1 Где пошолъ милостникъ твои, наикрашьшая в женахъ, гдесе оборотился милостныи твои, и будем искати его с тобою.
2 Милостныи мои пошолъ къ огороду своему, къ гряде зелеинои кормитися въ огородехъ и збирати рожи.
3 Я — милостнику моему, а милостникъ мои — мне, што кормится в рожахъ.
4 Красна еси, подруго моя, какъ Тирца, подобна, какъ иерусолимъ, страшна, яко въоруженыи.
5 Отверни очи свои от противъ мене, заиже они згордели мне. Волосы твои яко стада козъ, што очесалися о Геладъ.
6 Зубы твои какъ стада овець, што възышли от умыванія, вси они близньчаты, а изверглое нетъ в нихъ.
7 Якожь половина маръкграму голубець твои от зада косици твоеи.
8 Шестьдесять ихъ кролевых, а 80 меншиць, а молодиць нетъ чісла.
9 Одна она, голубице моя, полнице моя, одна она матери своеи чиста родителници своеи. Видели ее дочкы и велбили ее, а кролевыи и меншици похвалили ее.
10 Которая се осмотреетца яко зоря, красна, яко луна, чиста, яко солнце, страшна, яко въоруженыи.
11 Къ огороду ореховому възышелъ есми видети въ овощох потоковъ и видети, чи процвело винищо, чи зацвели маръгкрамы.
12 Не ведахъ, духно моя положила мя въ колымагах князя людей моихъ.
Знайшлі памылку ў тэксце? Вылучыце яе і націсніце:
Ctrl + Enter
Песьня Песьняў, 6 разьдзел
Звярніце ўвагу. Нумары вершаў — гэта спасылкі, якія вядуць на раздзел з параўнаннем перакладаў. Паспрабуйце, магчыма, вы будзеце прыемна здзіўлены.