1 да тэссалёнцаў 4 1 да тэссалёнцаў 4 разьдзел

¹ А ў канцы, просім вас, браты, і благаем праз Езуса Хрыстуса, каб вы прынятае ад нас: як належыцца вам паступаць Богу на ўпадобу далей у сабе разьвівалі,

² хібаж помніце якіе прыказанні далі мы вам ад Езуса Хрыстуса.

³ Гэта бо воля Божая, асьвята вашая, каб высьцярагаліся вы распусты,

⁴ каб кожны з вас умеў захоўваць сваё цела ў пашане і сьвятасьці,

⁵ а не ў юрлівай пажадлівасьці, як і пагане, што Бога ня знаюць;

⁶ не выкарыствайце праступна ў гэтай справе, ня крыўдзьце брата свайго, бо мсьціўцам за ўсё гэта будзе Госпад, як і раней мы гэта вясьцілі вам ды засьветчвалі.

⁷ Бог бо нас паклікаў не да нячыстасьці, але да сьвятасьці.

⁸ Таму восьжа, хто на гэта не зважае, той не чалавека, а Бога зьняважае, што даў нам і Духа Святога.

⁹ Аб любасьціж братняй няма патрэбы пісаць вам, бо вы самі навучаные Богам любіцца пабрацку,

¹⁰ дый вы гэтак і паступаеце адносна ўсіх братоў у цэлай Макэдоніі. Але просім, дасягайце ў гэтым, браткі, большага поступу.

¹¹ Шчыра дбайце аб тое, каб жыць ціха ў дружалюбным супакоі, пільнуючы свайго дзела й працуючы ўласнаручна, як мы наказвалі вам,

¹² каб вы прыстойна паступалі перад пастароннымі, ад нікога не патрабуючы запамогі.

¹³ Ня хочам пакінуць вас, браты, ў нясьведамасьці аб тых, што сьмяротна уснулі, каб ня тужылі вы, як іншые, не маючые надзеі.

¹⁴ Бо, калі мы верым, што Езус умёр і згробуўстаў, дык і ўмёршых у Езусе Хрыстусе Бог прывядзе зь Ім.

¹⁵ Гэта кажам вам водле слоў Госпада, што мы жывые, якіе застанёмся да прыйсьця Усеспадара, не апярэдзім тых, што уснулі.

¹⁶ Сам бо Госпад на даны сыгнал, на голас Арханёла ды гук сурмы Божай зыйдзе зь неба і умерлые ў Хрыстусе згробуўстануць першымі;

¹⁷ пасьля мы, якіе жывымі застаёмся, разам зь імі падхоплены будзем на аблокі ў паветра на спатканне Хрыстуса ды гэтак назаўсёды зь Ім застанёмся.

¹⁸ Пацяшайце восьжа адзін другога славамі гэтымі.