Ёва 36 разьдзел
Кніга Ёва
Пераклад Васіля Сёмухі → Пераклад Антонія Бокуна
І гаварыў далей Эліуй і сказаў:
І працягваў Элігу, і сказаў:
пачакай мяне крыху, і я пакажу табе, што я маю яшчэ што сказаць за Бога.
«Пачакай мяне трохі, і я пакажу табе, што маю яшчэ словы пра Бога.
Пачну мае разважаньні здалёку і аддам справядлівасьць Садзецелю майму,
Пачну здалёк навучаньне маё, і Творцу майму аддам праведнасьць.
бо словы мае сапраўды не мана: перад табою — дасканалы ў пазнаньні.
Бо праўдзівыя і без падману словы мае, і з табою я дасканалы ў веданьні.
Вось, Бог магутны і не пагарджае моцнага сілаю сэрца;
Вось, Бог магутны і не адкідае нікога, Ён магутны моцай сэрца.
Ён не падтрымлівае бязбожных і аддае належнае прыгнечаным;
Ён не дае жыць бязбожніку, але дае суд убогаму.
Ён не адварочвае вачэй Сваіх ад праведнікаў, а з царамі назаўсёды садзіць іх на троне, і яны ўзвышаюцца.
Не адварочвае Ён ад праведных вачэй Сваіх, але саджае іх з валадарамі на пасадзе назаўжды, і яны ўзвышаюцца.
Калі ж яны закаваныя ў ланцугі і трымаюцца ў аковах гароты,
І калі яны закаваныя ў кайданы і зьвязаныя путамі гора,
дык Ён паказвае ім на дзеі іхнія і на беззаконьні іхнія, бо яны памножыліся,
Ён паказвае ім учынкі іхнія і злачынствы іхнія, што яны памножыліся.
і адчыняе ім вуха дзеля настаўленьня на розум і кажа ім, каб яны адхінуліся ад бязбожнасьці.
І Ён адкрывае вуха іхняе, каб навучыць іх, і гаворыць ім, каб адвярнуліся ад ліхоты.
Калі паслухаюцца і будуць служыць Яму, дык правядуць дні свае ў дабрадзенстве і гады свае ў радасьці;
Калі паслухаюцца і будуць служыць Яму, яны пражывуць дні свае ў дабрабыце і гады свае — у прыемнасьці.
калі ж не паслухаюцца, дык загінуць ад стралы і памруць у неразумстве.
А калі не паслухаюцца, тады загінуць ад дзіды і памруць з нястачы веданьня.
А крывадушнікі пестуюць у сэрцы гнеў і не заклікаюць Яго, калі Ён замыкае іх у ковы;
Крывадушнікі складаюць гнеў у сэрцы сваім і ня клічуць [Бога], калі Ён закоўвае іх [у кайданы].
таму і душа іхняя памірае ў маладосьці і жыцьцё іхняе з блуднікамі.
У марнасьці памірае душа іхняя і жыцьцё іхняе між распусьнікамі.
Ён ратуе беднага ад бяды ягонай і ва ўціску адчыняе вуха яму.
Ён ратуе ўбогага з уціску ягонага і адкрывае вуха ягонае ў трывозе.
І цябе вывеў бы Ён зь цясноцьця на прастору, дзе няма сьціску, і тое, што пастаўляецца на стол твой, было б напоўнена тлушчам;
Таксама цябе Ён выбавіць з цясноты на прастору, дзе няма ўціску, і будзе поўнае тлушчу ўсё на стале тваім.
але ты перапоўнены думкамі бязбожных: меркаваньні іх і асуда — блізкія.
Але ты поўны меркаваньняў бязбожных, і чакаюць цябе суд і вырак.
Хай не пакарае цябе гнеў Божы караю! Вялікі выкуп ня выратуе цябе.
Няхай не зьвядзе цябе гнеў, і вялікі выкуп няхай ня скрывіць [шляхоў] тваіх.
Ці дасьць Ён якую цану твайму багацьцю? Не, — ні золату і ніякаму скарбу.
Ці ў няшчасьці крык твой дапаможа або намаганьні сілы тваёй?
Не жадай той ночы, калі народы вынішчаюцца на месцы сваім.
Не жадай тае ночы, калі народы паднімаюцца з месцаў сваіх.
Сьцеражыся, ня схіляйся да бязбожнасьці, якую ты паставіў над пакутаю.
Сьцеражыся, каб не зьвярнуўся да злачынства, бо праз яго ты спазнаеш гора.
Бог высокі магутнасьцю Сваёю, і хто такі, як Ён, настаўнік?
Вось, Бог узьвялічаны ў моцы Сваёй. Які настаўнік падобны да Яго?
Хто пакажа Яму шлях Ягоны: хто можа сказаць: Ты робіш несправядліва?
Хто можа вызначыць шляхі Ягоныя? І хто можа сказаць Яму: “Ты ўчыніў зло”?
Памятай пра тое, каб узвышаць дзеі Ягоныя, якія людзі бачаць.
Памятай, каб услаўляць учынкі Ягоныя, пра якія сьпяваюць людзі.
Усе людзі могуць бачыць іх, чалавек можа бачыць іх здалёк.
Усе людзі бачаць гэта, кожны прыглядаецца здалёк.
Вось, Бог вялікі, і мы ня можам спазнаць Яго; лік гадоў Ягоных недасьледны.
Вось, Бог вялікі і перавышае веданьне нашае; лік гадоў Ягоных — неаблічальны.
Ён забірае кроплі вады; яны ў мностве выліваюцца дажджом:
Ён зьбірае кроплі вады, і падаюць яны дажджом з хмары Ягонай.
з хмараў капаюць і выліваюцца зьлівай на людзей.
Яны цякуць з хмараў і выліваюцца на многіх людзей.
Хто можа таксама спасьцігнуць прыцягненьне воблакаў, трэск намёта Ягонага?
Хто можа разумець разьлегласьць аблокаў і грымоты намёту Ягонага?
Вось, Ён распасьцірае над ім сьвятло Сваё і пакрывае дно мора.
Вось, Ён расьцягнуў вакол Сябе сьвятло Сваё і закрывае глыбіні мора.
Адтуль Ён судзіць народы, дае багата ежы.
Адтуль Ён судзіць народы, і шчодра корміць іх.
Ён трымае ў далонях Сваіх маланку і загадвае ёй, каго біць.
У руках Сваіх Ён трымае маланку і загадвае ёй, куды цэліць.
Трэск яе дае знак пра яе; жывёлы таксама адчуваюць, што адбываецца.
Грукат ейны паведамляе пра яе, нават статкі адчуваюць прыход яе.
