Исходъ 22 Исходъ 22 разьдзел

¹ Аще кто украдеть вола или овцу и забиет ю или продасть, то пять воловъ за единого вола да навратить а четыре овце за едину овцу.

² Естъли же тат, вламываяся в дом или подкопывая и вночи, был бы застижен и, раненый, умеръ, той, онже ранилъ и, не виненъ будеть крови его.

³ Пакли же бы вчинилъ тое во дни, убийца естъ, и самъ да умреть. Не имел ли бы чимъ заплатити татбы, самъ да проданъ будеть.

⁴ Естъли знайдется в него татба жива — волъ, осел или овца, — толико двое да навратить.

⁵ Спаствит ли кто поле чужее или виноградъ, пущая скотъ свой, абы пасся на немъ, той, что будеть имети найлепшего на поли своемъ или во винограде своем, за спасеное, еликоже вырекут, да дасть.

⁶ Естъли бы вышедъ огонь и знашолъ сламу и потомъ попалилъ стогы или жита нежатая на поли, да заплатить шкоду запаливый огонь.

⁷ Естъли же бы кто дал ближнему своему сребро или сосудъ на соблюдение и тому, онже принялъ, было бы украдено, аще знайдется тать, да навратить толико двое.

⁸ Пакли же не знайдется тать, то да приведется господинъ дому к суду и присягу вчинить, иже не протягнул естъ руки на речь ближнего своего, абы вделалъ лесть.

⁹ По тому же вчинить о воле, о осле, о овци, о ризе и о всякой речи згиблой. Ко судьямъ пря обоихъ при ведена будеть, а естли же они осудять без присяги, двое толико да навратить ближнему своему.

¹⁰ Подасть ли кто другу своему вола, осла, овцу или иное говядо стеречи и то умерло бы или розболелося, или от иноплеменникъ занято, а никто о томъ не ведалъ,

¹¹ присягою ся справить, иже не протягнулъ естъ руки к речи друга своего, и прииметь господинъ присягу его, а не будеть нученъ къ заплате.

¹² Пакли же бы та тбою было украдено, да заплатить дщету господину.

¹³ Будет ли пакъ удавлено от зверя, да принесеть к нему удавленое, и не будет платити.

¹⁴ Аще кто по зичит что таковаго от ближнего своего и охромело бы или умерло, а господина его не было при томъ, то мусить заплатити.

¹⁵ Пакли же бы при томъ былъ господинъ, не имать платити, найболей естъли же нанялъ у него сребромъ, абы делало.

¹⁶ Естъли кто прельстить девицу еще не зарученую и спит с нею, да дасть ей вено и поиметь ее собе за жену.

¹⁷ Пакли ж бы отець девице дати не хотелъ, отбудеть сребромъ по обычаю вена девическаго.

¹⁸ Чародейниковъ не будете живити.

¹⁹ И случающийся со скотиною смертию да умреть.

²⁰ Кто приносить жертву богом чуждимъ, убитъ да будеть, кроме Господу единому.

²¹ Пришелца не з[ъ] оби ди и ни засмути его, понеже и вы пришелци бесте в земли Египетской.

²² Вдовы и сироты да не вредите;

²³ естли же укривдите е и возопиють ко Мне, и Азъ услышу вопль их,

²⁴ и раз[г]невется ярость Моя, и побию васъ мечемъ, и будуть жены ваше вдовы и чада ваша сироты.

²⁵ Даси ли когда взаемъ сребро людем Моимъ убогимъ, живущим с вами, не буди ж докучая имъ, яко насилникъ, и ни бери на них росту.

²⁶ Возмеш ли в закладе от ближнего своего ризу, предъ заходомъ сол[н]ца верни ему,

²⁷ понеже толико едина сия естъ одежа у него, еюже прикриваеть тело свое, и не имать иное, на нейже бы спалъ. Возопиеть ли ко Мне, услышу его, яко милостивъ есмъ.

²⁸ Судьямъ да не поругаешися и князу людей твоих да не злоречиши.

²⁹ Десятинъ и начатковъ гумна твоего отдати не замедлиши. Первороженнаго от сыновъ твоихъ даси Мне.

³⁰ По тому же учиниши о волех и овцах твоих: седмъ дней да будеть при матери своей, осмаго же отдаси их Мне.

³¹ Мужи святии будете Мне, звероядиных мяс да не ясте, но псомъ е да дасте.