Лукаша 3 разьдзел

 

 

У пятнаццаты-ж год панаваньня Тывэрыя ке́сара, калі Понці Пілат гаспадарыў у Юдэі, Ірад быў чацьвертаўладнікам у Галіле́і, Піліп, брат яго, чацьвертаўладнікам у Ітурэі і Траханіцкай краіне, а Лісані чацьвертаўладнікам у Авілене́і,

 

А ў пятнаццаты год панаваньня цэзара Тыбэрыя, калі Понтый Пілат панаваў у Юдэі, Ірад быў тэтрархам у Галілеі, Філіп, брат ягоны, — тэтрархам у Ітурэі і раханіцкай краіне, а Лісані — тэтрархам у Абіліне,

пры архірэях Ганьне і Кайяфе, быў голас Божы да Іоана, сына Заха́равага, у пустыні.

 

пры першасьвятарах Аньне і Каяфе было слова Божае да Яна, сына Захарыі, у пустыні.

І ён праходзіў па ўсіх ваколіцах Іорданскіх, прапаве́дываючы хрышчэньне пакая́ньня дзеля адпушчэньня грахоў,

 

І ён праходзіў па ўсіх ваколіцах Ярданскіх, прапаведуючы хрышчэньне навяртаньня дзеля адпушчэньня грахоў,

як напісана ў кнізе слоў прарока Ісаі, які кажа: голас клíкаючага ў пустыні: прыгатуйце шлях Госпаду, простымі зрабеце сьце́жкі Яму;

 

як напісана ў кнізе словаў прарока Ісаі, які кажа: «Голас таго, хто кліча ў пустыні: “Падрыхтуйце шлях Госпаду, простымі рабіце сьцежкі Яго;

усякі дол няхай напоўніцца, і ўсякая гара́ і ўзгорак няхай зьнíзяцца, крывулі выпрастуюцца і няроўныя шляхі зробяцца гладкімі;

 

усякі дол няхай напоўніцца, і ўсякая гара і ўзгорак няхай панізяцца, крывізны няхай выпрастуюцца, і няроўныя шляхі зробяцца гладкімі;

і ўгле́дзіць усякае це́ла спасе́ньне Божае (Ісая 40:3−5).

 

і ўгледзіць усякае цела збаўленьне Божае”».

І казаў Іоан народу, які прыходзіў хрысьціцца ў яго: плод яхідніны! хто перасьцярог вас, каб уцякалі ад будучага гне́ву?

 

І казаў ён натоўпам, якія прыходзілі хрысьціцца ў яго: «Спараджэньні яхідны, хто перасьцярог вас, каб уцякалі ад гневу, які надыходзіць?

Зрабе́це-ж годныя пакаяньня плады і ня думайце гаварыць сабе́: бацька ў нас Аўраам; бо кажу вам, што Бог можа з каме́ньняў гэтых падняць дзяце́й Аўрааму.

 

Зрабіце плады, годныя навяртаньня, і не пачынайце гаварыць у сабе: “Бацьку маем Абрагама”, бо кажу вам, што Бог можа з камянёў гэтых падняць дзяцей Абрагаму.

Ужо й сяке́ра ля караня́ дрэваў ляжыць; усякае дрэва, што плоду добрага ня прыносе, зрубаецца й кідаецца ў вагонь.

 

Ужо і сякера ля кораня дрэваў ляжыць; усякае дрэва, якое не прыносіць добрага плоду, сьсякаецца і кідаецца ў агонь».

І спытаўся ў яго народ: што-ж нам рабіць?

 

І спытаўся ў яго натоўп, кажучы: «Дык што нам рабіць?»

Ён жа сказаў ім у адказ: у каго дзьве́ адзе́жыны, той дай таму, хто ня ма́е; і ў каго ёсьць е́жа, рабі тое-ж.

 

А ён, адказваючы, кажа ім: «Хто мае дзьве вопраткі, няхай дасьць таму, хто ня мае; і хто мае ежу, няхай робіць тое самае».

Прыйшлі і мытнікі хрысьціцца і сказалі яму: вучыцель! што нам рабіць?

 

Прыйшлі і мытнікі хрысьціцца, і сказалі яму: «Настаўнік, што нам рабіць?»

Ён жа адказаў ім: нічога не бярэце больш таго, што назна́чана вам.

 

А ён сказаў ім: «Нічога не бярыце больш таго, што вам загадана».

Пыталіся ў яго таксама й вая́кі: а нам што́ рабіць? І сказаў ім: нікога ня крыўдзьце, не абмаўляйце і здавальняйцеся сваёю платай.

 

Пыталіся ў яго таксама жаўнеры, кажучы: «А нам што рабіць?» І ён сказаў ім: «Нікога ня крыўдзьце, не абвінавачвайце фальшыва і задавальняйцеся платай сваёй».

Калі-ж народ быў у недаўме́ньні, і ўсе́ думалі ў сэрцах сваіх аб Іоане, ці ня Хрыстос ён?

