Да Каласянаў 3 разьдзел

 

 

Калі ж вы ўваскрэслі з Хрыстом, шукайце таго, што ў вышынях, дзе Хрыстус сядзіць праваруч Бога;

 

Дык, калі вы ўскрэсьлі з Хрыстом, шукайце-ж узгорнага, гдзе́ Хрыстос сядзіць праваруч Бога;

пра тое, што ў вышынях, думайце, а не пра зямное,

 

аб узгорным думайце, а не аб зямным,

бо вы памерлі, і жыццё вашае схавана з Хрыстом у Богу!

 

бо вы паме́рлі, і жыцьцё вашае пахавана з Хрыстом у Богу;

Калі ж з’явіцца Хрыстус, жыццё вашае, тады і вы з’явіцеся разам з Ім у хвале.

 

калі-ж зьявіцца Хрыстос, жыцьцё вашае, тагды і вы зьявіцеся разам з Ім у славе.

Таму зрабіце мёртвым тое, што зямное ў целе вашым: распусту, нячыстасць, пажадлівасць, дрэнныя памкненні і хцівасць, якая з’яўляецца ідалапаклонствам.

 

Дык мярцьвіце чле́ны вашыя, што на зямлі: блуд, нячыстасьць, юр, благое пажаданьне і хцівасьць, якая ёсьць балванахвальства,

З-за гэтых рэчаў гнеў Божы сыходзіць на сыноў непаслухмянасці,

 

за што гне́ў Божы прыходзіць на сыноў няслухмянства,

сярод якіх і вы калісьці хадзілі, калі жылі сярод іх.

 

сярод якіх і вы калісь хадзілі, як жылі міжы імі.

Цяпер жа і вы адкіньце гэта ўсё: гнеў, абурэнне, злосць, блюзнерства, зласлоўе з вуснаў вашых.

 

А цяпе́р і вы адкіньце ўсё: гне́ў, ярасьць, злосьць, лаянку, сорамныя словы з вуснаў вашых;

Не хлусіце адзін аднаму, бо вы знялі з сябе старога чалавека разам з ягонымі ўчынкамі

 

не брашыце адзін аднаму, скінуўшы з сябе́ старога чалаве́ка з учынкамі яго

і апрануліся ў новага, які абнаўляецца для пазнання паводле вобраза таго, хто стварыў яго.

 

і апрануўшыся ў новага, які абнаўляецца ў пазнаньні на ўзор Стварыўшага яго,

І тут ужо няма ні грэка, ні юдэя, ні абразання, ні адсутнасці абразання, ні чужаземца, ні скіфа, ні нявольніка, ні свабоднага, але ўсё і ва ўсім — Хрыстус.

 

гдзе́ няма Грэка і Юдэя, абрэзаньня і неабрэзаньня, барбара, Скіфа, раба, свабоднага, але ўсё і ў-ва ўсім Хрыстос.

Апраніцеся ж як выбранцы Божыя, святыя і ўмілаваныя, у шчырую міласэрнасць, лагоднасць, пакору, далікатнасць, доўгацярплівасць,

 

Дык апране́цеся, як выбранцы Божыя, сьвятыя і ўмілаваныя, міласэрдзем, дабратой, ціхой мудрасьцяй, ласкавасьцяй, доўгацярплівасьцяй,

церпячы адзін аднаго і даруючы сабе ўзаемна, калі хто на каго мае крыўду; як Пан дараваў вам, так і вы.

 

це́рпячы адзін аднаго і выбачаючы сабе́, калі хто да каго ма́е жаль: як Хрыстос дараваў вам, гэтак і вы.

А па-над усім гэтым апраніцеся ў любоў, якая ёсць повяззю дасканаласці.

 

А па-над усім — (апрануўшыся) любоўю, якая ёсьць злучэньне дасканаласьці,

І няхай валадарыць у сэрцах вашых спакой Хрыстовы, да якога вы пакліканыя ў адным целе. І будзьце ўдзячнымі.

 

і няхай у сэрцах вашых гаспадаруе мір Божы, да якога вы і пакліканы ў адным це́ле; ды будзьце ўдзячнымі.

Слова Хрыста няхай жыве ў вас ва ўсёй паўнаце, з усёй мудрасцю навучайце і настаўляйце адзін аднаго псальмамі, гімнамі і духоўнымі песнямі, з удзячнасцю спяваючы ў сэрцах вашых Богу.

 

Слова Хрыстовае няхай асядае ў вас багата, у ўсякай мудрасьці: навучайце і настаўляйце адзін аднаго псальмамі і гымнамі і духоўнымі пе́сьнямі, у ласцы сьпяваючы ў сэрцах вашых Госпаду.

І ўсё, што б вы ні рабілі словам ці ўчынкам, усё рабіце ў імя Пана Езуса, дзякуючы праз Яго Богу Айцу.

 

І ўсё, што-б вы ні рабілі, словам або дзе́лам, усё рабе́це ў імя Госпада Ісуса Хрыста, дзякуючы праз Яго Богу і Айцу.

Жонкі, падпарадкоўвайцеся мужам, як належыць у Пану.

 

Жонкі, слухайцеся мужоў вашых, як прыстойна ў Госпадзе.

Мужы, кахайце жонак і не будзьце суровымі да іх.

 

Мужы, любе́це жанок і ня будзьце для іх прыкрымі.

Дзеці, будзьце паслухмянымі бацькам ва ўсім, бо гэта падабаецца Пану.

 

Дзе́ці, будзьце паслухмянымі бацьком у-ва ўсім, бо гэтае ўгодна Госпаду.

Айцы, не раздражняйце дзяцей вашых, каб яны не падалі духам.

 

Айцы, не раздражняйце дзяце́й вашых, каб яны не ўпадалі на духу.

Нявольнікі, падпарадкоўвайцеся ва ўсім сваім гаспадарам паводле цела, служыце ім не для выгляду, нібы жадаючы спадабацца людзям, але ад шчырага сэрца, баючыся Пана.

 

Рабы, у ўсім слухайцеся паноў водле це́ла, паслугуючы не на вачох толькі, як дагаджаючы людзям, але ў прастаце́ сэрца, баючыся Бога.

Усё, што б вы не рабілі, рабіце ад душы, як для Пана, а не для людзей,

 

І ўсё, што-б ні рабілі, рабе́це ад душы, як для Госпада, а не для людзе́й,

ведаючы, што ад Пана атрымаеце ва ўзнагароду спадчыну. Будзьце нявольнікамі Хрыста Пана.

 

ве́даючы, што ад Госпада атрымаеце нагароду спадчыны: бо служыце Госпаду Хрысту.

Той, хто робіць крыўду, расплаціцца за зробленую крыўду, без увагі на яго асобу.

 

А хто крыўдзіць, атрымае водле зробленае крыўды: бо няма ў Бога ўзіраньня на аблічча.