Да Піліпянаў 4 разьдзел

 

 

Гэтак, браты мае найдаражэйшыя і вельмі пажаданыя, радасць і вянок мой, стойце так у Госпадзе, улюбёныя.

 

Дык вось, браты мае ўзлю́бленыя і жаданыя, радасць і вянец мой, стойце так у Госпадзе, узлю́бленыя.

Эводыю прашу і Сынтыхею ўмольваю гэтаксама думаць у Госпадзе.

 

Ево́дзію прашу і Сінцíхію прашу быць аднадумнымі ў Госпадзе;

Таксама і цябе прашу, сапраўдны супрацоўніку, дапамагай ім, тым, якія са мною працавалі для Евангелля разам з Клементам і іншымі памочнікамі маімі, імёны якіх упісаны ў кнігу жыцця.

 

ды і цябе прашу, верны дружа, дапамагай ім, бо яны за дабравесце змагаліся разам са мною, і з Клíментам, і з аста́тнімі супрацоўнікамі маімі, чые імёны — у кнізе жыцця.

Радуйцеся ў Госпадзе заўсёды. Яшчэ раз кажу: радуйцеся!

 

Радуйцеся заўсёды ў Госпадзе; і зноў кажу: радуйцеся.

Ціхасць ваша хай будзе вядомай усім людзям. Госпад блізка.

 

Дабразычлівасць ваша няхай будзе вядома ўсім лю́дзям. Гасподзь блізка.

Не турбуйцеся ні аб чым, але ў кожнай малітве і просьбе з падзякаю няхай адкрываюцца жаданні вашы перад Богам.

 

Ні аб чым не турбуйцеся, а заўсёды ў малітве і маленні з падзякаю адкрывайце свае жаданні Богу,

І супакой Божы, які вышэй за ўсякае разуменне, хай сцеражэ сэрцы вашы і думкі вашы ў Хрысце Ісусе.

 

і мір Божы, вышэйшы за ўсякі розум, будзе захоўваць сэрцы вашы і думкі вашы ў Хрысце Іісусе.

Урэшце, браты, што толькі ёсць праўдзівае, што толькі сумленнае, што толькі справядлівае, што толькі чыстае, што толькі любае, што толькі добрай славы, ці якая цнота, ці што пахвальнае, — тое майце на думцы.

 

Урэшце, браты, толькі пра тое, што́ ісціннае, што́ пачэснае, што́ праведнае, што́ чыстае, што́ лю́бае, што́ прыемнае, што́ дабрадзейнае і што́ вартае хвалы, — вось пра што разважа́йце.

І тое рабіце, чаму вы ад мяне навучыліся, што атрымалі, што пачулі і што ўбачылі; і Бог супакою будзе з вамі.

 

Чаму вы навучыліся, і што перанялí, і пачулі, і ўбачылі ўва мне, тое і выконвайце, — і Бог міру будзе з вамі.

Дужа ўзрадаваўся я ў Госпадзе, што вы ўжо калісьці зноў пачалі думаць пра мяне, як раней думалі, але былі ў клопатах.

 

Я ж вельмі ўзрадаваўся ў Госпадзе, што вы нарэшце зноў пачалі клапаціцца пра мяне; вы і раней клапаціліся, але ў вас не было ўмоў.

Не кажу я гэтага з прычыны недахопу, бо я навучыўся задавольвацца тым, што ёсць.

 

Не з-за нястачы гэта кажу, бо я навучыўся быць здаволеным тым, што ёсць:

Умею і ў прыніжэнні быць, умею і ў дастатку; усяму і ва ўсім навучыўся: і наесціся, і галадаць; і мець дастатак, і нястачу.

 

умею жыць і ў беднасці, умею жыць і ў дастатку; ўсяму і ва ўсім я наву́чаны: і сы́тым быць, і галодным, быць і ў дастатку, і ў нястачы;

Усё магу ў Хрысце, Які ўзмацняе мяне.

 

усё магу ў Іісусе Хрысце, Які ўмацоўвае мяне.

Аднак жа добра вы зрабілі, успамагаючы бядзе маёй.

 

Аднак вы добра зрабілі, што паздялíлі са мною мой цяжар.

Вы ж, піліпцы, ведаеце, што на пачатку Евангелля, калі я пакінуў Мацэдонію, ні адна з цэркваў, апрача вас, не ўзяла ўдзелу ў даванні і прыманні;

 

Вы ж ведаеце, Філіпійцы, што на пачатку дабравесця, калі я выйшаў з Македоніі, ніводная царква не прымала ўдзелу ў тым, што́ я выдаткоўваў і атрымліваў, апрача вас адных;

вы і ў Тэсалоніку раз ці два прысылалі на мой ужытак.

 

бо вы і ў Фесалоніку і раз, і другі дасылалі мне на патрэбы.

Не шукаю я дарункаў, але шукаю плода, які памнажаецца на вашу карысць.

 

Гэта не значыць, што я шукаю дару; але плоду я шукаю, які памнажаецца на карысць вам.

Я ўсё атрымаў і хапае мне ўсяго; я напоўніўся, атрымаўшы ад Эпафрадыта салодкі водар, які вы даслалі, ахвяру прыемную, мілую Богу.

 

Я ма́ю ўсё і ма́ю ўдосталь; я поўнасцю забяспе́чаны, атрымаўшы ад Эпафрадыта пасла́нае вамі, як пах духмяны, як ахвяру прыемную, што даспадобы Богу.

Хай жа Бог мой споўніць усякае ваша жаданне паводле багацця Свайго ў славе, у Хрысце Ісусе.

 

Бог жа мой няхай задаволіць усякую патрэбу вашу паводле багацця Свайго ў славе, у Хрысце Іісусе.

Богу ж і Айцу нашаму слава на векі вечныя. Амін.

 

А Богу і Айцу нашаму слава на векі вякоў! Амінь.

Прывітайце кожнага святога ў Хрысце Ісусе. Вітаюць вас браты, якія са мною.

 

Вітайце кожнага святога ў Хрысце Іісусе. Вітаюць вас браты, якія са мною.

Вітаюць вас усе святыя, а найбольш тыя, якія з дому цэзара.

 

Вітаюць вас усе святыя, і асабліва з кесаравага дома.

Ласка Госпада нашага Ісуса Хрыста з усімі вамі. Амін.

 

Благадаць Госпада нашага Іісуса Хрыста з усімі вамі. Амінь.