Ёва 36 разьдзел

Кніга Ёва
Пераклад Чарняўскага 2017 → Пераклад Антонія Бокуна

 
 

І ў дадатак Элію вось што сказаў:
 
І працягваў Элігу, і сказаў:

«Пачакай мяне хвілінку, і я пакажу табе: бо я маю яшчэ нешта сказаць пра Бога.
 
«Пачакай мяне трохі, і я пакажу табе, што маю яшчэ словы пра Бога.

Паўтару навуку маю здалёк і Творцу майму аддам справядлівасць.
 
Пачну здалёк навучаньне маё, і Творцу майму аддам праведнасьць.

Бо праўдзівыя і без падману словы мае, і перад табой [я] дасканалы ў веданні.
 
Бо праўдзівыя і без падману словы мае, і з табою я дасканалы ў веданьні.

Не дасць Бог магутны і не адкідае Магутны моцаю сэрца,
 
Вось, Бог магутны і не адкідае нікога, Ён магутны моцай сэрца.

не дасць Ён жыць бязбожніку, але чыніць суд для бедных.
 
Ён не дае жыць бязбожніку, але дае суд убогаму.

Не адверне Ён ад справядлівага вачэй сваіх і цароў на пасадзе размяшчае на векі, і яны ўзвышаюцца.
 
Не адварочвае Ён ад праведных вачэй Сваіх, але саджае іх з валадарамі на пасадзе назаўжды, і яны ўзвышаюцца.

І, калі яны будуць закаваныя ў кайданы і звязаныя путамі бядоты,
 
І калі яны закаваныя ў кайданы і зьвязаныя путамі гора,

Ён пакажа ім справы іх і злачынствы іх, што яны былі гвалтоўныя.
 
Ён паказвае ім учынкі іхнія і злачынствы іхнія, што яны памножыліся.

І адкрые Ён вуха іх, каб навучыць іх з дакорам, і будзе гаварыць ім, каб адвярнуліся ад злачыннасці.
 
І Ён адкрывае вуха іхняе, каб навучыць іх, і гаворыць ім, каб адвярнуліся ад ліхоты.

Калі паслухаюцца і будуць шанаваць Яго, то пражывуць свае дні ў дабрабыце і свае гады ў шчасці.
 
Калі паслухаюцца і будуць служыць Яму, яны пражывуць дні свае ў дабрабыце і гады свае — у прыемнасьці.

А калі не паслухаюцца, то пройдуць праз раку смерці і загінуць у безразважнасці.
 
А калі не паслухаюцца, тады загінуць ад дзіды і памруць з нястачы веданьня.

А бязбожнікі складаць будуць гнеў Божы ў сваім сэрцы і не прызавуць Яго, калі будуць скаваныя.
 
Крывадушнікі складаюць гнеў у сэрцы сваім і ня клічуць [Бога], калі Ён закоўвае іх [у кайданы].

Памрэ ў маладосці дух іх, і жыццё іх — у юнацтве.
 
У марнасьці памірае душа іхняя і жыцьцё іхняе між распусьнікамі.

Ён уратуе беднага ад нястачы яго і адкрые вуха ў бядзе яго.
 
Ён ратуе ўбогага з уціску ягонага і адкрывае вуха ягонае ў трывозе.

Дык выбавіць Ён цябе з уціску, і будзе прастора, а не цяснота перад табою, і будзе поўнае тлушчу ўсё на стале тваім.
 
Таксама цябе Ён выбавіць з цясноты на прастору, дзе няма ўціску, і будзе поўнае тлушчу ўсё на стале тваім.

Справа твая асуджана, быццам бязбожніка; яны атрымаюць суд і справядлівасць.
 
Але ты поўны меркаваньняў бязбожных, і чакаюць цябе суд і вырак.

Сцеражыся, каб не звяло цябе багацце і мноства дароў не скрывіла цябе.
 
Няхай не зьвядзе цябе гнеў, і вялікі выкуп няхай ня скрывіць [шляхоў] тваіх.

Ці будзеш ты крычаць і выкарыстоўваць усе намаганні сілы тваёй, пакуль ты не ў цясноце?
 
Ці ў няшчасьці крык твой дапаможа або намаганьні сілы тваёй?

Не чакай прагна той ночы, каб узняўся натоўп дзеля іх.
 
Не жадай тае ночы, калі народы паднімаюцца з месцаў сваіх.

Сцеражыся, каб не звярнуўся да злачынства, бо праз яго спазнаеш ты гора.
 
Сьцеражыся, каб не зьвярнуўся да злачынства, бо праз яго ты спазнаеш гора.

Вось жа, Бог высокі ў моцы Сваёй, які настаўнік падобны да Яго?
 
Вось, Бог узьвялічаны ў моцы Сваёй. Які настаўнік падобны да Яго?

Хто зможа прасачыць дарогі Яго, або хто можа Яму сказаць: “Ты ўчыніў несправядлівасць”?
 
Хто можа вызначыць шляхі Ягоныя? І хто можа сказаць Яму: “Ты ўчыніў зло”?

Памятай, каб услаўляць справу Яго, пра якую спяваюць мужы.
 
Памятай, каб услаўляць учынкі Ягоныя, пра якія сьпяваюць людзі.

Усе людзі бачаць Яго, кожны прыглядаецца здалёк.
 
Усе людзі бачаць гэта, кожны прыглядаецца здалёк.

Вось жа, Бог вялікі і пераўзыходзіць веданне наша; лік гадоў Яго невызначальны.
 
Вось, Бог вялікі і перавышае веданьне нашае; лік гадоў Ягоных — неаблічальны.

Ён збірае кроплі дажджу і вылівае ліўні ракою,
 
Ён зьбірае кроплі вады, і падаюць яны дажджом з хмары Ягонай.

іх праліваюць хмары, скропліваючы многіх людзей.
 
Яны цякуць з хмараў і выліваюцца на многіх людзей.

Хто, сапраўды, можа зразумець разлегласць хмар, грымоты палаткі Яго?
 
Хто можа разумець разьлегласьць аблокаў і грымоты намёту Ягонага?

Вось, Ён расцягнуў вакол Сябе маланкі Свае і накрыў глыбіні мора.
 
Вось, Ён расьцягнуў вакол Сябе сьвятло Сваё і закрывае глыбіні мора.

Праз іх Ён судзіць народы і шчодра корміць іх.
 
Адтуль Ён судзіць народы, і шчодра корміць іх.

У руках сваіх Ён трымае маланку і загадвае ёй, каб біла.
 
У руках Сваіх Ён трымае маланку і загадвае ёй, куды цэліць.

Грукат яе паведамляе аб ёй, палаючы гневам супраць злачыннасці.
 
Грукат ейны паведамляе пра яе, нават статкі адчуваюць прыход яе.