3 Яна 1 разьдзел

Трэйцяе пасланьне Яна
Пераклад Чарняўскага 2017 → Пераклад Рыма-Каталіцкага Касцёла

 
 

Старэйшы — дарагому Гаю, якога я люблю ў праўдзе.
 
Старэйшына — умілаванаму Гаю, якога я люблю ў праўдзе.

Улюбёны, малюся, каб ты быў спраўны і здаровы так, як спраўная душа твая.
 
Умілаваны, малюся, каб ты быў здаровы і каб ва ўсім шчасціла табе, як шчасціць тваёй душы.

Вельмі ўзрадаваўся я з прыбыцця братоў, якія засведчылі праўду тваю ды як ты жывеш у праўдзе.
 
Я вельмі ўзрадаваўся, калі прыйшлі браты і засведчылі пра тваю праўду і што ты паступаеш па праўдзе.

Для мяне няма большай радасці, як пачуць, што дзеці мае жывуць у праўдзе.
 
Для мяне няма большай радасці, як чуць, што мае дзеці жывуць у праўдзе.

Улюбёны, верна робіш, калі рупішся дзеля братоў і дзеля падарожных,
 
Умілаваны, ты паступаеш згодна з вераю ў тым, што робіш для братоў і чужаземцаў.

якія аддалі сведчанне тваёй любові перад царквою. Ты добра зробіш, калі выправіш іх у дарогу, як годна перад Богам.
 
Яны засведчылі перад Касцёлам пра тваю любоў. Калі адправіш іх па-Божаму, добра зробіш.

Бо выправіліся яны ў дарогу ў імя [Яго], не прымаючы нічога ад паганаў.
 
Бо дзеля імя Хрыстовага яны пайшлі, нічога не беручы ад язычнікаў.

Таму мусім гасцінна прымаць такіх, каб быць саўдзельнікамі праўды.
 
Таму мы павінны прымаць такіх людзей, каб стаць супрацоўнікамі праўды.

Я напісаў для царквы, але той, які хоча мець першынство сярод іх, Дыятрэф, не прызнае нас.
 
Я напісаў ужо Касцёлу, але Дыятрэф, што любіць першынство сярод іх, не прымае нас.

Таму вось, калі прыбуду, нагадаю пра яго ўчынкі, што ён робіць, плявузгаючы на нас ліхімі словамі; і быццам яму яшчэ гэтага не хапае, сам не прымае братоў і тым, якія прымаюць, перашкаджае і выганяе з царквы.
 
Таму, калі прыйду, узгадаю яго ўчынкі, якія робіць, зласловячы нас. Не задавольваючыся гэтым, і сам не прымае братоў, і забараняе тым, хто хоча прымаць, ды выганяе іх з Касцёла.

Улюбёны, не наследуй ліхому, але таму, што добрае. Хто добрае робіць, ёсць ад Бога, а хто робіць благое, той не бачыў Бога.
 
Умілаваны, не наследуй зло, але дабро. Хто чыніць дабро, той ад Бога, а хто чыніць зло, той не бачыў Бога.

Пра Дэметра ўсе добра сведчаць, і нават сама праўда; і мы таксама сведчым, і ты ведаеш, што сведчанне наша праўдзівае.
 
Пра Дэметрыя ўсе сведчаць, нават сама праўда. І мы сведчым, а ты ведаеш, што сведчанне нашае праўдзівае.

Шмат я меў напісаць, але не хачу пісаць табе чарнілам і пяром;
 
Пра многае меў напісаць табе, але не хацеў пісаць атрамантам і пяром,

спадзяюся, што хутка цябе ўбачу і тады пагаворым з вуснаў у вусны.
 
бо спадзяюся хутка ўбачыць цябе і паразмаўляць з табою.

Супакой табе. Вітаюць цябе сябры. Прывітай сяброў пайменна. Амін.
 
Спакой табе. Вітаюць цябе сябры. І ты прывітай сяброў пайменна.