Выхад 25 разьдзел
Выхад
Пераклад Яна Станкевіча → Пераклад Чарняўскага 2002
І гукаў СПАДАР Масею, кажучы:
І вось што сказаў Госпад Майсею:
«Гукай сыном Ізраелявым, і возьмуць Імне дары; ад кажнага чалавека, каторы ад сэрца самахоць даў бы, бярыце дар Мой.
«Скажы сынам Ізраэля, каб сабралі для Мяне дары; ад кожнага чалавека прыйміце, каторы складае дар дабравольна.
І во дар, каторы вы маеце ўзяць ад іх: золата а срэбла а медзь,
Вось тыя рэчы, каторыя маеце прыняць: золата, серабро і медзь,
І васільковую, пурпуровую, і чырвовую, і цянюсенькае палатно, і ад козаў поўсьць,
пурпур фіялетавы і чырвоны, кармазын, вісон, казіную воўну,
І скуры баранія, пахварбаваныя на чырвана, і скуры барсуковыя, і дзерва акацу,
скуры бараноў фарбаваныя на чырвона ды скуры з дэльфінаў, поруч дрэва акацыяў,
Аліву да сьвяценьня, пахі да алею памазаньня і пахнючага да кадзеньня,
алей да сьвечнікаў, пахнідлы для вырабу алею намашчэньня і пахкіх кадзілаў,
Камяні оніксы і каменчыкі ўстаўныя ў наплечнік а нагруднік.
камяні оніксу і камяні брылянты для аздабленьня эфоду і нагрудніку.
І зробяць Імне сьвятыню, і буду вітаць сярод іх.
І хай зробяць Мне сьвятыню, і Я буду жыць паміж іх.
Усе, як Я паказую табе, і зразу вітальні, і зразу ўсіх судзінаў яе, і так зрабіце.
Зробіце ўсё на падобнасьць скініі, каторую Я пакажу табе, таксама ўвесь посуд для служэньня. Усё так і зробіце.
І зрабіце скрыню зь дзерва акацы; два з палавіцаю локці ўдаўжкі ёй, і паўтара локця ўшыркі ёй, паўтара локця ўвышкі ёй.
І зробіце каўчэг з дрэва акацыі. Даўжыня яго — два локці з паловаю, шырыня — паўтары локці, а вышыня — паўтары локці.
І пацягні яе шчырым золатам; знутра й знадворку пацягні яе; і зрабіце наверсе наўкола залаты вянок.
І пакрыеш яго шчырым золатам з вонку і з нутра, і зробіш на ім кругом залаты вянок.
І вылі да яе чатыры колцы залатыя, і прыладзь на чатырох ножках яе: і два колцы на адным баку яе, і два колцы на другім баку яе.
І выльеш да яго чатыры залатыя колцы і ўмацуеш на чатырох ніжніх вуглах ягоных: два колцы на адным яго баку, і два колцы на другім.
І зрабі нашулкі зь дзерва акацы, і пацягні іх золатам.
І зробіш з дрэва акацыі насілы, і пацягнеш іх золатам.
І ўвядзі нашуліны ў колцы па бакох скрыні, каб імі насіць скрыню.
І ўложыш (насілы) ў колцы па баках каўчэга, каб насіць яго.
У колцах скрыні маюць быць нашулкі, ня маюць іх адыймаць ад яе.
Насілы будуць заставацца ў колцах каўчэга і ня будуць зь іх вымацца.
І ўкладзі ў скрыню сьветчаньне, каторае Я дам табе.
І ўложыш у каўчэг Сьведчаньне, якое Я дам табе.
І зрабі века із шчырага золата, два локці з палавіцаю ўдаўжкі, а паўтара локця ўшыркі.
І зробіш накрыўку з найчысьцейшага золата: даўжыня яе — два з паловай локці, а шырыня — паўтары локці.
І зрабі двух херуваў із золата, з каванага зрабі іх з двух канцоў века.
З абодвух бакоў накрыўкі выкуеш з золата і паставіш двух хэрубімаў,
І зрабі аднаго херува на гэтым канцу, і аднаго херува на гэным канцу; зь века зрабіце херувы на абодвых канцох яго.
аднаго хэрубіма з аднаго боку, а другога — з другога; разам з накрыўкай зробіш іх на абодвух баках яе.
І будуць херувы распусьціўшы крылы ўгару, нахінаючыся над векам крыламі сваімі, а відамі адзін да аднаго; да века будуць віды херуваў.
Хай (хэрубімы) узнімаюць крылы ўгору і закрываюць сваімі крыламі накрыўку; а твары будуць мець зьвернутыя адзін да аднаго, і твары будуць зьвернутыя да накрыўкі,
І палажы века на скрыню зьверху, і ў скрыню палажы сьветчаньне, каторае Я дам табе.
якою павінен закрывацца каўчэг, у каторы паложыш Сьведчаньне, якое Я дам табе.
І Я буду сустракацца з табою там, і гукаць із табою над векам, памеж двух херуваў, каторыя над скрыняю сьветчаньня, праз усё, што буду расказаваць табою сыном Ізраелявым.
