Како повеле Господь Богъ обновити крижала, или доски каменные, Моисееви и воступити на гору. Заповеда, да бы не товаришили с поганы, и о иныхъ заповедехъ. Моисей навратися з горы к людемъ.
1 По томъ пакъ рече Господь к Моисею: «Возми собе две досце каменных, подобны к первшим, и напишу на них слова, еже беша на первыхъ дощкахъ, еже поламалъ еси.a
2 Буди жъ готовъ за утра рано, да воступиши на гору Синай и станеши предо Мною на верху горы.
3 И да никтоже воступуеть с тобою и ни явится по всей горе; волы теже и овце да не будуть пасены близу горы.
4 Тогда стесалъ естъ Моисей две дощки каменныхъ, яки суть были и первые, и воставъ в ночи, въступилъ на гору Синай, якоже повелелъ былъ ему Господь, несяй с собою дощки».
5 И внегда снииде Господь во облаце, стояше Моисей пред Господем, взывая имя Его,
6 Онже егда идяше пред Ним, рече Моисей: «Вседержителю Господи Боже, милосердный и лютостивый долготерпеливе, многомилостиве и истинне,
7 сохраняя милосердие надъ тысещми и отдаляя безакония, неправды и грехы! И никтоже самъ собою чистъ естъ предъ Тобою. Ты убо отдаеши безакония отцевъ на сыны и на внуки до третиего и до четвертаго роду».
8 И поспешивъ, Моисей поклонися Богу и паде на землю, моляся,
9 и рече: «Знайдох ли ласку предъ очима Твоима, Господи, молю Ти ся, да идеши с нами, людие бо твердошийни суть, да оставиши безакония наша и грехи и владееши нами».
10 Отвеща к нему Господь: «Азъ положу заветъ Мой с тобою зрящим на то всимъ людемъ, чудеса чинити буду, яковаже никогда видана суть на земли и ни межи всеми народы, да познають людие сие, в нихже ты еси, дело Господьне грозно, еже приидущее сотворю.
11 Со храни жъ вся, еже днесь приказахъ тобе. Азъ выжену предъ лицемъ вашимъ Хананея, Еттея, Феризея, Еввея и Евузея.
12 Блюдися жъ того, да николи не дружишися со живущими на земли той, понеже было бы то тобе на соблазнъ,
13 но требища их раскопай, кумиры зламай и гае посекай,
14 да не поклонишися богом чуждимъ: Господь миловник силный, имя Его Богъ-мститель ест.
15 Да не завещаеши завета с людми страны тое, будеть бо, егда они жертвы приносят богом своимъ и кланяются ідолом их, позовут тя, да яси от приносов их.
16 И ниже дщеръ ихъ будеши понимати за сыны своя, да некогда они прелстять сыновъ ваших поклонитися богом своимъ.
17 Бога слиана не вчиниш собе.
18 Празникъ опресночный да соблюдеши, седмъ дней будеши ести опресноки, якоже повелехъ тобе, въ часъ месеца новыхъ плодовъ, въ месець убо той часу весны вышелъ есь изъ Египта.
19 Каждый самець, онже отвираеть утробу, Мой да будеть ото всего скоту: тако от воловъ, яко и от овець.
20 Первнъца осляти выкупиши овцею, ащели же не выкупиши чимъ, то убиеши и; первороженнаго от сыновъ своих выплатишъ, и да не явишися предъ лицем Моимъ с тощима рукама.
21 Шесть дней орати будешъ, дня седмаго престанеши орати и жати.
22 Празникъ неделный вчиниши собе в начало жатвы пшенице твоея; и празникъ третий, егда скончевется лето и вси жита свезеши во гумно.
23 Трикрать в году да явится весь мужеский полъ предъ лицем Вседержителя Господа, Бога Ізраилева.
24 Внегда отжену народы от лица твоего и розширю пределы твоя, никтоже не спротивится земли твоей, егда приидеши явитися предъ лицемъ Господа Бога трикрать в году.
25 Да не принесеши над квасом крови требы Моея и ни останется на утрие от приношения святочьнаго пасхи.
26 Начала жит земли твоея внесеши до храму Господа, Бога своего; да не звариши козляти во млеце матери его».
27 И рече Господь Моисееви: «Напиши собе слова сия, имиже завещахъ с тобою и с людми Ізраилевыми».
28 И былъ естъ Моисей предъ Господемъ четыредесят дней и четыредесятъ нощей, хлеба не ядя и воды не пия, и написалъ на дощкахъ словъ завета десеть.
29 И внегда схожаше Моисей з горы Синай, держай две досце каменне Сведения, и не ведяше того, яко рогато бе лице его для сполечного розмолвяния съ Господемъ.
30 Узревши пакъ Ааронъ и сынове Ізраилевы рогато лице Моисеево, не смеяху близко приступити к нему.
31 И позваныи от него, отвратихуся тако Ааронъ, яко и старейшины всего сонма, егда молвяше к нимъ.
32 По семъ придоша к нему вси сынове Ізраилевы, имже заповеда все, елико слышалъ от Господа на горе Синай.
33 И сконавъ слова, возложи покров на лице свое.
34 Внегда пакъ входяше к Господу и глаголаше с Нимъ, сыймовашеb покровъ, донеле паки выхожаше вонъ поведати сыномъ Ізраилевымъ вся, повеленая ему от Господа.
35 Они же видываху лице выходящего Моисея, яко бе рогато; протожъ и закривал ест опят лице свое, егда молвяше к ним.
a Другі Закон, 10[:1-2].
b Erratum: сіьимоваше.
Знайшлі памылку ў тэксце? Вылучыце яе і націсніце:
Ctrl + Enter
Книги Исходъ, 34 разьдзел
Звярніце ўвагу. Нумары вершаў — гэта спасылкі, якія вядуць на раздзел з параўнаннем перакладаў. Паспрабуйце, магчыма, вы будзеце прыемна здзіўлены.
Public Domain — народны здабытак.
2022, укладальнік — Бразгуноў Алесь.