Эфэсцам 3 Эфэсцам 3 разьдзел

¹ Дзеля гэтага вось я, Павал, — вязень Ісуса Хрыста за вас, паганаў.

² Як вы чулі пра распарадкаваньне ласкі Божае, дадзенае мне дзеля вас,

³ што паводле адкрыцьця Ён аб’явіў мне таямніцу, (як я коратка напісаў вышэй,

⁴ з чаго, чытаючы, можаце зразумець маё разуменьне таямніцы Хрыстовай),

⁵ якая ў іншых пакаленьнях не была вядомая сынам чалавечым, як цяпер адкрыта сьвятым апосталам Ягоным і прарокам праз Духа,

⁶ што і пагане ёсьць суспадчыньнікамі, і адным целам, і супольнікамі абяцаньня Ягонага ў Хрысьце праз Эвангельле,

⁷ якога я стаўся служыцелем паводле дару ласкі Божае, дадзенае мне дзеяньнем сілы Яго.

⁸ Мне, найменшаму з усіх сьвятых, дадзена ласка гэтая — сярод паганаў дабравесьціць пра недасьледнае багацьце Хрыстовае

⁹ і зрабіць яўным для ўсіх, якое ёсьць распарадкаваньне таямніцы, што схаваная ад вякоў у Богу, Які стварыў усё праз Ісуса Хрыста,

¹⁰ каб цяпер праз Царкву сталася вядомаю начальствам і ўладам у нябёсах разнастайная мудрасьць Божая,

¹¹ паводле адвечнага вызначэньня, якое Ён зрабіў у Хрысьце Ісусе, Госпадзе нашым,

¹² у Якім маем адвагу і доступ з пэўнасьцю праз веру ў Яго.

¹³ Таму прашу вас не журыцца з прычыны прыгнёту майго дзеля вас, бо гэта ёсьць слава вашая.

¹⁴ Дзеля гэтага схіляю калені мае перад Айцом Госпада нашага Ісуса Хрыста,

¹⁵ ад Якога мае назоў усякае бацькоўства ў небе і на зямлі,

¹⁶ каб Ён даў вам, паводле багацьця славы Сваёй, сілай умацавацца праз Духа Ягонага ва ўнутраным чалавеку,

¹⁷ каб Хрыстос пасяліўся праз веру ў сэрцах вашых,

¹⁸ каб вы, укараніўшыся і ўмацаваўшыся ў любові, здолелі сьцяміць разам з усімі сьвятымі, што ёсьць шырыня і даўжыня, глыбіня і вышыня,

¹⁹ і зразумець любоў Хрыстовую, якая вышэй за разуменьне, каб вам напоўніцца ўсёю поўняй Божаю.

²⁰ А Таму, Хто сілаю, якая дзейнічае ў нас, можа зрабіць нашмат больш за ўсё, пра што мы просім або разумеем,

²¹ Яму слава ў Царкве ў Хрысьце Ісусе ў-ва ўсіх пакаленьнях на вякі вякоў. Амэн.