ПОЧИНАЮТЬСЯ КНИГИ ПЯТЫИ МОІСЕОВЫ,
рекомыи Вторый Закон, по-евреіски Гел[ь] га-дворим, по-греческии Девтерономос, по латине Секунда Лексъ. А имають главъ 34.
О навращении людей Ізраилевых к горе Аморейских. О посылании мужей согледати земли обетованное. О гневе Божием на Израилян и о битве их со Амалехом.
1 Сие суть слова, еже глаголалъ естъ Моисей предъ Іорданемъ ко всемъ людемъ Ізраилевымъ на ровнинахъ польних, противу Чермному морю, межи Фараномъ и Тофилемъ, и Лаваномъ, и Асерофомъ, игдеже ест злата множество,
2 единнадесяти дней от Оревы путя чересъ гору Сеиръ даже до Кадис-Варнии.
3 Лета четырдесятого, единнадесятого месеца, во первый день того же месеца, глаголал естъ Моисей к сыномъ Ізраилевымъ вся, еликаже повеле ему Господь, абы поведилъ имъ,
4 внегда поразилъ Сеона, царя Аморейскаго, онже живяше въ Езвоне, и Ога, царя, онже живяше во Асерофе и во Едраи,
5 пред Іорданемъ, в земли Моавской. И почалъ естъ Моисей исповедати законъ, и рече:
6 «Господь, Богъ наш, молвилъ естъ к намъ на горе Оревъ, глаголя: “Досыть ест вам того, еже жисте на горе сей.
7 Навратитеся ж и идите къ горе Аморейскихъ и на поле, еже около ея естъ, и на горы и до долинъ, еже суть ку стране полуденной, и къ брегу морскому, и к земли Ханаанской, и к горе ливанской даже до реки великое Ефраты.
8 Се бо воистинну предахъ ю вамъ. Вниидите жъ ныне и начните владети землею, о нейже Господь Богъ клялъся естъ отцемъ вашимъ — Аврааму, Ісааку и Якову дати ю имъ и семени ихъ по нихъ”.
9 В ты часы реклъ есмъ к вамъ: “Не могу единъ самъ васъ понести и справовати,
10 понеже Господь, Богъ вашъ, розъмножилъ васъ и естъ ныне васъ такъ много, яко звездъ небесныхъ.
11 Господь, Богъ отцевъ вашихъ, придай еще к тому числу многое множество тысещей и благослави васъ, якоже глаголалъ естъ.
12 А протожъ не могу азъ единъ понести судов вашихъ, бременъ вашихъ, сваровъ вашихъ.
13 Выдайте ис себе мужей мудрыхъ и разумныхъ, ихже житие добре знаемо естъ въ поколениехъ вашихъ, да поставлю ихъ князми вашими”.
14 Тогда отповедели есте мне, глаголюще: “Добра естъ речь сия, юже учинити хощеши”.
15 И выбралъ есми з васъ мужей мудрыхъ и разумных, и поставилъ есмъ з нихъ князей, воеводъ, сотники, пятдесятники и десятники, ониже бы справовали васъ во всехъ делехъ вашихъ.
16 И приказахъ имъ, глаголя: “Послушайте их, и что справедливо естъ, судите кажному, домашнему и гостю,
17 да не будеть нияково розделение тварей. Такъ добре выслухайте малого, яко и великого, и не зрите имъ на лица, понеже судъ Божий ест. Пакли же бы что трудного виделося быти вамъ, поведите то мне и азъ розсужу”.
18 И поведехъ тогда вам вси речи, еже имели есте чинити.
19 По том пак, рушившися от Оревы, идохом по пустыни грозной и великой, юже видеша очи ваше, по пути горы Аморейское, якоже повеле намъ Господь, Богъ нашъ. И егда приидохом до Кадис-Варнии,
20 рекохъ вамъ: “Се пришли есмо к горе Аморейской, юже Господь, Богъ нашъ, дасть намъ.
21 Согледайте жъ землю, еюже владети имаете, и вниидите в ню, и приимите ю, якоже глаголал естъ Богъ отцемъ нашимъ. Не бойтеся никого и не страшитеся!”
22 Тогда приступисте ко мне вси и рекосте: “Пошлимо первей мужей, ониже да сходять землю и согледають ея, коимъ путемъ имамы вниити в ню и до коихъ градовъ”.
