Ёва 36 разьдзел
Кніга Ёва
Пераклад Васіля Сёмухі → Пераклад Чарняўскага 2012
І гаварыў далей Эліуй і сказаў:
І ў дадатак Элію вось што сказаў:
пачакай мяне крыху, і я пакажу табе, што я маю яшчэ што сказаць за Бога.
«Пачакай мяне хвілінку, і я пакажу табе: бо я маю яшчэ нешта сказаць пра Бога.
Пачну мае разважаньні здалёку і аддам справядлівасьць Садзецелю майму,
Паўтару навуку маю здалёк і Творцу майму аддам справядлівасць.
бо словы мае сапраўды не мана: перад табою — дасканалы ў пазнаньні.
Бо праўдзівыя і без падману словы мае, і перад табой [я] дасканалы ў веданні.
Вось, Бог магутны і не пагарджае моцнага сілаю сэрца;
Не дасць Бог магутны і не адкідае Магутны моцаю сэрца,
Ён не падтрымлівае бязбожных і аддае належнае прыгнечаным;
не дасць Ён жыць бязбожніку, але чыніць суд для бедных.
Ён не адварочвае вачэй Сваіх ад праведнікаў, а з царамі назаўсёды садзіць іх на троне, і яны ўзвышаюцца.
Не адверне Ён ад справядлівага вачэй сваіх і цароў на пасадзе размяшчае на векі, і яны ўзвышаюцца.
Калі ж яны закаваныя ў ланцугі і трымаюцца ў аковах гароты,
І, калі яны будуць закаваныя ў кайданы і звязаныя путамі бядоты,
дык Ён паказвае ім на дзеі іхнія і на беззаконьні іхнія, бо яны памножыліся,
Ён пакажа ім справы іх і злачынствы іх, што яны былі гвалтоўныя.
і адчыняе ім вуха дзеля настаўленьня на розум і кажа ім, каб яны адхінуліся ад бязбожнасьці.
І адкрые Ён вуха іх, каб навучыць іх з дакорам, і будзе гаварыць ім, каб адвярнуліся ад злачыннасці.
Калі паслухаюцца і будуць служыць Яму, дык правядуць дні свае ў дабрадзенстве і гады свае ў радасьці;
Калі паслухаюцца і будуць шанаваць Яго, то пражывуць свае дні ў дабрабыце і свае гады ў шчасці.
калі ж не паслухаюцца, дык загінуць ад стралы і памруць у неразумстве.
А калі не паслухаюцца, то пройдуць праз раку смерці і загінуць у безразважнасці.
А крывадушнікі пестуюць у сэрцы гнеў і не заклікаюць Яго, калі Ён замыкае іх у ковы;
А бязбожнікі складаць будуць гнеў Божы ў сваім сэрцы і не прызавуць Яго, калі будуць скаваныя.
таму і душа іхняя памірае ў маладосьці і жыцьцё іхняе з блуднікамі.
Памрэ ў маладосці дух іх, і жыццё іх — у юнацтве.
Ён ратуе беднага ад бяды ягонай і ва ўціску адчыняе вуха яму.
Ён уратуе беднага ад нястачы яго і адкрые вуха ў бядзе яго.
І цябе вывеў бы Ён зь цясноцьця на прастору, дзе няма сьціску, і тое, што пастаўляецца на стол твой, было б напоўнена тлушчам;
Дык выбавіць Ён цябе з уціску, і будзе прастора, а не цяснота перад табою, і будзе поўнае тлушчу ўсё на стале тваім.
але ты перапоўнены думкамі бязбожных: меркаваньні іх і асуда — блізкія.
Справа твая асуджана, быццам бязбожніка; яны атрымаюць суд і справядлівасць.
Хай не пакарае цябе гнеў Божы караю! Вялікі выкуп ня выратуе цябе.
Сцеражыся, каб не звяло цябе багацце і мноства дароў не скрывіла цябе.
Ці дасьць Ён якую цану твайму багацьцю? Не, — ні золату і ніякаму скарбу.
Ці будзеш ты крычаць і выкарыстоўваць усе намаганні сілы тваёй, пакуль ты не ў цясноце?
Не жадай той ночы, калі народы вынішчаюцца на месцы сваім.
Не чакай прагна той ночы, каб узняўся натоўп дзеля іх.
Сьцеражыся, ня схіляйся да бязбожнасьці, якую ты паставіў над пакутаю.
Сцеражыся, каб не звярнуўся да злачынства, бо праз яго спазнаеш ты гора.
Бог высокі магутнасьцю Сваёю, і хто такі, як Ён, настаўнік?
Вось жа, Бог высокі ў моцы Сваёй, які настаўнік падобны да Яго?
Хто пакажа Яму шлях Ягоны: хто можа сказаць: Ты робіш несправядліва?
Хто зможа прасачыць дарогі Яго, або хто можа Яму сказаць: “Ты ўчыніў несправядлівасць”?
Памятай пра тое, каб узвышаць дзеі Ягоныя, якія людзі бачаць.
Памятай, каб услаўляць справу Яго, пра якую спяваюць мужы.
Усе людзі могуць бачыць іх, чалавек можа бачыць іх здалёк.
Усе людзі бачаць Яго, кожны прыглядаецца здалёк.
Вось, Бог вялікі, і мы ня можам спазнаць Яго; лік гадоў Ягоных недасьледны.
Вось жа, Бог вялікі і пераўзыходзіць веданне наша; лік гадоў Яго невызначальны.
Ён забірае кроплі вады; яны ў мностве выліваюцца дажджом:
Ён збірае кроплі дажджу і вылівае ліўні ракою,
з хмараў капаюць і выліваюцца зьлівай на людзей.
іх праліваюць хмары, скропліваючы многіх людзей.
Хто можа таксама спасьцігнуць прыцягненьне воблакаў, трэск намёта Ягонага?
Хто, сапраўды, можа зразумець разлегласць хмар, грымоты палаткі Яго?
Вось, Ён распасьцірае над ім сьвятло Сваё і пакрывае дно мора.
Вось, Ён расцягнуў вакол Сябе маланкі Свае і накрыў глыбіні мора.
Адтуль Ён судзіць народы, дае багата ежы.
Праз іх Ён судзіць народы і шчодра корміць іх.
Ён трымае ў далонях Сваіх маланку і загадвае ёй, каго біць.
У руках сваіх Ён трымае маланку і загадвае ёй, каб біла.
Трэск яе дае знак пра яе; жывёлы таксама адчуваюць, што адбываецца.
Грукат яе паведамляе аб ёй, палаючы гневам супраць злачыннасці.
