Лікі 26 разьдзел

Лікі
Пераклад Антонія Бокуна → Пераклад Чарняўскага 2017

 
 

І сталася пасьля гэтай плягі, і сказаў ГОСПАД Майсею і Элеазару, сыну Аарона сьвятара, кажучы:
 
Пасля гэтай плягі сказаў Госпад Майсею і Элеязэру, сыну Аарона святара:

«Палічыце лічбу ўсёй грамады сыноў Ізраіля ад дваццаці гадоў і вышэй паводле дамоў бацькоў іхніх, усіх, здольных да бою».
 
«Палічыце ўсю колькасць грамады сыноў Ізраэля ад дваццаці гадоў і вышэй па сем’ях і родах іх, усіх, здатных ваяваць».

І прамовілі Майсей і Элеазар сьвятар на раўнінах Мааву, насупраць Ерыхону, над Ярданам, кажучы:
 
Такім чынам, Майсей і святар Элеязэр сказалі гэта на раўнінах Мааба, насупраць Ерыхона, над Ярданам

«[Палічыце ўсіх] ад дваццаці гадоў і вышэй, як ГОСПАД загадаў Майсею і сынам Ізраіля, якія выйшлі з зямлі Эгіпецкай».
 
тым, хто меў ад дваццаці гадоў і вышэй, як Госпад загадаў Майсею. Вось колькасць сыноў Ізраэля, якія выйшлі з зямлі Егіпецкай:

Рубэн, першародны Ізраіля. Сыны Рубэна: Ханох, ад якога сям’я Ханоха, і Пальлю, ад якога сям’я Пальлю,
 
Рубэн першародны Ізраэля. Сыны Рубэна: Гэнох, ад якога род Гэноха, і Паллю, ад якога род Паллю,

і Хецрон, ад якога сям’я Хецрона, і Кармі, ад якога сям’я Кармі.
 
і Хэцрон, ад якога род Хэцрона, і Хармі, ад якога род Хармі.

Гэта сем’і [пакаленьня] Рубэна, і было палічана іх сорак тры тысячы семсот трыццаць.
 
Гэта роды з пакалення Рубэна, колькасць іх дасягае сарака трох тысяч сямісот трыццаці.

Сыны Пальлю: Эліяў,
 
Сыны Паллю: Эліяб.

а сыны Эліява: Нэмуэль, Датан і Абірам. Датан і Абірам — гэта тыя пакліканыя грамадою, якія збунтаваліся супраць Майсея і Аарона разам з Карахам, калі яны паднялі бунт супраць ГОСПАДА,
 
Яго сыны: Намуэль, Датан і Абірам. Датан і Абірам — гэта тыя князі народа, якія ўзбунтаваліся супраць Майсея і Аарона ў час бунту Корэ, калі яны паднялі бунт супраць Госпада,

і зямля разьзявіла вусны свае, і праглынула іх і Караха, і паўмірала грамада, калі агонь спаліў дзьвесьце пяцьдзясят чалавек, і сталіся яны знакам.
 
і зямля адкрыла вусны свае і праглынула іх і Корэ, і паўміралі многія, калі агонь спаліў дзвесце пяцьдзесят чалавек; і сталі яны знакам [перасцярогі].

Але сыны Караха не памерлі.
 
Хаця Корэ памёр, але сыны яго не загінулі.

Сыны Сымона паводле сем’яў іхніх: ад Нэмуэля [паходзіць] сям’я Нэмуэля; ад Яміна — сям’я Яміна; ад Яхіна — сям’я Яхіна,
 
Сыны Сімяона па іх родах: Намуэль, ад якога паходзіць род Намуэля; Ямін, ад якога — род Яміна; Яхін, ад якога — род Яхіна;

ад Зэраха — сям’я Зэраха; ад Шаўля — сям’я Шаўля.
 
Зара, ад якога — род Зары; Саўл, ад якога — род Саўла.

Гэта сем’і [пакаленьня] Сымона, дваццаць дзьве тысячы дзьвесьце.
 
Гэта роды з пакалення Сімяона, агульная колькасць якіх — дваццаць дзве тысячы дзвесце.

Сыны Гада паводле сем’яў іхніх: Цэфон, ад якога сям’я Цэфона; Хаггі, ад якога сям’я Хаггі; Шуні, ад якога сям’я Шуні,
 
Сыны Гада па сваіх родах: Сэфон, ад якога — род Сэфона; Хагі, ад якога — род Хагі; Шуні, ад якога — род Шуні,

Озьні, ад якога сям’я Озьні; Эры, ад якога сям’я Эры,
 
Озні, ад якога — род Озні; Эры, ад якога — род Эры,

Арод, ад якога сям’я Арода; Арыэль, ад якога сям’я Арыэля.
 
