Ёва 26 разьдзел

Кніга Ёва
Пераклад Чарняўскага 2017 → Пераклад Антонія Бокуна

 
 

І сказаў у адказ Ёў:
 
І адказаў Ёў, і сказаў:

«Як жа выслухаў ты кволага? І [так] ты падтрымліваеш плячо таго, хто нядужы?
 
«Як ты дапамог кволаму, і як падтрымаў рамяно бясьсільнае!

Якую параду даў ты таму, хто не мае мудрасці? І разважнасць сваю паказаў ты вялікую.
 
Якую ты даў параду нямудраму і выявіў цьвярозы розум для многіх!

Каго ты захацеў павучыць? І чый гэта дух, што выходзіць з цябе?
 
Каго ты навучыў словам сваім, і які дух выходзіць з цябе?

Вось жа цені дрыжаць пад водамі і тыя, што жывуць разам з імі.
 
Рэфаімы дрыжаць пад водамі, і тыя, што жывуць разам з імі.

Пекла аголена перад Ім, і няма ніякай заслоны для Абадону.
 
Адхлань адкрытая перад Ім, і няма заслоны для Абадону.

Ён расцягвае поўнач над пусткаю і павесіў зямлю на нічым.
 
Ён расьцягнуў поўнач над пусткаю і павесіў зямлю на нічым.

Ён закрывае воды ў хмарах Сваіх, каб не зліваліся яны адначасна на зямлю.
 
Ён укладае воды ў аблокі Свае, і хмары ня рвуцца ад іх [цяжару].

Ён закрывае выгляд пасада Свайго, расцягваючы над ім хмару Сваю.
 
Ён закрывае поўню месяца і расьцягнуў над ім хмару Сваю.

Ён акрэсліў наўкола мяжу водам, аж пакуль скончацца святло і цемра.
 
Ён пазначыў мяжу на абліччы вады, аж да мяжы між сьвятлом і цемраю.

Слупы нябесныя дрыжаць і баяцца гневу Яго.
 
Слупы нябесныя дрыжаць і баяцца гневу Ягонага.

Магутнасцю Сваёю Ён прыстрашыў мора і мудрасцю Сваёй перамог Рагаба.
 
Магутнасьцю Сваёю Ён супакойвае мора, і мудрасьцю Сваёй Ён зьнішчыў Рагава.

Дух Яго распагодзіў нябёсы, і рука Яго знішчыла ўцякаючага скарпіёна.
 
Дух Ягоны распагоджвае неба, і рука Ягоная нішчыць зьмея, які ўцякае.

Вось такія межы шляхоў Яго; і, паколькі мы чулі хіба што малую кроплю слоў Яго, то хто змог бы адчуваць грымоты велічы Яго?»
 
Вось такія канцы шляхоў Ягоных; і толькі слабыя словы мы чуем пра Яго. Хто можа зразумець грымоты велічы Ягонай?»