Первые Царствъ 4 Первые Царствъ 4 разьдзел

¹ По словеси Господьню бысть слово Самуилово всему Ізраилю.a И бысть во днехъ тыхъ, собрашеся Филистымляне на брань, и сынове Ізраилевы вышли суть противу Филистымляномъ къ бою и ополъчишеся на месте, игдеже бе Камень Помощи. Филистымляне же приидоша на место Афетъ

² и устрояху ту полки на сыны Ізраилевы, и внегда почали ся бити, побежа Ізраиль предъ Филистымляны. И збито естъ мужовъ в той битве на розно, ту и вонде по полю, яко четыри тысещи.

³ И навратишеся людие до становъ своих, и рекоша старци Ізраилевы: «Прочто поразилъ насъ днесь Господь предъ Филистымляны? Принесмо к собе Кивот Завета Господьня от Силома, да приидет посреди насъ и спасеть насъ от руку враговъ наших».

⁴ Тогда послаша людие в Силомъ и взяша оттуду Кивотъ Завета Господа силамъ, седящего на херувиме. И беста оба сына Гелиина съ Кивотомъ Завета Господьня, Ефни и Финиисъ.

⁵ Внегда же принесенъ ест Кивотъ Завета Господьня до войска, возопиша вси сынове Ізраилеви гласом велиимъ, и возшуме земля.

⁶ И услышаша Филистымляне крикъ той, и реша: «Что се крикъ великий стался естъ въ полцехъ Еврейскыхъ?» И познаша, яко Кивотъ Господень принесоша до войска.

⁷ И убояшеся Филистымляне, глаголюще: «Богъ пришолъ ест въ полки их». И ламали собе руце, вопиюще: «Горе намъ! понеже не было таково веселие въ полцехъ вчера, ани предъ вчерашнимъ.

⁸ Горе нам! кто насъ избавить з руку богъ превышнихъ техъ? Сии суть бози, иже погубиша Египетъ язвами многыми въ пустыни.

⁹ Укрепитеся и будьте мужни, Филистымляне, да не поработаем Евреомъ, яко они поработали суть намъ; мужайтеся и воюйте».

¹⁰ И бишеся Филистымляне, и поразиша людей Ізраилевыхъ, и бежа кождый на село свое. И бысть побитие велие зело, тако, иже паде от людей Ізраилевыхъ тридесеть тысещей пеших,

¹¹ и Кивотъ Божий взятъ естъ, два сына Гелиины убиты суть, Ефний і Финиисъ.

¹² Тогда мужъ единъ от племеня Вениаминова, онже убежаше з бою, прибегъ въ Силомъ въ той день, растерзавъ на собе ризы, и прахомъ посыпалъ главу свою.b

¹³ И внегда онъ прииде, се, Гелий седяше на кресле прямо пути, ожидая, бе бо сердце его во ужасе велиемъ о Кивоте Божиемъ. Той же мужъ внегда вшолъ во градъ, возвести вся бывшая, и возпи весь градъ.

¹⁴ Услышавъ же Гелий крикъ и рече: «Який сее естъ гласъ крику сего?» Тогда посолъ той прибегъ и возвести Гелии;

¹⁵ а был Гелий деветьдесятъ и осмъ летъ, и очи его были пошли, и не можаше зрети.c

¹⁶ И рече къ Гелии: «Азъ есмъ днесь убежавый з бою и азъ есмъ пришедый днесь от полка». Ему же рече Гелий: «Яко ся стало, сыну мой?»

¹⁷ Отвеща ему посолъ и рече: «Бежаша мужи Ізраилевы предъ Филистымляны, и людей много избито, и сынове твои оба убиты сутьd, Ефний и Финеисъ, и Кивотъ Божий взятъ естъ».

¹⁸ И бысть, яко помянулъ онъ о Кивоте Божием, спаде Гелий съ кресла възнакъ ко дверемъ, и зломивъ шию, умре, старъ убо бе мужъ и долговеченъ. І той судилъ людей Ізраилевыхъ четыредесятъ летъ.

¹⁹ Невестка же его, жена Финеисова, бременна была и близу породу; услышавши, яко взятъ бысть Кивотъ Божий и умре свекоръ ея и мужъ ея, склонилася и породила, понеже нападоша на ню нагле болезни ея.

²⁰ И во время то, внегда умирала, рекоша к ней предъстоящие жены:e «Не бойся, яко сына родила еси». И не отвеща им, и не поразуме тому,

²¹ и прозва отроча Іхавоф, глаголюще: «Пренесена ест слава Господьня от Ізраиля», понеже взят ест Кивот Божий.

²² И о свекру и о мужи своем рече: «Пренесеся слава Господьня от Ізраиля, яко взят ест Кивот Божій».