1 Пятра 5 разьдзел

 

 

Старшых сярод вас вельмі прашу я, такжа старшы і сьветка мукі Хрыстуса ды супольнік тае хвалы, што мае аб’явіцца:

 

Пастыраў вашых умаўляю я, супастыр і сьведка цярпеньняў Хрыстовых і саўдзельнік у славе, якая павінна адкрыцца:

пасеце статак Божы, што пры вас, наглядаючы за ім ня з прынукі, але ахвоча для Бога ды не дзеля агіднай нажывы, а з чыстай шчырасьці волі;

 

пасьвіце Божы статак, які ў вас, наглядайце за ім ня з прынукі, а з ахвоты і богаспадобна, ня дзеля гнюснай карысьлівасьці, а з руплівасьці,

і не пануючы над клерам, але даючы добры прыклад аўчарні;

 

і не пануючы над спадчынай Божай, а даючы прыклад статку, —

калі-ж з’явіцца князь пастыраў, атрымаеце невянучы вянок славы.

 

і калі зьявіцца Пастыраначальнік, вы атрымаеце неўвядальны вянок славы.

Такжа і вы малодшыя будзьце паслухмянымі старшым. Дый усе аказывайце пакорнасьць адны другім, Бог бо пышным супраціўляецца, а пакорным ласку дае.

 

Таксама і малодшыя, карэцеся пастырам; а ўсе, скараючыся адно аднаму, набярэцеся пакорлівай мудрасьці, таму што Бог ганарыстым працівіцца, а пакорным дае мілату.

Скарэцеся, восьжа, пад моцную руку Божую, каб у сваім часе ўзвысіў вас,

 

Дык вось упакорцеся пад моцнай рукою Божай, хай узьнясе вас у свой час;

здайце на Яго ўсе вашыя турботы, Ён бо турбуецца аб вас.

 

усе клопаты вашыя ўскладзеце на Яго, бо Ён дбае пра вас.

Цвярозымі будзьце й не драмеце, праціўнік бо ваш, дзьябал, бы леў рыклівы кружыць, шукаючы кагог зжэрці;

 

Цьверазейце, чувайце, бо супраціўнік ваш д’ябал ходзіць, як рыклівы леў, шукаючы каго праглынуць;

процістаўцеся яму цьвёрдаю вераю, памятаючы, што гэткаяж грозная дакуда суправаджае і вашу братву на сьвеце.

 

стойце супроць яго цьвёрдаю вераю, ведаючы, што такія самыя цярпеньні выпадаюць і братам вашым у сьвеце.

А Бог усялякае ласкі, які паклікаў нас да вечнае хвалы свае ў Хрыстусе, хай вас, крыху прыцярпеўшых, удасканаліць, угрунтуе, падмацуе.

 

А Бог усялякай мілаты, паклікаўшы нас у вечную славу Сваю ў Хрысьце Ісусе, Сам пасьля нядоўгага цяпреньня вашага, няхай удасканаліць вас, няхай угрунтуе, няхай умацуе, няхай зробіць непахіснымі.

Яму хвала і сіла на вякі вечныя. Амэн.

 

Яму слава і ўлада навекі вечныя. Амін.

Гэта вось коратка напісаў я вам праз Сыльвана, вернага — думаю — брата, каб упэўніцьвас ды заахвоціць, што ёсьць праўдзівая тая ласка Божая, ў якой вы трываеце.

 

Гэта сьцісла напісаў я вам праз Сылуана, вернага, як думаю, вашага брата, каб упэўніць вас, суцяшаючы і сьведчачы, што гэта ў ісьціне мілата Божая, у якой вы стаіце.

Вітае вас выбраная з вамі эклезія ў Бабілёне ды Марак, мой сын.

 

Вітае вас выбраная, падобна вам, царква ў Вавілоне і Марк, сын мой.

Паздароўцеся ўзаемна сьвятым цалункам. Супакой вам усім у Езусе Хрыстусе. Амэн.

 

Вітайце адно аднаго пацалункам любові. Мір вам усім у Хрысьце Ісусе. Амін.