Арод, ад якога — род Арода; Арэлі, ад якога — род Арэлі.

Гэта сем’і сыноў Гада, іх палічана сорак тысячаў пяцьсот.
 
Гэта роды Гада, агульная колькасць якіх — сорак тысяч пяцьсот.

Сыны Юды: Ер і Янан, але яны абодва памерлі ў зямлі Ханаан.
 
Сыны Юды: Гэр і Анан, яны абодва памерлі ў зямлі Ханаан.

Вось сыны Юды паводле сем’яў іхніх: Шэля, ад якога сям’я Шэлі; Пэрэс, ад якога сям’я Пэрэса; Зэрах, ад якога сям’я Зэраха.
 
Вось сыны Юды па іх родах: Шэла, ад якога — род Шэлы; Пэрэс, ад якога — род Пэрэса; Зара, ад якога — род Зары.

А вось сыны Пэрэса: Хецрон, ад якога сям’я Хецрона, і Хамуль, ад якога сям’я Хамуля.
 
А вось сыны Пэрэса: Эсром, ад якога — род Эсрома: Гамул, ад якога — род Гамула.

Гэта сем’і Юды, іх палічана семдзясят шэсьць тысячаў пяцьсот.
 
Гэта роды Юды, агульная колькасць якіх — семдзесят шэсць тысяч пяцьсот.

Сыны Ісахара паводле сем’яў іхніх: Толя, ад якога сям’я Толі; Пува, ад якога сям’я Пувы;
 
Сыны Ісахара па родах сваіх: Тола, ад якога — род Толы; Пува, ад якога — род Пувы;

Яшуў, ад якога сям’я Яшува; Шымрон, ад якога сям’я Шымрона.
 
Ясуб, ад якога — род Ясуба; Сэмрон, ад якога — род Сэмрона.

Гэта сем’і Ісахара, палічана іх шэсьцьдзясят чатыры тысячы трыста.
 
Такія роды Ісахара, агульная колькасць якіх — шэсцьдзесят чатыры тысячы трыста.

Сыны Завулёна паводле сем’яў іхніх: Сэрэд, ад якога сям’я Сэрэда; Элён, ад якога сям’я Элёна; Яхлеэль, ад якога сям’я Яхлеэля.
 
Сыны Забулона па іх родах: Сарэд, ад якога — род Сарэда; Элон, ад якога — род Элона; Яхэлэль, ад якога — род Яхэлэля.

Гэта сем’і Завулёна, палічана іх шэсьцьдзясят тысячаў пяцьсот.
 
Гэта роды Забулона, агульная колькасць якіх — шэсцьдзесят тысяч пяцьсот.

Сыны Язэпа паводле сем’яў іхніх: Манаса і Эфраім.
 
Сыны Язэпа па іх родах: Манаса і Эфраім.

Сыны Манасы: Махір, ад якога сям’я Махіра; Махір нарадзіў Гілеада, ад якога сям’я Гілеада.
 
З Манасы нарадзіўся Махір, ад якога — род Махіра; Махір быў бацькам Галаада, ад якога — род Галаада.

Сыны Гілеада: Езэр, ад якога сям’я Езэра; Хэлек, ад якога сям’я Хэлека;
 
Галаад меў сыноў: Язэра, ад якога — род Язэра; і Гэлека, ад якога — род Гэлека;

Асрыэль, ад якога сям’я Асрыэля; Мэхем, ад якога сям’я Мэхема,
 
і Асрыэля, ад якога — род Асрыэля; і Сэхема, ад якога — род Сэхема,

Шэміда, ад якога сям’я Шэміды; Хэфэр, ад якога сям’я Хэфэра.
 
і Сэміда, ад якога — род Сэміда; і Хэфэр, ад якога — род Хэфэра.

А Цэлафхад, сын Хэфэра, ня меў сыноў, а толькі дочак, а імёны дочак Цэлафхада: Махля, Ноа, Хогля, Мілька і Тырца.
 
Хэфэр быў бацькам Салпаада, які не меў сыноў, а толькі дачок, імёны якіх: Маала, Ноа, Хэгла, Мэлха і Тэрса.

Гэта сем’і Манасы, іх падлічана пяцьдзясят дзьве тысячы семсот.
 
