1 Навратися, навратися, умиреная, навратися, навратися, насмотримся тебе. Што смотрите на умиреную, яко въ танечницу маханаимъ.
2 Коль красны ступени твои, дочко княжатьска, завиваніе коленъ твоих якожь ретязи, дело рукъ мастера.
3 Пупокъ твои кругъ месячии не убудеть слияніе, чрево твое ворохъ пшеници, огорожонъ въ рожах.
4 Две перси твои якожь два оленята, близньци ланьины.
5 Шия твоя яко вежа зубовая, очи твои ставы въ Хежбоне на воротехъ дочкы велебных, носъ твой яко вежа ливанова взираеть на Дамаскъ.
6 Голова твоя на тобе яко ядро, а пупець головы твоеи яко багоръ царь инятыи у приристаньехъ.
7 Коль красна еси и коль удячна еси, милостная въ коханьи.
8 Обо станъ твой подобенъ фунику, а перси твои къ гроздом.
9 Реклъ есмь: Възыду на фуникъ и иму за присады его, и будуть южь перси твои грозды винныи, а запахъ ноздреи твоихъ яко яблока.
10 Небцо твое яко вино доброе, идеть милостному моему, на прямость подвигаеть уста спячіи.
11 Я — милостному моему, а на мя ласка его.
12 Поиди, милостныи мой, выидемъ на поле, обитуемъ въ амбарехъ.
13 Поранимься къ виноградомъ и узримъ, чи процвело винищо, чи отворилися розинкы чистыи, чи оцвели маркграмы, тамъ здамъ ласку мою тобе.
14 Адиолы пускають запахъ на дверехъ наших, вси слодости новыи и ветшаныи, милостныи мой, доховала есми тобе.
Знайшлі памылку ў тэксце? Вылучыце яе і націсніце:
Ctrl + Enter
Песьня Песьняў, 7 разьдзел
Звярніце ўвагу. Нумары вершаў — гэта спасылкі, якія вядуць на раздзел з параўнаннем перакладаў. Паспрабуйце, магчыма, вы будзеце прыемна здзіўлены.