 

І народу, які чакаў і разважаў у сэрцах сваіх адносна Яна, ці не Хрыстос ён,

Іоан усім адказаў: я хрышчу вас вадою, але йдзе́ Дужэйшы за мяне́, у каторага я ня варты разьвязаць раме́нь абуцьця: Ён будзе хрысьціць вас Духам Сьвятым і агнём;

 

адказаў Ян усім, кажучы: «Я хрышчу вас вадою, але ідзе Дужэйшы за мяне, у Якога я ня варты разьвязаць рамень сандалаў Ягоных. Ён будзе хрысьціць вас Духам Сьвятым і агнём.

лапата Яго ў руцэ Яго, і Ён ачысьціць гумно Сваё і пазьбірае пшаніцу ў сьвіран свой, а садому спаліць агнём няўга́сным.

 

Веялка Ягоная ў руцэ Яго, і Ён ачысьціць ток Свой, і зьбярэ пшаніцу ў сьвіран Свой, а салому спаліць агнём незгасальным».

Многа і другога прапаве́дываў ён народу, навучаючы яго.

 

І шмат іншага дабравесьціў ён народу, навучаючы яго.

Ірад жа чацьвертаўладнік, дакара́ны ім за Ірадзіяду, жонку брата яго, Піліпа, і за ўсё, што Ірад зрабіў благога,

 

А Ірад тэтрарх, дакараны ім за Ірадыяду, жонку Філіпа, брата ягонага, і за ўсё, што Ірад зрабіў злога,

дадаў да ўсяго іншага й тое, што пасадзіў Іоана ў вязьніцу.

 

дадаў да ўсяго і тое, што замкнуў Яна ў вязьніцу.

І сталася, як хрысьціўся ўве́сь народ, і Ісус ахрысьціўшыся маліўся, — адчынілася не́ба,

 

І сталася, калі хрысьціўся ўвесь народ, і Ісус, ахрысьціўшыся, маліўся, адчынілася неба,

і Дух Сьвяты зыйшоў на Яго ў цяле́сным вы́глядзе, як галу́б, і быў голас з не́ба, гаворачы: Ты Сын Мой Улю́блены; цябе́ ўпадабаў Я.

 

і Дух Сьвяты зыйшоў на Яго ў цялесным выглядзе, як голуб, і быў голас з неба, які казаў: «Ты — Сын Мой Улюбёны; у Табе Я маю ўпадабаньне».

Ісус, пачынаючы Сваё служэньне, быў гадоў трыццацёх і быў, як думалі, сын Язэпаў, Іліяў,

 

І меў Ісус, пачынаючы [служэньне], гадоў каля трыццаці, і быў, як думалі, сын Язэпаў, Гэліяў,

Матфанаў, Ле́віяў, Мэльхіяў, Іоанаў, Язэпаў,

 

Мататаў, Левіяў, Мэльхіяў, Янаяў, Язэпаў,

Матафíяў, Амосаў, Навумаў, Ясьлімаў, Наге́яў,

 

Мататыяў, Амосаў, Навумаў, Эсьліяў, Нагеяў,

Маафаў, Матафіяў, Саме́яў, Язэпаў, Юдзін,

 

Магатаў, Мататыяў, Сэмэяў, Язэпаў, Юдаў,

Іоананаў, Рысаеў, Зарававэляў, Саляфіілаў, Нірыяў,

 

Яанаяў, Рэсаеў, Зэрубабэляў, Салятыэляў, Нэрыяў,

Мэльхіяў, Адзіяў, Касамаў, Ялмадамаў, Іраў,

 

Мэльхіяў, Аддыяў, Касамаў, Эльмадамаў, Іраў,

Есіяў, Еліязэраў, Іярымаў, Матфатаў, Ле́віін,

 

Ёсіяў, Эліезэраў, Ярымаў, Мататаў, Левіяў,

Сымэонаў, Юдзін, Язэпаў, Іоананаў, Эліякімаў,

 

Сымонаў, Юдаў, Язэпаў, Янанаў, Эліякімаў,

Мэлеаяў, Маінаінаў, Матафаяў, Натанаў, Давідаў,

 

Мэлеаяў, Маінанаў, Мататаў, Натанаў, Давідаў,

Іясе́яў, Авідаў, Ваозаў, Салмонаў, Наасонау,

 

Есэяў, Абэдаў, Боазаў, Сальмонаў, Наасонаў,

Амінадаваў, Арамаў, Ясромаў, Фарэсаў, Юдзін,

 

Амінадабаў, Арамаў, Эсромаў, Пэрэсаў, Юдаў,

Якубаў, Ісаакаў, Аўраамаў, Фарын, Нахораў,

 

Якубаў, Ісаакаў, Абрагамаў, Тэрахаў, Нахораў,

Сэрухаў, Рагаваў, Фале́каў, Яве́раў, Салін,

 

Сэрухаў, Рагаваў, Фалекаў, Гэбэраў, Салаў,

Каінанаў, Арфаксадаў, Сімаў, Нояў, Ламе́хаў,

 

Каінанаў, Арфаксадаў, Сэмаў, Нояў, Лямэхаў,

Матусалаў, Янохаў, Іарэдаў, Малеляіляў, Каінанаў,

 

Мэтушаляхаў, Энохаў, Ярэдаў, Магалялеэляў, Кейнанаў,

Эносаў, Сіфаў, Адамаў, Божы.

 

Эносаў, Сэтаў, Адамаў, Божы.