Гэта роды Манасы, і колькасць іх — пяцьдзесят дзве тысячы семсот.

Гэта сыны Эфраіма паводле сем’яў іхніх: Шутэлях, ад якога сям’я Шутэляха; Бэхэр, ад якога сям’я Бэхэра; Тахан, ад якога сям’я Тахана.
 
А Эфраіма сыны па іх родах былі такія: Сутала, ад якога — род Суталы; Бэхэр, ад якога — род Бэхэра; Тэхен, ад якога — род Тэхена.

А гэта сыны Шэтэляха: Эран, ад якога сям’я Эрана.
 
Далей сынам Суталы быў Эран, ад якога — род Эрана.

Гэта сем’і сыноў Эфраіма, палічана іх трыццаць дзьве тысячы пяцьсот. Гэта сыны Язэпа паводле сем’яў сваіх.
 
Такія роды сыноў Эфраіма, колькасць якіх — трыццаць дзве тысячы пяцьсот. Яны нашчадкі Язэпа па сваіх родах.

Сыны Бэн’яміна паводле сем’яў іхніх: Бэля, ад якога сям’я Бэлі; Ашбэль, ад якога сям’я Ашбэля; Ахірам, ад якога сям’я Ахірама;
 
Сыны Бэньяміна па родах сваіх: Бэла, ад якога — род Бэлы; Асбэл, ад якога — род Асбэла; Ахірам, ад якога — род Ахірама;

Шэфуфам, ад якога сям’я Шэфуфама; Хуфам ад якога сям’я Хуфама.
 
Супам, ад якога — род Супама; Хупам, ад якога — род Хупама.

І былі сыны Бэлі: Ард і Нааман; ад Арда [паходзіць] сям’я Арда, ад Наамана — сям’я Наамана.
 
Сыны Бэлы: Арэд і Нааман; ад Арэда паходзіць род Арэда, ад Наамана — род Наамана.

Гэта сыны Бэн’яміна паводле сем’яў сваіх, палічана іх сорак пяць тысячаў шэсьцьсот.
 
Гэта — сыны Бэньяміна па родах сваіх, колькасць іх — сорак пяць тысяч шэсцьсот.

Гэта сыны Дана паводле сем’яў іхніх: Шухам, ад якога сям’я Шухама. Гэта сем’і Дана паводле сем’яў сваіх;
 
Сыны Дана па сваіх родах: Сухам, ад якога — род Сухама; гэта — роды Дана па сваіх пакаленнях:

усе яны сям’я Шухама, палічана іх шэсьцьдзясят чатыры тысячы чатырыста.
 
усе былі сыны Сухама, колькасць іх — шэсцьдзесят чатыры тысячы чатырыста.

Сыны Асэра паводле сем’яў іхніх: Імна, ад якога сям’я Імны; Ішві, ад якога сям’я Ішві; Бэрыя, ад якога сям’я Бэрыі.
 
Сыны Асэра па родах іх: Емна, ад якога — род Емны; Ішві, ад якога — род Ішві; Бэрыя, ад якога — род Бэрыі.

Сыны Бэрыі: Хэвэр, ад якога сям’я Хэвэра; і Малькіэль, ад якога сям’я Малькіэля.
 
Сыны Бэрыі: Гебэр, ад якога — род Гебэра, і Мэлхіэль, ад якога — род Мэлхіэля.

А імя дачкі Асэра — Сэраха.
 
А дачкі Асэра імя было Сараі.

Гэта сем’і сыноў Асэра, палічана іх пяцьдзясят тры тысячы чатырыста.
 
Гэта — роды сыноў Асэра, колькасць іх — пяцьдзесят тры тысячы чатырыста.

Сыны Нэфталі паводле сем’яў іхніх: Яхцэль, ад якога сям’я Яхцэля; Гуні, ад якога сям’я Гуні;
 
Сыны Нэфталі па іх родах: Ясіэль, ад якога — род Ясіэля; Гуні, ад якога — род Гуні;

Ецэр, ад якога сям’я Ецэра; Шылем, ад якога сям’я Шылема.
 
Язэр, ад якога — род Язэра, Шылем, ад якога — род Шылема.

Гэта сем’і Нэфталі паводле сем’яў сваіх, палічана іх сорак пяць тысячаў чатырыста.
 
Гэта — роды сыноў Нэфталі па сваіх пакаленнях, колькасць іх — сорак пяць тысяч чатырыста.

