2 да Цімафея 4 разьдзел

 

 

Дык заклінаю цябе перад Богам і Ўсеспадарам нашым Езусам Хрыстусам, які судзіць будзе жывых і ўмерлых празь зьяўленьне сваё і валадарства сваё:

 

Умольваю цябе перад Богам і Хрыстом Ісусам, Які будзе судзіць жывых і памёршых, праз прыход Яго і Валадарства Яго:

вясьці слова, наставай у-пору ці ня ў-пору, дакарай, прасі-малі з найбольшай цярплівасьцяй у навучаньні,

 

абвяшчай слова, настойвай у час ці не ў час, дакарай, пагражай, малі з усёй цярплівасцю і навукай.

бо настане час, што здаровай навукі ня сьцерпяць, а водле сваіх прымхаў будуць выбіраць сабе вучыцялёў, лашчачых слух;

 

Бо надыдзе час, калі здаровай навукі не сцерпяць, але па волі сваіх пажадлівасцей падбяруць сабе настаўнікаў, патураючых вушам,

і ад праўды слух адвернуць, а зьвернуцца да басьняў.

 

і адвернуць слых ад праўды, а да баек прыхінуцца.

Але ты будзь чуткім на ўсё, гаруй цярпліва, пільнуй дабравешчаньня Эванэліі, спаўняй, цьвярозым будзь,

 

Ты ж пільнуйся ва ўсім, працуй, выконвай справу евангеліста, службу тваю спаўняй.

бо я ўжо стаўся ахвярай, збліжаецца пара майго адыходу.

 

Я вось гатовы стацца ахвярай, і час майго адыходу настаў.

Змагаюся я добрым змаганьнем, бег даканаў, веру датрымаў.

 

Змагаўся я ў добрым змаганні, бег закончыў, веру захаваў.

Наастатак адложаны для мяне вянец справядлівасьці, які дасьць мне Госпад, Судзьдзя справядлівы, у той дзень; ды ня толькі мне, але й усім тым, што любасна чакаюць прыйсьця ягонага.

 

На заканчэнне рыхтуецца мне вянок справядлівасці, які мне дасць у той дзень Госпад, справядлівы Суддзя, ды не толькі мне, але і тым, якія палюбілі прыход Яго.

Пастарайся хутка да мяне дастацца.

 

Паспяшайся прыйсці да мяне хутка,

Бо Дымас пакінуў мяне, узьлюбіўшы гэты век, ды пайшоў у Тэссалёніку, Крэсцэнт у Галятыю, Тытус у Дальмацыю; адзін толькі Лукаш зы мною.

 

бо Дэмас кінуў мяне, палюбіўшы гэты свет, і пайшоў у Тэсалоніку, Крэсцэнс — у Галатыю, Ціт — у Далмацыю.

Марка, узяўшы, прывядзі з сабою, бо ён мне патрэбны для прыслугі;

 

Адзін Лука са мною. Вазьмі Марка і прывядзі яго з сабой, бо ён патрэбны мне для службы.

Тыхіка-ж я паслаў у Эфэз.

 

Тыхіка паслаў я ў Эфес.

Плашч, які ў Троадзе пакінуў я ў Карпа, ідучы прынясі з сабою, ды кнігі, асабліва пергамэнтавыя.

 

Як будзеш ісці, вазьмі з сабою плашч, які пакінуў я ў Траадзе ў Карпа, і кнігі, асабліва пергаміны.

Аляксандар, меднік, многа мне зрабіў благога, аддасьць яму Госпад водле ўчынкаў ягоных!

 

Каваль Аляксандра шмат учыніў мне ліха. Няхай аддасць яму Госпад паводле дзейнасці яго.

Сьцеражыся яго й ты, ён бо надта проціставіцца нашым словам.

 

Яго і ты абмінай, бо ён вельмі працівіцца нашым словам.

Пры першай маей самаабароне не было пры мне нікога, усе бо мяне пакінулі: хай-жа (гэта) ня будзе ім палічана!

 

Пры першай маёй абароне нікога не было пры мне, але ўсе мяне пакінулі. Няхай гэта не будзе ім палічана.

Але Госпадстаў перада мною і ўмацаваў мяне, каб навучаньне (Эванэліі) даканалася й пачулі яго ўсе народы; і я быў вызвалены ізь львінае пашчы.

 

Госпад жа з’явіўся перада мною і ўмацаваў мяне, каб прапаведаванне праз мяне працягвалася і каб яго чулі ўсе народы; і я пазбегнуў ільвінае пашчы.

І выбавіць мяне Госпад ад усяго благога і захавае для Валадарства нябеснага. Яму хвала на вякі вечные. Амэн.

 

І вызваліць мяне Госпад ад усякай ліхой справы, і захавае для Свайго Нябеснага Валадарства. Яму слава на векі вечныя. Амін.

Прывітай Прыскільлю і Акільлю ды дом Анічыпара.

 

Прывітай Прыску і Аквілу, і разам дом Анэсіфора.

Эраст астаўся ў Карыньце; Трахіма-ж я пакінуў хворага ў Мілеце.

 

Эраст застаўся ў Карынце, а Трафіма пакінуў я хворым у Мілеце.

Пасьпяшы прыйсьці да зімы. Вітаюць цябе Эўбуль і Пудэнт, Лін і Кляўдыя, ды ўсе браты.

 

Паспяшайся перад зімой прыйсці. Вітаюць цябе Эўбуль, і Пудэнс, і Лін, і Клаўдыя, і ўсе браты.

Госпад Езус Хрыстус з духам тваім! Ласка з вамі. Амэн.

 

Госпад з духам тваім. Ласка з вамі.