Ёва 12 разьдзел

Кніга Ёва
Пераклад Чарняўскага 2017 → Пераклад Антонія Бокуна

 
 

І сказаў Ёў у адказ:
 
І адказаў Ёў, і сказаў:

«Сапраўды: вы толькі людзі, і з вамі памрэ мудрасць.
 
«Сапраўды, вы — толькі людзі, і з вамі памрэ мудрасьць вашая.

І ў мяне ёсць сэрца, як і ў вас, і не ніжэйшы я за вас; хто ж не ведае таго, што вы ведаеце?
 
І я маю розум, як вы, і нічым я ад вас ня горшы. І хто ня ведае пра гэта?

Той, хто высмейваецца сваім сябрам, як я, будзе прызываць Бога, і Ён выслухае яго; але будзе высмейвацца беззаганнасць справядлівага.
 
Насьмешкай я стаўся для сяброў маіх, што я клічу Бога, каб Ён выслухаў мяне. Сьмешная праведнасьць нявіннага [чалавека].

Свяцільнік занядбаны ў думках тых, якія жывуць бяспечна, прыгатаваны для тых, хто хістаецца ў хадзе.
 
Пагарджаюць няшчасьцем тыя, што жывуць у супакоі, яны гатовыя папхнуць таго, у каго ногі хістаюцца.

Спакойныя палаткі рабаўнікоў і бяспечныя для тых, што гнявяць Бога, быццам Бог вядзе іх за руку.
 
Спакойныя намёты рабаўнікоў, і бясьпечныя тыя, што гнявяць Бога, іх быццам Бог вядзе за руку.

Аднак жа, запытайся ў жывёлы, і яна навучыць цябе, і птушак паднебных, і яны пакажуць табе.
 
Запытайся жывёлу, і тая навучыць цябе, і птушак нябесных, і яны скажуць табе.

Пагавары з зямлёю, і яна навучыць цябе; і раскажуць рыбы марскія.
 
Запытайся зямлі, і яна патлумачыць табе, і раскажуць табе рыбы марскія.

Хто з іх усіх не ведае, што рука Божая стварыла ўсё гэта?
 
Хто з іх усіх ня ведае, што рука ГОСПАДА ўчыніла ўсё гэта?

У Яго руцэ — душа кожнай жывой істоты і дух усяго цела чалавечага.
 
У руцэ Ягонай душа ўсяго жывога, і дух усякага цела чалавечага Ён трымае.

Ці ж не вуха адрознівае словы, і ці не паднябенне каштуе сваю ежу?
 
Ці ж ня вуха разумее словы, і ці ж не паднябеньне пазнае смак ежы?

У старых ёсць мудрасць, а ў даўгавечных — разважнасць.
 
Старыя маюць мудрасьць, а хто жыве доўга — разуменьне.

У Яго ёсць мудрасць і сіла, Ён мае раду і разуменне.
 
У [Бога] — мудрасьць і сіла, Ён мае раду і разуменьне.

Калі Ён разбурыць, то няма таго, хто адбудуе; калі Ён замкне чалавека, няма таго, хто б адчыніў.
 
Вось, Ён зруйнуе, і ніхто не адбудуе, Ён увязьніць чалавека, і нельга вызваліць.

Калі Ён затрымае воды, яны перасохнуць; і калі выпусціць іх, яны зруйнуюць зямлю.
 
Вось, Ён спыняе воды, і яны высыхаюць, а калі Ён пусьціць іх, яны зямлю спустошаць.

У Яго ёсць сіла і мудрасць, Ён ведае і ашуканца, і таго, каго падманваюць.
 
У Яго — моц і цьвярозы розум, Ён [ведае] падманутага і ашуканца.

Ён выводзіць радцаў пазбаўленымі багацця, а суддзяў — спустошанымі.
 
Ён робіць босымі дарадцаў і ў судзьдзяў адбірае разум.

Ён развязвае пояс цароў і вяроўкай абвязвае іх сцёгны.
 
Ён разьвязвае ярмо валадароў і вяроўкай абвязвае сьцёгны іхнія.

Ён даводзіць святароў да спустошанасці і скідае магнатаў,
 
Ён робіць босымі сьвятароў і магнатаў скідае.

змяняючы вусны праўдзівых і забіраючы вучонасць старых.
 
Ён закрывае вусны верных і старых пазбаўляе разважлівасьці.

Вылівае пагарду на князёў і аслабляе пояс магутных.
 
Ён вылівае пагарду на шляхетных, аслабляе пояс адважных.

Ён выяўляе глыбіннае з цемры і выводзіць да святла цень смерці.
 
Ён выяўляе тое, што схаванае ў цемры, і ўсё цёмнае асьвятляе.

Ён памнажае народы і нішчыць іх, і людзей пашырае і губіць, а знішчаных ізноў аднаўляе.
 
Ён народ узьвялічвае і нішчыць, пашырае народы і губіць.

Ён змяняе ход думак зямных валадароў народа і падманвае іх; і ўчыніць Ён, каб яны блукалі па забытых шляхах.
 
Ён забірае розум у начальнікаў народаў зямлі, і дае ім блукаць па пустых бездарожжах.

Яны будуць хадзіць навобмацак, быццам у цемры, а не ў святле, і ўчыніць Ён, каб яны блукалі, як п’яныя.
 
Яны ходзяць навобмацак у цемры, і сьвятла ня маюць, і хістаюцца яны, як п’яныя.