Выхад 40 разьдзел
Выхад
Пераклад Яна Станкевіча → Пераклад Чарняўскага 2002
І гукаў СПАДАР Масею, кажучы:
І прамовіў Госпад да Майсея:
«У дзень першага месяца, першага дня месяца ўстанаві вітальню будану збору,
«У першы дзень першага месяца паставіш Скінію Палаткі Сустрэчы,
І пастанаві там скрыню сьветчаньня, і закрый скрыню запінахаю,
і паставіш у ёй Каўчэг Сьведчаньня, ды накрыеш яго заслонай.
І ўнясі стол, і разлажы паложанае на ім, і ўнясі сьветач, і запалі лянпы яго;
Унясеш таксама стол і паложыш на ім тое, што мае быць паложана, поруч прынясеш сьвечнік і паставіш на ім лямпы ягоныя.
І пастанаві залаты аброчнік да кадзеньня перад скрыняю сьветчаньня; і запні запону ля ўходу ў вітальню;
Паставіш такжа залаты ахвярнік для каджэньня перад Каўчэгам Сьведчаньня і павесіш заслону ля ўваходу ў Скінію.
І пастанаві аброчнік усепаленьня перад уходам у вітальню будану збору;
А ахвярнік цэлапаленьня (паставіш) перад уваходам звонку Палаткі Сустрэчы.
І пастанаві мыцельнік памеж вітальні збору й аброчніка, і налі ў яго вады.
І паставіш умывальнік між Палаткай Сустрэчы і ахвярнікам, і нальеш ў яго вады.
І расстанаві панадворак наўкола, і запні запону ў браме панадворку.
І зробіш навакол панадворак, а пры браме павесіш заслону.
І вазьмі алею памазаньня, і памаж вітальню і ўсе, што ў ёй, і пасьвяці яе й усі рэчы яе, і будзе сьвятая.
Потым возьмеш алей памазаньня і памажаш скінію і ўсё, што ў ёй, і асьвяціш яе і ўсе яе прыналежнасьці, і будзе яна сьвятыняй.
І памаж аброчнік усепаленьня й усе судзьдзе яго, і пасьвяці аброчнік, і будзе аброчнік сьвятое сьвятых.
І памажаш ахвярнік цэлапаленьня з усімі яго прыналежнасьцямі, і асьвяціш яго, і будзе ён сьвятым зь сьвятых.
І памаж мыцельнік а падложак яго, і пасьвяці яго.
Памажаш разам умывальнік і падставу яго, і асьвяціш яе.
І дабліж Аарона а сыноў ягоных да ўходу будану збору, і ўмый іх вадою.
Тады прывядзеш Аарона і яго сыноў перад уваход у Палатку Сустрэчы і памыеш іх вадой.
І адзень Аарона ў сьвятыя адзецьці, і памаж яго й пасьвяці, і будзе Імне сьвятарстваваць.
Пасьля адзенеш Аарона ў яго сьвятыя шаты і памажаш яго, і пасьвяціш яго, каб паслугаваў Мне сьвятаром.
І сыноў ягоных дабліж, і адзень іх у хітоны,
І прывядзеш сыноў яго, і адзенеш іх у сукні.
І памаж іх, як памазаў ты айца іхнага, і будуць сьвятарстваваць Імне, і будзе ім памазаньне іхнае на сьвятарстваваньне на векі ў вусіх родах іхных».
І памажаш іх, як памазаў іх бацьку, каб служылі яны Мне сьвятарамі. Праз гэтае памазаньне ператрывае сьвятарства ў іхніх пакаленьнях навечна».
І зрабіў Масей усе; як расказаў яму СПАДАР, так і зрабіў.
І Майсей зрабіў усё; як яму загадаў Госпад, так і зрабіў.
І было, што першага месяца другога году, першага дня месяца выстаўлена вітальня.
Першага месяца другога года (па выхадзе іх з Эгіпту) у першы дзень месяца паставілі Скінію.
І выставіў Масей вітальню, палажыў падложкі яе, пастанавіў дошкі яе, і палажыў завалы, і пастанавіў стаўпы яе,
І паставіў яе Майсей, і палажыў падставу яе, і паставіў дошкі яе, жэрдкі і слупы,
І разапнуў будан над вітальняю, і палажыў пакрыцьце будану зьверху над ім, як расказаў СПАДАР Масею.
і расьцягнуў палатку над Скініяй, і накрыў яе пакрыцьцём палаткі зьверху, як гэта загадаў Госпад Майсею.
