Ёва 23 разьдзел
Кніга Ёва
Пераклад Чарняўскага 2017 → Пераклад Антонія Бокуна
У адказ Ёў сказаў:
І адказаў Ёў, і сказаў:
«І сёння з горыччу жальба мая, бо рука Яго ўзнеслася цяжарам над стогнам маім.
«І сёньня з горыччу жальба мая, бо рука Ягоная цяжэйшая за стагнаньне маё.
О, каб я спазнаў, дзе знайсці Яго, і каб падышоў да пасада Яго!
О, каб я ведаў, дзе знайсьці Яго, я пайшоў бы да месца жытла Ягонага!
Пакладу я перад Ім суд і напоўню вусны свае нараканнямі,
Я б прынёс перад аблічча Ягонае справу маю і напоўніў бы вусны мае нараканьнямі.
каб ведаў я словы, якімі Ён адкажа мне, і каб зразумеў, што Ён будзе гаварыць мне.
І ведаў бы я словы, якімі Ён адкажа, і зразумеў бы, што Ён будзе казаць мне.
Ці ж з вялікім запалам будзе Ён спрачацца са мною? Не! Ён будзе толькі слухаць!
Ці з вялікім запалам Ён будзе спрачацца са мною? Не! Ён толькі зьверне ўвагу на мяне!
Тады справядлівы будзе судзіцца з Ім, і ад Суддзі свайго пайшоў бы я ў цэласці.
Там справядлівы прадставіць справу сваю перад Ім, і ад Судзьдзі майго выйду я вольным.
Калі пайду я на ўсход — Ён не з’явіцца, і калі пайду на захад — не здагадаюся, дзе Ён.
Але вось, я іду на ўсход, і няма Яго, і іду на захад, і не знаходжу Яго.
Калі далей пайду налева, не знайду Яго; калі павярну направа, не ўбачу Яго.
На поўначы шукаю Яго, і ня бачу, і паварочваю на поўдзень, і не заўважаю.
А Ён ведае дарогу маю, і калі выпрабуе мяне, я выйду [чысты], як золата.
А Ён ведае шлях мой, і няхай выспрабуе мяне, выйду я [чысты], як золата.
Нага мая трымаецца слядоў Яго, я пільную дарогу Яго і не збочваю з яе.
Нага мая трымалася сьлядоў Ягоных, я пільнаваў шляхі Ягоныя і не зыходзіў з іх.
Ад загадаў вуснаў Яго не адступаюся, і ў сэрцы сваім захоўваю словы вуснаў Яго.
Ад загадаў вуснаў Ягоных не адступаюся, і захоўваю словы вуснаў Ягоных як пастанову.
Бо Ён адзіны, і хто адштурхне Яго? І што толькі хоча душа Яго, тое робіць.
Ён адзін [вырашае], і хто заверне Яго? І што захоча душа Ягоная, Ён зробіць.
Калі Ён на мне споўніў волю Сваю, то і іншых падобных рэчаў ёсць у Яго багата.
Бо Ён зробіць, што прызначыў пра мяне, і шмат такога ёсьць у Яго.
Таму я хвалююся ў прысутнасці Яго і, калі гляджу на Яго, ахоплены страхам.
Таму я дрыжу перад абліччам Ягоным, разважаю [пра Яго], і ў страху вялікім перад Ім.
Бог улагодзіў сэрца маё, і Усемагутны ўстрывожыў мяне,
Бог аслабіў сэрца маё, і Усемагутны настрашыў мяне.
бо не загінуў я ад надыходу цемры і змрок не агарнуў аблічча майго.
Бо не ад цемры я гіну, і аблічча маё не пакрытае змрокам.