23 И полюбилися ми суть слова ваша, и послалъ есми дванадесеть мужей от кажного поколения единого.
24 Они же егда шли и възошли на горы, пришли суть даже до долины Грозновы, и согледавши землю,
25 взяша с собою от овощу ея, да бы ознамили, яко естъ плодна, и принесли к намъ и рекли: “Добра естъ земля, юже Господь, Богъ нашъ, даеть намъ”.
26 И не хотели есте вниити в ню, но, неверующи словом Божиимъ.
27 Роптасте во станехъ вашихъ, глаголюще: “Ненавидить насъ Богъ, протож и выведе нас из земли Египтское, абы предал нас в руце Амореаном и погубил нас.
28 Камо ити хощемъ? Послове и согледатаи наши застрашили суть серца наша, глаголюще: Великое естъ ихъ множество и вышшии, нежели мы, возрастомъ; грады великие и стены высокие, даже до небеси. И сыны Енаковы видели ксмо тамъ з роду волотовъ”.
29 И рекох вамъ: “Не бойтеся ихъ и не страшитеся,
30 Господь Богъ, Онже идеть пред нами, повоюеть за насъ, якоже учинилъ ест во Египте пред лицемъ нашим,
31 и во пустыни сей видящимъ всемъ вамъ, несяй васъ Господь, якоже носить человекъ отроча на руку своихъ во всехъ путехъ ваших, по нихже идосте, дондеже не приидосте на сее место.
32 Но и такъ не хотели есте верити Господу, Богу вашему,
33 Онже ходяше пред вами по пути, указуя вамъ места, на нихже имели есте станы розбити, и вказуя вам путь в ночи огнемъ, а во дни столпомъ облачнымъ”.
34 И егда услышал Господь гласъ словъ вашихъ, разгневался и клялся, глаголя:
35 “Не вниидеть никтоже от роду сего презлого до земли доброе, юже обещахъ под клятвою дати отцемъ ихъ,
36 кроме Калефа, сына Ефониина, той убо вниидеть и ему дам землю ту, по нейже ступалъ, и сыном его, яко наследовал ест Господа”.
37 И не естъ то дивное розгневание Божие на людей, понеже и на мя розгневася вас для и рече: “Ани ты вниидеши до земли;
38 но Ісусъ, отрокъ твой, сынъ Наввинъ, той вниидеть вместо тебе; того навчи и укрепи, той убо розделит землю по жребиехъ сыномъ Ізраилевымъ.
39 Дети младые ваше, о нихже рекосте, яко поимани будуть и поведены в неволю, ониже еще ныне не имають розознания межи добрымъ и злымъ, тии вниидуть и тым дамъ землю и владети будуть ею.
40 Вы же обратитеся опять въ пустыню и идите путемъ подле Чермнаго моря”.
41 Тогда отповедели есте мне, глаголюще: “Съгрешихомъ предъ Господемъ, Богомъ нашимъ, пойдемъ ныне и будемъ битися, якоже повеле намъ Богъ”. И егда, вземши кожный оружие свое, идоста к битве на гору,
42 рече ко мне Господь: “Глаголи имъ, да не воступують и ни воюють, яко несмь с ними, да не падуть предъ враги своими”.
43 И глаголахъ вамъ, а не послушасте мене, но противящеся словомъ Божиимъ, в гордости своей возыйдосте на гору.
44 Изыйдоша Амореане, живущии на горах, и поткавшися с вами, поразили вас и гонили, якоже гонят пчелы, и падосте от горы Сеиръ даже до Орма.
45 И егда навратистеся и плакасте предъ Господем, не послуша васъ и не принялъ молитвы вашее.
46 И протожъ пребысте в Кадис-Варнии за долгий часъ.
Знайшлі памылку ў тэксце? Вылучыце яе і націсніце:
Ctrl + Enter
Книги Втораго закону, 1 разьдзел
Звярніце ўвагу. Нумары вершаў — гэта спасылкі, якія вядуць на раздзел з параўнаннем перакладаў. Паспрабуйце, магчыма, вы будзеце прыемна здзіўлены.
Public Domain — народны здабытак.
2022, укладальнік — Бразгуноў Алесь.