Ісуса сына Нава 12 разьдзел

Кніга Ісуса сына Нава
Пераклад Яна Станкевіча → Пераклад Чарняўскага 2017

 
 

І во каралі тае зямлі, каторых зразілі сынове Ізраелявы і ўзялі на спадак зямлю іхную па тым баку Ёрдану на ўсход сонца, ад цур’я Арнона аж да гары Гэрмону, і ўсю раўніну на ўсход:
 
Вось цары, якіх забілі сыны Ізраэля і завалодалі іх зямлёю за Ярданам, на ўсход сонца, ад ручая Арнон аж да гары Гэрмон і з усёй усходняй часткай Арабы.

Сыгон, кароль Аморэйскі, што жыў у Гэшбоне, гаспадарстваваў ад Ароеру, каторы ля берагу цур’я Арнона, і ад сярэдзіны цур’я, і ад палавіцы Ґілеаду аж да цур’я Явока, граніцы сыноў Амонавых,
 
Сэгон, цар амарэяў, які жыў у Хесебоне і ўладарыў ад Араэра, што на беразе ручая Арнон, і ад сярэдзіны даліны і па палову Галаада аж да ручая Ябок, мяжы сыноў Амона;

І на раўніне аж да мора Хінерофскага на ўсход і аж да мора раўніны, мора Салонага, на ўсход па дарозе да Беф-Ешымофу, а на паўдня пад усхонамі Пісґі;
 
і ў Арабе аж да мора Кінэрэт на ўсходзе і аж да мора Арабы, гэта значыць мора Салёнага, на ўсходні бок па дарозе, што вядзе ў Бэт-Есімот, і на паўднёвым баку, што ляжыць ля падножжа Пісгі.

І прасьцягі Оґа, караля Вашанскага, із засталых Рэфаімаў, што жыў у Аштарофе а ў Едрэі,
 
Пасля Ог, цар Басана, апошні з рэфаімаў, які жыў у Астароце і ў Эдраі

І гаспадарстваваў на гары Гэрмоне а Салесе ў вусім Вашане, аж да граніцы Ґешурскае а Мааскае, і ў палавіцы Ґілеаду, аж да граніцы Сыгона, караля Гэшбонскага.
 
і панаваў на гары Гэрмон, і ў межах Сальхі, а таксама ва ўсім Басане аж да межаў Гэсура і Маахі, і над паловай Галаада, аж да межаў Сэгона, цара Хесебона.

Масей, слуга СПАДАРОЎ, і сынове Ізраелявы пабілі іх; і даў яе Масей, слуга СПАДАРОЎ, на спадак Рувінаваму а Ґадоваму а палавіцы плямені Манасавага.
 
Майсей, паслугач Госпадаў, і сыны Ізраэля забілі іх; і аддаў зямлю іх Майсей ва ўладанне пакаленням Рубэна і Гада і палове пакалення Манасы.

І во каралі зямлі, каторых зразіў Ігошуа а сынове Ізраелявы на гэтым баку Ёрдану на захад, ад Ваал-Ґаду на даліне Лібанскай аж да гары Галака, што ўзыходзе да Сэіру, — і аддаў Ігошуа яе плямёнам Ізраелявым на спадак, подле падзелу іх, —
 
Гэта цары зямлі, якіх забіў Ешуа і сыны Ізраэля за Ярданам у заходнім баку, ад Баалгада ў даліне Лібана аж да гары Кальв, якая падымаецца да Сэіра, яе аддаў Ешуа ва ўладанне пакаленням Ізраэля, кожнаму — яго частку,

На гары й на нізіне, на раўніне, на схонах, і на пустыні, і на паўдні, Гэціча, Аморэя, Каананяніна, Ферэзэя, Гэвея а Евусэя:
 
як на гарах, так і ў Сэфэле, у Арабе і на схілах гары, і ў пустыні, і ў Нагэбе; зямлю хетэяў, амарэяў, хананеяў, феразеяў, гівеяў і евусеяў:

Адзін кароль Ерыхону, адзін кароль Гаю, каторы ля Бэт-Элю,
 
цар Ерыхона — адзін, цар Гая, што на баку Бэтэля, — другі,

Адзін кароль Ерузаліму, адзін кароль Гэўрону,
 
цар Ерузаліма — трэці, цар Геброна — чацвёрты,

Адзін кароль Ярмуфу, адзін кароль Лахісу,
 
цар Ярмута — пяты, цар Лахіса — шосты,

Адзін кароль Еґлону, адзін кароль Ґезэру,
 
цар Эглона — сёмы, цар Газэра — восьмы,

Адзін кароль Дэвіру, адзін кароль Ґедэру,
 
цар Дабіра — дзевяты, цар Гадэра — дзесяты,

Адзін кароль Гормы, адзін кароль Арада,
 
цар Хормы — адзінаццаты, цар Арада — дванаццаты,

Адзін кароль Ліўны, адзін кароль Одуламу,
 
цар Лебны — трынаццаты, цар Адалама — чатырнаццаты,

Адзіл кароль Македу, адзін кароль Бэт-Элю,
 
цар Македы — пятнаццаты, цар Бэтэля — шаснаццаты,

Адзін кароль Таппуагу, адзіну кароль Гэферу,
 
цар Тафуа — семнаццаты, цар Хафэра — васемнаццаты,

Адзін кароль Афеку, адзін кароль Лашарону,
 
цар Афэка — дзевятнаццаты, цар Сарона — дваццаты,

Адзін кароль Мадону, адзін кароль Гацору,
 
цар Мадона — дваццаць першы, валадар Асора — дваццаць другі,

Адзін кароль Шымрон-Мерону, адзін кароль Ахшафу,
 
цар Сэмрона — дваццаць трэці, цар Ахсафа — дваццаць чацвёрты,

Адзін кароль Фаанаху, адзін кароль Меґідда,
 
цар Танаха — дваццаць пяты, цар Магеды — дваццаць шосты,

Адзін кароль Кедэшу, адзін кароль Ёкнеаму ля Кармілу,
 
цар Кадэса — дваццаць сёмы, цар Екнаама, што каля Кармэля, — дваццаць восьмы,

Адзін кароль Дору ля Нафар Дору, адзін кароль Ґоіму ў Ґілґале,
 
цар Дора з узвышшаў Дор — дваццаць дзевяты, цар паганаў з Галгала — трыццаты,

Адзін кароль Фірцы. Усіх каралёў трыццаць адзін.
 
цар Тэрсы — трыццаць першы, усіх цароў — трыццаць адзін.