І ўзяў і палажыў сьветчаньне ў скрыню, і палажыў нашулкі ў скрыню, і палажыў века на скрыню зьверху.
Потым узяў Сьведчаньне і палажыў яго ў Каўчэг, уклаў таксама насілы ў колцы Каўчэга і палажыў зьверху накрыўку.
І ўнёс скрыню ў вітальню, і запяў запінаху запоны, і запяў над скрыняю сьветчаньня, як расказаў СПАДАР Масею.
Пасьля ўнёс Каўчэг у Скінію і павесіў заслону закрываючую, як загадаў Госпад Майсею.
І пастанавіў стол у будан збору, на паўночным баку вітальні, вонках запінахі.
І паставіў стол у Палатцы Сустрэчы на паўночным баку Скініі перад заслонай,
І разлажыў хлябы ў парадак перад Відам СПАДАРОВЫМ, як расказаў СПАДАР Масею.
а на ім разлажыў перад воблікам Госпада рад хлябоў, як загадаў Госпад Майсею.
І пастанавіў сьветач у будан збору супроці столу, на паўднявым баку вітальні.
І паставіў сьвечнік у Палатцы Сустрэчы насупраць стала на паўдзёным баку Скініі,
І запаліў лянпы перад СПАДАРОМ, як расказаў СПАДАР Масею.
і на ім разьмясьціў лямпы перад Госпадам, як загадаў Госпад Майсею.
І пастанавіў залаты аброчнік у будане збору перад запінахаю.
Паставіў таксама залаты ахвярнік у Палатку Сустрэчы насупраць заслоны,
І кадзіў на ім пахнючымі кадзіламі, як расказаў СПАДАР Масею.
і загадаў на ім паліць пахкія кадзілы, як загадаў Госпад Майсею.
І запяў запону ля ўходу вітальні.
І завесіў заслону ля ўваходу ў скінію.
І аброчнік усепаленьня пастанавіў ля ўходу ў вітальню будану збору, і аброк на ім усепаленьне а аброк хлебны, як расказаў СПАДАР Масею.
А ахвярнік цэлапаленьня паставіў перад уваходам у сярэдзіну Палаткі Сустрэчы, і ахвяраваў на ім цэлапаленьне і ахвяру зь яды, як загадаў Госпад Майсею.
І пастанавіў мыцельнік памеж будану збору й аброчніка, і наліў у яго вады да ўмываньня.
Паставіў такжа ўмывальнік між Палаткай Сустрэчы і ахвярніка, і наліў у яго вады для мыцьця.
І ўмывалі ў ім Масей а Аарон а сынове ягоныя рукі свае а ногі свае.
І мылі ў ім рукі і ногі Майсей, Аарон і сыны яго
І, уходзячы ў будан збору, бліжачыся да аброчніка, умываліся, як расказаў СПАДАР Масею.
перад уваходжаньнем у Палатку Сустрэчы і падыходам да ахвярніка, як загадаў Госпад Майсею.
І выставіў панадворак наўкола вітальні й аброчніка, і запяў запону ў браме панадворку. І скончыў Масей работу.
Наастатак зрабіў панадворак вакол Скініі і ахвярніка, а пры ўваходзе завесіў заслону. Такім чынам Майсей скончыў работу.
І пакрыў булак вітальню збору, і слава СПАДАРОВА напоўніла вітальню.
І тады воблака акрыла Палатку Сустрэчы, і хвала Госпада напоўніла Скінію.
І ня мог Масей увыйсьці ў будан збору, бо вітаў над ім булак, і слава СПАДАРОВА напаўняла вітальню.
І ня мог Майсей увайсьці ў Палатку Сустрэчы, бо супачывала на ёй воблака, і хвала Госпада напаўняла Скінію.
І як падыймаўся булак ад вітальні, тады пушчаліся ў дарогу сынове Ізраелявы ў вусіх падарожжах сваіх.
Колькі разоў воблака падымалася над скініяй, сыны Ізраэля выходзілі ў дарогу,
А як не падыймаўся булак, то яны ня пушчаліся ў дарогу, пакуль ён не падыймаўся.
а калі воблака не падымалася, не выходзілі яны ў дарогу аж да дня, калі падымалася воблака.
Бо булак СПАДАРОЎ над вітальняю ўдзень, і агонь быў ночы ў ёй перад ачмі ўсяго дому Ізраелявага ў вусіх падарожжах іхных.
Бо воблака Госпада ўдзень закрывала скінію, а ўночы сьвяціла, як агонь, на вачах усяго (дому) Ізраэля падчас усіх іхніх вандровак.