1 летапісаў 16 разьдзел
Першая кніга летапісаў
Пераклад Яна Станкевіча → Пераклад Васіля Сёмухі
І прынесьлі скрыню Божую, і пастанавілі яе сярод будану, каторы Давід разапнуў дзеля яе, і абраклі ўсепаленьні а супакойныя аброкі перад відам Божым.
І прынесьлі каўчэг Божы, і паставілі яго сярод скініі, якую зладзіў яму Давід, і ўзьнесьлі Богу цэласпаленьні і мірныя ахвяры.
І скончыў Давід паліць усепаленьні а супакойныя аброкі, і дабраславіў люд імям СПАДАРА,
Калі Давід закончыў цэласпаленьні і прынашэньне мірных ахвяр, дык дабраславіў народ імем Госпада.
І раздаў кажнаму Ізраеляніну, ад мужчыны аж да жонкі, кажнаму па букатцы хлеба, і па кавалку мяса, і па коўні віна.
І раздаў усім Ізраільцянам, і мужчынам і жанчынам, па адным хлебе і па кавалку мяса і па кубку віна,
І пастанавіў на службу перад скрыняю СПАДАРОВАЮ службітоў зь Левітаў, каб прыпаміналі яны, дзякавалі а выхвалялі СПАДАРА, Бога Ізраелявага:
і паставіў на службу перад каўчэгам Гасподнім некаторых зь лявітаў, каб яны славасловілі, дзякавалі і ўсхвалялі Госпада Бога Ізраілевага:
Асафа за галоўнага, наступным па ім Захару, Ееля а Шэмірамофа а Егіеля а Матыфу а Елява а Венаю а Овед-Едома а Ееля зь лірамі а гусьлямі, а Асафа да гры на цымбалах,
Асафа галоўным, другім пасьля яго Захара, Еела, Шэмірамофа, Ехііла, Мататыю, Эліяфа, і Ванэю, Авэд-Эдома і Еела з псалтырамі і цытрамі, і Асафа для ігры на кімвалах,
А Венаю а Ягазеля сьвятароў — штачасна трубіць перад скрыняю змовы Божае.
а Ванэю і Азііла, сьвятароў, каб пастаянна трубілі перад каўчэгам запавета Божага.
Гэтага дня Давід упяршыню даў псальму ў руку Асафа а братоў ягоных, дзякаваць Богу:
У гэты дзень Давід першы раз даў псальму для ўсхваленьня Госпада праз Асафа і братоў ягоных:
Дзякуйце СПАДАРУ, гукайце імя Ягонае, абяшчайце меж людаў учынкі Ягоныя;
слаўце Госпада, узносьце імя Яго; абвяшчайце ў народах дзеі Ягоныя;
Пейце Яму, пейце псальмы Яму, размаўляйце праз усі чудосы Ягоныя;
сьпявайце Яму, барабаньце Яму; раскажэце пра ўсе цуды Ягоныя;
Хваліцеся сьвятым імям Ягоным; хай вяселіцца сэрца шукаючых СПАДАРА;
хвалецеся імем Ягоным сьвятым: хай радуецца сэрца тых, што шукаюць Госпада;
Вызукайце СПАДАРА а сілы Ягоныя, шукайце віду Ягонага кажначасна;
знайдзеце Госпада і сілы Яго, шукайце няспынна аблічча Яго;
Успамінайце дзіва, што Ён учыніў, знакі Ягоныя й суды вуснаў Ягоных,
спамінайце цуды, якія Ён стварыў, азнакі Яго і суды вуснаў Ягоных,
Насеньне Ізраелява, слугі Ягоныя, сынове Якава, абраныя Ягоныя!
вы, семя Ізраілевае, рабы Ягоныя, сыны Якава, выбранцы Яго!
Ён СПАДАР, Бог наш; па ўсёй зямлі суды Ягоныя.
Ён Гасподзь Бог наш, суды Яго па ўсёй зямлі.
Памятуйце заўсёды змову Ягоную, слова расказанае тысячам пакаленьняў,
Памятайце вечна запавет Яго, слова, якое Ён наказаў ў тысячы родаў,
Каторую Ён учыніў із Абрагамам, і прысягу Ягоную Ісаку,
тое, што наказваў Абрагаму, і ў чым запрысягаўся Ісаку,
І ўстанавіў Якаву права, Ізраелю змоваю вечнаю,
і што паставіў Якаву ў закон, і Ізраілю ў запавет вечны,
Кажучы: «Табе дам зямлю Канаанскую, павароз спадку вашага».
кажучы: табе дам Я зямлю Ханаанскую, у спадчынны надзел вам.
Як вашы людзі былі нячысьленыя, як штось малое, і чужаземцы ў ёй,
Яны былі тады малалікія і мізэрныя, і прыхадні ў ёй,
І пераходзілі яны ад народу да народу, і ад каралеўства да іншага люду;
і пераходзілі ад народу да народу, і з аднаго царства да другога народу;
Ён не дазволіў людзіне крыўдзіць іх і ганіў каралёў за іх:
але Ён нікому не дазволіў крыўдзіць іх і выкрываў за іх цароў:
«Не чапайце памазанцаў Маіх, і прарокам Маім не рабіце ліха!»
не дакранайцеся да памазаных Маіх, і прарокам Маім не рабеце ліха.
Пейце СПАДАРУ, уся зямля, агалашайце дзень у дзень спасеньне Ягонае.
Сьпявайце Госпаду, уся зямля, дабравяшчайце дзень у дзень выратаваньне Яго.
