Да Габрэяў 5 разьдзел

 

 

Кожны першасвятар, якога выбіраюць з людзей, прызначаны для людзей у справах Божых, каб прыносіць дары і ахвяры за грахі.

 

Бо кожны першасьвятар зь людзей выбіраны, людзям жа і пастаўляецца на служэньне Богу, каб прыносіць дары і ахвяры за грахі,

Ён можа спачуваць тым, хто не ведае і блукае, бо і сам мае ў сабе слабасць.

 

каб мог паблажаць неабазнаным і заблуканым; бо і сам абложаны немаччу,

Таму ён павінен як за народ, так і за сябе прыносіць ахвяры за грахі.

 

і таму ён павінен як за людзей, так і за сябе прыносіць ахвяры за грахі.

Ніхто сам не бярэ сабе гэтага гонару, апроч пакліканага Богам, як і Аарон.

 

І ніхто сам сабою ня прымае гэтага гонару, а толькі пакліканы Богам, як і Аарон.

Так і Хрыстус не сам сябе праславіў, стаўшы першасвятаром, але той, хто сказаў Яму: «Ты Сын Мой, Я Цябе сёння нарадзіў»;

 

Так і Хрыстос ня Сам Сабе прысвоіў славу быць першасьвятаром, а Той, Хто сказаў Яму: «Ты Сын Мой, Я сёньня нарадзіў Цябе»;

як і ў іншым месцы кажа: «Ты святар навекі на ўзор Мэльхізэдэка».

 

як і ў іншым месцы кажа: «Ты сьвятар навек па чыне Мелхісэдэка».

Хрыстус у дні свайго цела з моцным голасам і са слязьмі ўзнёс малітвы і просьбы да таго, хто мог уратаваць Яго ад смерці, і быў выслуханы за сваю пакорлівасць.

 

Ён, у дні плоці Сваёй, зь вялікім галашэньнем і са сьлязьмі прынёс малітвы і маленьні Таму, Хто меў моц уратаваць Яго ад сьмерці, і пачуты быў за Сваю богабаязнасьць;

Хоць быў Сынам, навучыўся паслухмянасці праз тое, што выцерпеў.

 

хоць Ён і Сын, аднак празь цярпеньні навучыўся паслушэнству;

І, будучы дасканалым, стаў для ўсіх, хто Яму паслухмяны, прычынаю вечнага збаўлення;

 

і, удасканаліўшыся, спрычыніўся да вечнага збавеньня ўсіх паслухмяных Яму,

і Богам быў абвешчаны першасвятаром на ўзор Мэльхізэдэка.

 

і быў названы ад Бога Першасьятаром па чыне Мелхісэдэка.

Пра гэта можам шмат сказаць, але цяжка вам гэта растлумачыць, бо сталі вы няздольнымі слухаць.

 

Пра гэта сьлед было б нам гаварыць многа; але цяжка патлумачыць, бо вы зрабіліся няздольныя слухаць.

Хоць вы павінны быць ужо настаўнікамі з увагі на час, аднак вы зноў патрабуеце, каб хтосьці вучыў вас асновам Божага вучэння, і вы зноў сталі тымі, каму патрэбна малако, а не цвёрдая ежа.

 

Бо, мяркуючы па часе, вам належала быць настаўнікамі; але вас зноў трэба вучыць першаасновам слова Божага, і вам патрэбнае малако, а ня цьвёрдая ежа.

Кожны, хто корміцца малаком, не мае досведу ў вучэнні справядлівасці, бо ён — немаўля.

 

Кожны, кормлены малаком, неабазнаны ў слове праўды, бо ён дзіця;

Цвёрдая ежа — для сталых, бо яны здабылі ўменне адрозніваць дабро і зло.

 

а цьвёрдая ежа ўласьцівая дасканалым, у якіх пачуцьці навыкам прывучаны адрозьніваць дабро і зло.