3 Яна 1 разьдзел

 

 

Старэйшы — дарагому Гаю, якога я люблю ў праўдзе.

 

Староста — улюбёнаму Гаю, якога я люблю ў праўдзе.

Улюбёны, малюся, каб ты быў спраўны і здаровы так, як спраўная душа твая.

 

Улюбёны! Малюся, каб ты быў здаровы і пасьпяховы ў-ва ўсім, як пасьпяховая душа твая.

Вельмі ўзрадаваўся я з прыбыцця братоў, якія засведчылі праўду тваю ды як ты жывеш у праўдзе.

 

Бо я вельмі ўзрадаваўся, калі прыйшлі браты і засьведчылі пра тваю праўду, як ты ходзіш у праўдзе.

Для мяне няма большай радасці, як пачуць, што дзеці мае жывуць у праўдзе.

 

Для мяне няма большай радасьці, як чуць, што дзеці мае ходзяць у праўдзе.

Улюбёны, верна робіш, калі рупішся дзеля братоў і дзеля падарожных,

 

Улюбёны! Ты робіш вернае ў тым, што робіш для братоў і для чужынцаў,

якія аддалі сведчанне тваёй любові перад царквою. Ты добра зробіш, калі выправіш іх у дарогу, як годна перад Богам.

 

якія засьведчылі перад царквою пра тваю любоў. Ты добра зробіш, правёўшы іх, як належыцца перад Богам,

Бо выправіліся яны ў дарогу ў імя [Яго], не прымаючы нічога ад паганаў.

 

бо яны дзеля імя Ягонага пайшлі, нічога ня ўзяўшы ад паганаў.

Таму мусім гасцінна прымаць такіх, каб быць саўдзельнікамі праўды.

 

А мы павінны прыймаць гэтакіх, каб стацца супрацоўнікамі праўдзе.

Я напісаў для царквы, але той, які хоча мець першынство сярод іх, Дыятрэф, не прызнае нас.

 

Я пісаў царкве, але Дыятрэф, які любіць у іх быць першым, не прызнае нас.

Таму вось, калі прыбуду, нагадаю пра яго ўчынкі, што ён робіць, плявузгаючы на нас ліхімі словамі; і быццам яму яшчэ гэтага не хапае, сам не прымае братоў і тым, якія прымаюць, перашкаджае і выганяе з царквы.

 

Дзеля гэтага, калі я прыйду, нагадаю пра ўчынкі ягоныя, якія ён робіць, абмаўляючы нас злымі словамі; і не задавольваючыся гэтым, і сам не прызнае братоў, і тым, якія хочуць, забараняе, і выганяе з царквы.

Улюбёны, не наследуй ліхому, але таму, што добрае. Хто добрае робіць, ёсць ад Бога, а хто робіць благое, той не бачыў Бога.

 

Улюбёны! Не пераймай ліхое, але добрае. Хто робіць дабро, той ад Бога; а хто робіць ліхое, ня бачыў Бога.

Пра Дэметра ўсе добра сведчаць, і нават сама праўда; і мы таксама сведчым, і ты ведаеш, што сведчанне наша праўдзівае.

 

Пра Дэмэтрыя засьведчана ўсімі і самой праўдаю, і мы сьведчым, і вы ведаеце, што сьведчаньне нашае праўдзівае.

Шмат я меў напісаць, але не хачу пісаць табе чарнілам і пяром;

 

Шмат меў я пісаць, але не хачу пісаць табе атрамантам і трысьцінай,

спадзяюся, што хутка цябе ўбачу і тады пагаворым з вуснаў у вусны.

 

а спадзяюся неўзабаве пабачыць цябе і гаварыць вуснамі ў вусны.

Супакой табе. Вітаюць цябе сябры. Прывітай сяброў пайменна. Амін.

 

Супакой табе! Вітаюць цябе сябры; прывітай сяброў паіменна.