людзіна, і гэтак еж із хлеба таго і з чары тае.

 

Дык хай выспрабуе чалавек сябе самога, і тады хай есьць хлеб той ды п'е з келіха таго.

Бо хто есьць а п’ець ня годна, тый есьць а п’ець засуджэньне сабе, не разважаючы празь Цела.

 

Бо хто есьць і п'е нягодна, не зважаючы на Цела (Госпадава), прысуд сабе есьць і п'е.

Ад гэтага шмат хто з вас кволы а хворы і ня мала засынае.

 

Таму шмат у вас кволых і хворых, ды многа памірае.

Бо, калі б мы судзілі самы сябе, дык ня былі б суджаныя;

 

А калі мы самі сябе асудзім, дык ня будзем суджаны.

Будучы ж суджаныя, мы казьнераныя Спадаром, каб ня былі засуджаныя ізь сьветам.

 

Калі нас Госпад судзіць, то і карае, каб не былі мы асуджаны разам з усім сьветам.

Затым, браты мае, зьбіраючыся на вячэру, жджыце адзін аднаго.

 

Таму, браты мае, калі зьбіраецеся есьці Вячэру, пачакайце адзін на другога.

Калі хто хоча есьці, няхай есьць дома, каб зьбірацца вам не на засуджэньне. Засталае ўладжу, як прыйду.

 

Калі хто галодны, хай есьць дома, каб вам не зьбірацца на асуджэньне. Іншыя справы наладжу, як прыйду.