Да Піліпянаў 4 разьдзел

 

 

Дык вось, браты мае ўзлю́бленыя і жаданыя, радасць і вянец мой, стойце так у Госпадзе, узлю́бленыя.

 

Так што, браты мае ўлюбёныя і пажаданыя, радасьць і вянок мой, стойце так у Госпадзе, улюбёныя.

Ево́дзію прашу і Сінцíхію прашу быць аднадумнымі ў Госпадзе;

 

Эўводзію прашу і Сынтыхею прашу думаць гэтаксама ў Госпадзе.

ды і цябе прашу, верны дружа, дапамагай ім, бо яны за дабравесце змагаліся разам са мною, і з Клíментам, і з аста́тнімі супрацоўнікамі маімі, чые імёны — у кнізе жыцця.

 

Прашу і цябе, шчыры памочніку, дапамагай тым, якія змагаліся дзеля Эвангельля разам са мною, і з Клемэнтам, і з іншымі супрацоўнікамі маімі, імёны якіх у кнізе жыцьця.

Радуйцеся заўсёды ў Госпадзе; і зноў кажу: радуйцеся.

 

Радуйцеся заўсёды ў Госпадзе. Ізноў кажу: радуйцеся.

Дабразычлівасць ваша няхай будзе вядома ўсім лю́дзям. Гасподзь блізка.

 

Спагаднасьць вашая няхай будзе вядомая ўсім людзям. Госпад блізка!

Ні аб чым не турбуйцеся, а заўсёды ў малітве і маленні з падзякаю адкрывайце свае жаданні Богу,

 

Не турбуйцеся ні пра што, але ў-ва ўсякай малітве і просьбе з падзякай няхай адкрываюцца жаданьні вашыя перад Богам,

і мір Божы, вышэйшы за ўсякі розум, будзе захоўваць сэрцы вашы і думкі вашы ў Хрысце Іісусе.

 

і супакой Божы, які вышэй за ўсякі розум, няхай захавае сэрцы вашыя і думкі вашыя ў Хрысьце Ісусе.

Урэшце, браты, толькі пра тое, што́ ісціннае, што́ пачэснае, што́ праведнае, што́ чыстае, што́ лю́бае, што́ прыемнае, што́ дабрадзейнае і што́ вартае хвалы, — вось пра што разважа́йце.

 

Нарэшце, браты, што ёсьць праўдзівае, што сумленнае, што справядлівае, што чыстае, што вартае любові, што добрай славы, калі ёсьць якая цнота і якая пахвала, — пра тое думайце.

Чаму вы навучыліся, і што перанялí, і пачулі, і ўбачылі ўва мне, тое і выконвайце, — і Бог міру будзе з вамі.

 

І чаго вы навучыліся, і што прынялі, і чулі, і бачылі ў-ва мне, тое рабіце, і Бог супакою будзе з вамі.

Я ж вельмі ўзрадаваўся ў Госпадзе, што вы нарэшце зноў пачалі клапаціцца пра мяне; вы і раней клапаціліся, але ў вас не было ўмоў.

 

Я вельмі ўзрадаваўся ў Госпадзе, што вы ўжо зноў ажывіліся, каб думаць пра мяне, як і раней думалі, ды ня мелі нагоды.

Не з-за нястачы гэта кажу, бо я навучыўся быць здаволеным тым, што ёсць:

 

Ня дзеля таго, што я ў нястачы, кажу, бо я навучыўся быць задаволеным тым, што ў мяне ёсьць.

умею жыць і ў беднасці, умею жыць і ў дастатку; ўсяму і ва ўсім я наву́чаны: і сы́тым быць, і галодным, быць і ў дастатку, і ў нястачы;

 

Ведаю, як у паніжэньні быць, і ведаю, як у дастатку; навучыўся ўсяго і ў-ва ўсім: і насычацца, і галадаваць, мець і дастатак, і нястачу.

усё магу ў Іісусе Хрысце, Які ўмацоўвае мяне.

 

Усё магу ў Хрысьце, Які ўмацоўвае мяне.

Аднак вы добра зрабілі, што паздялíлі са мною мой цяжар.

 

Па-за гэтым, вы добра зрабілі, што ўдзельнічалі ў маім прыгнёце.

Вы ж ведаеце, Філіпійцы, што на пачатку дабравесця, калі я выйшаў з Македоніі, ніводная царква не прымала ўдзелу ў тым, што́ я выдаткоўваў і атрымліваў, апрача вас адных;

 

Вы ж ведаеце, Філіпяне, што на пачатку [абвяшчэньня] Эвангельля, калі я выйшаў з Македоніі, ніводная царква не далучылася да мяне праз дораньне і прыняцьцё, акрамя вас адных.

бо вы і ў Фесалоніку і раз, і другі дасылалі мне на патрэбы.

 

Вы і ў Тэсалоніку і раз, і два пасылалі паводле патрэбы маёй.

Гэта не значыць, што я шукаю дару; але плоду я шукаю, які памнажаецца на карысць вам.

 

Ня тое, каб я шукаў дару, але шукаю плоду, які памнажаецца на вашу карысьць.

Я ма́ю ўсё і ма́ю ўдосталь; я поўнасцю забяспе́чаны, атрымаўшы ад Эпафрадыта пасла́нае вамі, як пах духмяны, як ахвяру прыемную, што даспадобы Богу.

 

Я маю ўсё і маю дастатак; я напоўнены, атрымаўшы ад Эпафрадыта тое, што ад вас, водар салодкі, ахвяру прыемную, якая падабаецца Богу.

Бог жа мой няхай задаволіць усякую патрэбу вашу паводле багацця Свайго ў славе, у Хрысце Іісусе.

 

А Бог мой няхай напоўніць усякую патрэбу вашую паводле багацьця Свайго ў славе, у Хрысьце Ісусе.

А Богу і Айцу нашаму слава на векі вякоў! Амінь.

 

Богу ж і Айцу нашаму слава на вякі вякоў. Амэн.

Вітайце кожнага святога ў Хрысце Іісусе. Вітаюць вас браты, якія са мною.

 

Прывітайце кожнага сьвятога ў Хрысьце Ісусе. Вітаюць вас браты, што са мною.

Вітаюць вас усе святыя, і асабліва з кесаравага дома.

 

Вітаюць вас усе сьвятыя, а найбольш тыя, што з дому цэзара.

Благадаць Госпада нашага Іісуса Хрыста з усімі вамі. Амінь.

 

Ласка Госпада нашага Ісуса Хрыста з усімі вамі. Амэн.