Павядайце меж паган чэсьць Ягоную, меж усіх людаў чудосы Ягоныя;
Абвяшчайце язычнікам славу Яго, усім народам цуды Ягоныя,
Бо вялікі СПАДАР а вельмі славуты, і страшнейшы Ён над усі багі,
бо вялікі Гасподзь і варты хвалы, страшны больш за ўсіх багоў.
Бо ўсі багі людаў — балваны, але СПАДАР нябёсы ўчыніў.
Бо ўсе багі народаў нішто, а Гасподзь нябёсы стварыў.
Слава а вялічча перад відам Ягоным, магутнасьць а радасьць на месцу Ягоным.
Слава і веліч перад абліччам Ягоным, магутнасьць і радасьць на месцы Ягоным.
Прызнайце СПАДАРУ, радзімы людаў, прызнайце СПАДАРУ чэсьць а моц.
Узьнясеце Госпаду, плямёны народаў, узьнясеце Госпаду славу і гонар,
Прызнайце СПАДАРУ чэсьць імені Ягонага. Прынясіце дар, ды йдзіце перад від Ягоны, сьціце СПАДАРА ў харашыні сьвятасьці.
узьнясеце Госпаду славу імю Ягонаму. Вазьмеце дар, ідзеце прад аблічча Яго, пакланецеся Госпаду і хараству сьвятыні Яго.
Дрыжы перад Ім, уся зямля: нават сьвет Ён умацаваў, непахісьнецца.
Трымці перад ім, уся зямля, бо Ён запачаткаваў сусьвет, ён не пахісьнецца.
Хай радуюцца нябёсы, хай вяселіцца зямля, і хай скажуць меж народаў: «СПАДАР гаспадарствуе!»
Хай весяляцца нябёсы, хай радуецца зямля, і хай скажуць у народах: Гасподзь валадарыць!
Раві, мора а паўніня яго, хай цешыцца поле а ўсе, што на ім.
Хай плешча мора і што напаўняе яго, хай радуецца поле і ўсё, што на ім.
Тады запяюць дзервы лесавыя перад СПАДАРОМ, бо Ён прыходзе судзіць зямлю.
Хай пераможна радуюцца ўсе дрэвы дуброўныя прад абліччам Госпада, бо Ён ідзе судзіць зямлю.
Выхваляйце СПАДАРА, бо добры, бо на векі міласэрдзе Ягонае.
Слаўце Госпада, бо навечна міласьць Яго,
І кажыце: «Спасі нас, Божа спасеньня нашага! і зьбяры нас, і выбаў нас ад паган, каб мы маглі славіць сьвятое імя Твае і хваліцца ў хвале Тваёй!
і скажэце: выратуй, Божа, Выратавальнік наш! зьбяры нас і выбаві нас ад народаў, хай жа ўславім сьвятое імя Тваё і хай жа пахвалімся славаю Тваёю!
Дабраславёны СПАДАР, Бог Ізраеляў, ад веку і аж на векі!» І ўвесь люд сказаў: «Амін!», і хваліў СПАДАРА.
Дабраславёны Гасподзь Бог Ізраілеў ад веку і да веку! І сказаў увесь народ: амін! алілуя!
Давід пакінуў там, перад скрыняю змовы СПАДАРОВАЕ, Асафа а братоў ягоных, каб яны служылі перад скрыняю кажначасна, подле патрэбы кажнага дня,
Давід пакінуў там, перад каўчэгам запавета Гасподняга, Асафа і братоў ягоных, каб яны служылі перад каўчэгам пастаянна, кожны дзень,
І Овед-Едома а братоў ягоных, шасьцьдзясят асьмёх; Овед-Едома Ідуфунёнка а Госу — за брамнікаў,
і Авэд-Эдома і братоў ягоных, шэсьцьдзясят восем чалавек; Авэд-Эдома, сына Ідытунавага, і Хосу — брамнікамі,
А Садока сьвятара а братоў ягоных сьвятароў — перад вітальняю СПАДАРОВАЮ, на ўзвышшу, што ў Ґівеоне,
а Садока сьвятара і братоў сьвятароў перад жытлішчам Гасподнім, што на вышыні ў Гаваоне,
Да абраканьня ўсепаленьняў СПАДАРУ на аброчніку ўсепаленьня кажначасна, нараніцы і ўвечары, подле ўсёга, што напісана ў Законе СПАДАРОВЫМ, каторы Ён расказаў Ізраелю;
для прынашэньня цэласпаленьняў Госпаду на ахвярніку цэласпаленьня пастаянна, раніцай і ўвечары, і дзеля ўсяго, што напісана ў законе Госпада, які Ён наказаў Ізраілю;
І зь імі Гэмана а Ідуфуна і іншых абраных, каторыя прызначаны наймя, каб славіць СПАДАРА, бо на векі міласэрдзе Ягонае.
і зь імі Эмана і Ідытуна і іншых выбраных якія назначаны паіменна, каб славіць Госпада, бо вечная міласьць Ягоная.
Пры іх Гэман а Ідуфун з трубамі а цымбаламі, каб граць, і із снадзямі да песьняў Божых; сыноў жа Ідуфуна — ля варот.
Пры іх Эман і Ідытун праслаўлялі Бога, іграючы на трубах, кімвалах і розных музычных спарудах; а сыноў Ідытуна паставіў пры браме.
І адышоў кажны чалавек да дому свайго; зьвярнуўся й Давід, каб дабраславіць дом свой.
І пайшоў увесь народ, кожны ў свой дом; вярнуўся і Давід, каб дабраславіць дом свой.
