Псальмы 74 Псальм 74 (73)

¹ Навука Асапава. Чаму Ты, Божа, адкінуў нас назаўсёды, і чаму тлее гнеў Твой на авечкі па́сты Тваёй?

² Успомні збор (люду) Твайго, які Ты прыдбаў перш пачатку часу, вызваліў, як народ уласнасьці (Тваёй), гары Сыён, на якой Ты пасяліўся.

³ Падымі Стопы Твае да вечных руінаў. Усё ў Сьвятыні вораг разбурыў.

⁴ Рыкаюць праціўнікі Твае пасярод сходаў Тваіх. Яны паставілі іхныя знакі, як азнакі.

⁵ Ён вядомы, як той, хто падымае сякеру на гушчар лесу;

⁶ і цяпер яны разьбіваюць усе ягоныя рэзьбы (упрыгожаньні) сякерамі і молатамі.

⁷ Яны ўрынулі ў агонь Сьвятыню Тваю, Сялібу Імені Твайго апаганілі да гру́нту.

⁸ Яны сказалі ў сэрцы сваім: «Мы зруйнуем іх усіх ра́зам». Яны спалíлі ўсе мясьціны сходаў Божых у зямлі.

⁹ Мы больш ня бачым нашых знакаў. Няма больш прарока, і няма сярод нас нікога, хто б ведаў, дакуль (гэта будзе).

¹⁰ Дакуль, Божа, бу́дзе зьняважаць уціска́льнік, ці вечна будзе вораг зьняважаць Тваё Імя?

¹¹ Чаму Ты стрымліваеш Руку́ Тваю і Правіцу Тваю? Вымі яе са сховішча вопраткі Тваёй і зрабі ім канец!

¹² Але Бог ёсьць Кароль мой здаўна, Які чыніць збаўленьні сярод зямлі.

¹³ Ты разьдзяліў сілаю Тваёю мора, Ты патрушчыў галовы драконаў у водах.

¹⁴ Ты раструшчыў галовы лявіятану, аддаў яго на ежу народу пустэльняў.

¹⁵ Ты высек крыніцу і паток. Ты высушыў рэкі мнагаводныя.

¹⁶ Твой дзень, і ноч таксама Твая. Ты прыгатаваў сьвятло і сонца.

¹⁷ Ты ўсталяваў усе межы зямлі. Ты ўтварыў лета і зіму́.

¹⁸ Ты помні гэта: вораг зьняважыў Ягову. І няразумны народ зьняславіў Імя Тваё.

¹⁹ Ня аддай душы Тваёй галубіцы зьверу. Жыцьцё ўбогіх Тваіх ня забудзь навечна!

²⁰ Зірні на Запавет, бо цёмныя мейсцы зямлі ёсьць поўныя прытонаў гвалту.

²¹ Ня дай уцісьнёнаму вярнуцца асаромленым. Гаротны і ўбогі хай славяць Імя Тваё.

²² Паўстань Божа! Вядзі справу Тваю! Помні зьнявагі на Цябе, якія чыніць няразумны ўвесь дзень.

²³ Ня забудзь голасу Тваіх супраціўнікаў. Бунт тых, якія паўстаюць супраць Цябе, нясупынна ўзьнімаецца.