2 да Тэсалонцаў 2 2-i ліст да Тэсалонцаў 2 разьдзел

¹ Просім вось вас, браты, праз прыйсце Госпада нашага Ісуса Хрыста і нашае спатканне з Ім,

² каб вы не хісталіся паспешна розумам і не палохаліся ці то ад духа, ці то праз слова, ці то праз ліст, нібы ад нас, што быццам надыходзіць дзень Госпадаў.

³ Няхай ніхто вас не зводзіць ніякім чынам, бо дзень гэты не прыйдзе, пакуль не прыйдзе перш адступленне ды пакуль не з’явіцца чалавек бязбожны, сын загубы,

⁴ які працівіцца і ўзвышаецца па-над усім, што называецца Богам або што ўшаноўваецца, так, што ён засядзе ў святыні Божай, выдаючы сябе за Бога.

⁵ Ці ж не памятаеце, што, калі я яшчэ прабываў у вас, вам аб гэтым казаў?

⁶ І ведаеце цяпер, што яго трымае ад з’яўлення ў свой час.

⁷ Таямніца нягоднасці ўжо дзейнічае; але толькі [абмежавана] да таго часу, пакуль будзе пасярод той, хто трымае цяпер.

⁸ Тады і аб’явіцца той бязбожнік, якога Госпад Ісус заб’е духам вуснаў Сваіх і знішчыць яго магутнасцю прыходу Свайго,

⁹ таго, прыход якога намаганнем шатана [будзе] з усёю сілаю, і знакамі, і ўяўнымі цудамі,

¹⁰ і з усякімі нягоднымі ашуканствамі для тых, якім ісці на згубу, бо яны не прынялі любові праўды, каб збавіцца.

¹¹ І дзеля таго спасылае ім Бог дзеянні подступу, каб верылі падману.

¹² Так будуць асуджаны ўсе, што не ўверылі праўдзе, а ўзлюбілі беззаконне.

¹³ Нам жа належыцца заўжды дзякаваць Богу за вас, умілаваныя Госпадам браты, бо ад пачатку, праз асвячэнне Духа і веру праўды Бог вас выбраў на збаўленне,

¹⁴ да якога паклікаў вас праз Евангелле нашае на атрыманне хвалы Госпада нашага Ісуса Хрыста.

¹⁵ Дык вось, браты, стойце і трымайцеся традыцый, якім навучыліся ці то праз словы, ці то праз лісты нашыя.

¹⁶ Хай жа Сам Госпад наш Ісус Хрыстос і Бог, Айцец наш, Які ўзлюбіў нас і даў вечнае суцяшэнне і добрую надзею ў ласцы,

¹⁷ суцешыць сэрцы вашыя і ўмацуе ва ўсякай добрай дзейнасці і слове.