І буду Я сустракацца там з табою, і з-над накрыўкі, спаміж хэрубімаў, каторыя па-над Каўчэгам Сьведчаньня, буду гаварыць з табою пра ўсё, што загадаю празь цябе сынам Ізраэля.
І зрабі стол ізь дзерва акацы, два локці ўдаўжкі, локаць ушыркі, а паўтара локця ўвышкі
І зробіш таксама стол з дрэва акацыі, маючы два локці даўжыні, і локаць шырыні, і паўтары локці вышыні.
І пацягні яго золатам шчырым, і зрабі яму залаты вянок наўкола.
І пакрыеш яго найчысьцейшым золатам, і зробіш навокал залаты вянок.
І зрабі яму аблямаваньне на даланю наўкола, і зрабі залаты вянок да аблямаваньня ягонага наўкола.
І абвядзеш кругом ліштвай на чатыры пальцы шырока, і зробіш залаты вянок навокал.
І зрабі да яго чатыры колцы залатыя, і прыладзь колцы да чатырох рагоў, каторыя ў чатырох ножках ягоных.
І зробіш чатыры залатыя колцы для яго, і ўмацуеш кольцы на чатырох вуглах ля чатырох ножак ягоных.
Насупроці аблямаваньня маюць быць колцы як месцы нашулкам насіць імі стол.
Пры ліштвах павінны быць колцы, каб укладаць насілы і насіць стол.
І зрабі нашулкі зь дзерва акацы, і пацягні іх золатам, і будуць насіць гэты стол.
А насілы зробіш з дрэва акацыі і пацягнеш іх чыстым золатам, і будуць насіць на іх гэты стол.
І зрабі да яго місы а ложкі а жбаны а коўні, каб узьліваць імі; із шчырага золата зрабі іх.
І прыгатуеш таксама для яго місы, чашы, збанкі і кубкі для складаньня ахвяраў вадкіх, і зробіш іх з чыстага золата.
І лажы на стол хлябы Выкладу перад Імною штачасна.
І будзеш класьці на стол хлябы пакладныя перад абліччам Маім заўсёды.
І зрабі сьветач із золата шчырага, з каванага мае быць зроблены гэты сьветач; сьцябло яго, галузы, чарачкі яго, апучкі яго а кветкі яго маюць выходзіць ізь яго.
Зробіш таксама сьвечнік з найчысьцейшага золата. Каваны мусіць быць сьвечнік разам з падставай і сьцяблом яго, чашачкамі, яблыкамі і кветкамі.
І шэсьць галузаў маюць выходзіць із бакоў яго: тры галузы сьветача з аднаго боку яго, і тры галузы сьветача з другога боку яго.
Шэсьць галінаў павінны выходзіць зь яго бакоў, тры галіны з адного яго боку, і тры галіны — з другога боку.
Тры чарачкі, падобныя да міндальнае кветкі, з апучкаю аднэй а з кветкаю, і тры чарачкі на друтой галузе, з апучкаю аднэй а кветкаю. Гэтак на шасьцёх галузах, што выходзяць ізь сьветача.
Тры чашачкі ў форме краскаў мігдалёвых зь яблыкамі і кветкамі на адной галіне, і тры чашачкі ў форме краскаў мігдалёвых — на другой галіне, зь яблыкамі і кветкамі, і так на ўсіх шасьці галінах, якія выходзяць са сьцябла.
А на сьветачу маюць быць чатыры чарачкі, падобныя да міндальнае кветкі, з апучкамі іх а кветкамі іх.
А на сьцябле сьвечніка павінны быць чатыры чашачкі, падобныя да краскі мігдалёвай, зь яблыкамі і кветкамі.
І апучка пад дзьвюма галузкамі зь яго ж, і апучка пад дзьвюма галузкамі зь яго, апучка пад дзьвюма галузкамі зь яго, — на ўсіх шасьцёх галузках, што выходзяць ізь сьветача.
У шасьці галінаў, выходзячых са сьцябла сьвечніка, яблык пад двума яго галінамі, і яблык пад другімі двума галінамі, і яблык пад трэцімі двума галінамі ягонымі, і на сьцябле чатыры чашачкі, падобныя да мігдалёвай краскі.
Апучкі й галузы іх ізь яго маюць быць; ён увесь суцэльна каваны із шчырага золата.
Яблыкі і галіны іх, і ён зь імі разам павінны быць выкаваныя з чыстага золата.
І зрабі лянпаў сем яго, і ўстанаві яго лянпы, каб сьвяцілі на пярэднім баку яго.
І зробіш да яго сем лямпаў, і паставіш на яго лямпы ягоныя, каб асьвятлялі пярэдні яго бок.
І абцужкі да яго, і папялянкі да яго із шчырага золата.
Да яго зробіш з чыстага золата шчыпцы і папяльнічкі.
З цэнтнару золата шчырага няхай зробяць яго з усім гэтым судзьдзям.
З талента чыстага золата трэба зрабіць сьвечнік і ўсе прыналежнасьці да яго.
І глядзі, і зрабі подле зразы іх, якую паказаў табе на гары.
Глядзі, каб зрабіў паводле ўзору, які Я на гары паказаў табе.