Да эхвесцаў 3 Да эхвесцаў 3 разьдзел

¹ Таму я, Павал, стаўся вязьнем Хрыста Ісуса дзеля вас, паганаў

² як вы ведаеце (аб) служэньні Багадаці Бога, якое дадзена мне дзеля вас,

³ таму што па адкрыцьцю Ён адкрыў мне тайну, аб чым я раней коратка напісаў,

⁴ пра што вы, чытаючы, можаце ўразумець, што я ведаю тайну Хрыста,

⁵ якая ня была́ апавяшчона папярэднім пакаленьням сыноў чалавечых, як цяпер Духам адкрыта сьвятым Апосталам Ягоным і прарокам,

⁶ каб і пагане сталіся супольнымі спадчыньнікамі і адным целам і суўспрыймальнікамі Ягонага абяцаньня ў Хрысьце праз Эвангельле,

⁷ якога я стаўся служкаю па дару Багадаці Бога, якая дарава́на мне па дзеяньню сілы Ягонай.

⁸ Мне, найменшаму з усіх сьвятых, падарава́на гэтая Багадаць: дабравесьціць сярод паганаў нядасягальнае багацьце Хрыста

⁹ і зрабіць відавочным дзеля ўсіх, якая самаахвярнасьць за нас тайны, якая была́ адве́чна схава́на ў Богу, Які ўсё стварыў праз Ісуса Хрыста,

¹⁰ каб цяпер праз царкву сталася вядомай начальствам і ўладам на Нябёсах разнастайная мудрасьць Бога,

¹¹ паводля спрадвечнага замыслу, які Ён споўніў у Хрысьце Ісусе, Госпадзе нашым,

¹² у Якім мы маем адвагу і доступ з упэўненасьцю праз веру Ягоную.

¹³ Таму прашу вас ня падаць духам пры маіх абставінах уціску дзеля вас, якія ёсьць слава вашая.

¹⁴ Дзеля гэтага я кленчу перад Ба́цькам Госпада нашага Ісуса Хрыста,

¹⁵ ад Якога атрымлівае імя ўсякі радавод на Нябёсах і на зямлі,

¹⁶ каб Ён даў вам па багацьцю славы Сваёй умацавацца сілаю праз Духа Ягонага ва ўнутраным чалавеку,

¹⁷ каб у сэрцах вашых укаранёных і ўмацаваных у любві праз веру жыў Хрыстос,

¹⁸ каб вы змаглі зразумець са ўсімі сьвятымі, што ёсьць шырыня і даўжыня, і глыбіня, і вышыня,

¹⁹ і ўразумець любоў Хрыста, якая вышэй за ўсякае разуменьне, каб вы былі напоўнены ўсёй паўнатою Бога.

²⁰ А Таму, Хто мае сілу зрабіць (для нас) больш за ўсё і няпамерна больш таго, аб чым просім альбо ўяўляем адпаведна сілы, якая дзейнічае ў нас,

²¹ Таму слава ў царкве ў Хрысьце Ісусе ва ўсіх родах у вяках вякоў. Амін.