Гэта лічба сыноў Ізраіля: шэсьцьсот адна тысяча семсот трыццаць.
 
Агульная колькасць сыноў Ізраэля, што былі палічаны, — шэсцьсот адна тысяча семсот трыццаць.

І прамовіў ГОСПАД да Майсея, кажучы:
 
Потым сказаў Госпад Майсею, кажучы:

«Паміж імі будзе падзелена зямля ў спадчыну паводле лічбы імёнаў.
 
«Паміж імі будзе падзелена зямля на ўласнасць паводле ліку імёнаў.

Больш шматлікім павялічыш спадчыну іхнюю; менш шматлікім паменшыш спадчыну іхнюю; кожнаму асобна, паводле сьпісу, будзе дадзена спадчына.
 
Больш шматлікім большую частку дасі; менш шматлікім — меншую; і кожнаму асобна, як цяпер яны былі палічаны, будзе дадзена уласнасць;

Зямля павінна быць падзелена жэрабям, і спадчыну атрымаюць паводле [лічбы] імёнаў у родах бацькоў іхніх.
 
зямля павінна быць падзелена жэрабем. Спадчыну маюць атрымаць паводле колькасці пакаленняў бацькоў сваіх.

Жэрабям будзе падзеленая спадчына паміж шматлікімі і малалікімі [сем’ямі]».
 
Жэрабем трэба падзяліць уласнасць між вялікімі і малымі родамі».

А гэта лічба лявітаў паводле сем’яў іхніх: Гершон, ад якога сям’я Гершона; Кегат, ад якога сям’я Кегата; і Мэрары, ад якога сям’я Мэрары.
 
А гэта колькасць сыноў Леві па іх родах: Гэрсон, ад якога — род Гэрсона; Кагат, ад якога — род Кагата; Мэрары, ад якога — род Мэрары.

Гэта сем’і Левія: сям’я Лібні, сям’я Хеўрона, сям’я Махлі, сям’я Мушы, сям’я Караха. І Кегат нарадзіў Амрама.
 
Гэта — роды Леві: род Лобні, род Геброна, род Махалі, род Мусі, род Корэ. Кагат жа быў бацькам Амрама,

Імя жонкі Амрама — Ёкэбэд, дачка Левія, якая нарадзілася Левію ў Эгіпце. Яна нарадзіла Амраму Аарона і Майсея, і сястру іхнюю Мірыям.
 
які меў жонку Ёхабэд, дачку Леві, якая нарадзілася яму ў Егіпце. Яна нарадзіла Амраму, мужу свайму, сыноў Аарона і Майсея і сястру іх Мірыям.

І нарадзіліся Аарону сыны: Надаў, Абігу, Элеазар і Ітамар.
 
Аарон меў сыноў: Надаба, Абігу, Элеязэра і Ітамара,

Але Надаў і Абігу памерлі, калі прынесьлі чужы агонь перад аблічча ГОСПАДА.
 
з якіх Надаб і Абігу памерлі, калі прынеслі чужы агонь перад аблічча Госпада.

І ўсіх было палічана іх дваццаць тры тысячы мужчынаў ад аднаго месяца і вышэй. Яны не палічаныя сярод сыноў Ізраіля, бо ня дадзена ім спадчына сярод сыноў Ізраіля.
 
І ўсіх, каго палічылі, было дваццаць тры тысячы мужчын ад аднаго месяца і вышэй; бо яны не былі палічаны сярод сыноў Ізраэля і не была дадзена ім уласнасць разам з іншымі.

Гэта палічаныя Майсеем і Элеазарам сьвятаром, якія палічылі сыноў Ізраіля на раўнінах Мааву над Ярданам насупраць Ерыхону.
 
Гэта колькасць сыноў Ізраэля, пералічаных Майсеем і Элеязэрам святаром на раўнінах Мааба, над Ярданам, насупраць Ерыхона;

Між імі не было нікога з тых, якіх лічылі Майсей і Аарон сьвятар, калі лічылі сыноў Ізраіля ў пустыні Сынай,
 
між імі не было нікога з тых, каго Майсей і Аарон лічылі ў пустыні Сінай:

бо сказаў ім ГОСПАД, што яны сьмерцю памруць у пустыні, і не застанецца з іх аніводнага, апрача Халева, сына Ефунны, і Егошуа, сына Нуна.
 
бо прадказаў ім Госпад, што ўсе яны перамруць у пустыні; і не застанецца з іх у жывых ніводзін, апрача Калеба, сына Ефоны, і Ешуа, сына Нуна.