3 Яна 1 разьдзел

 

 

Староста — улюбёнаму Гаю, якога я люблю ў праўдзе.

 

Старэйшына — умілаванаму Гаю, якога я люблю ў праўдзе.

Улюбёны! Малюся, каб ты быў здаровы і пасьпяховы ў-ва ўсім, як пасьпяховая душа твая.

 

Умілаваны, малюся, каб ты быў здаровы і каб ва ўсім шчасціла табе, як шчасціць тваёй душы.

Бо я вельмі ўзрадаваўся, калі прыйшлі браты і засьведчылі пра тваю праўду, як ты ходзіш у праўдзе.

 

Я вельмі ўзрадаваўся, калі прыйшлі браты і засведчылі пра тваю праўду і што ты паступаеш па праўдзе.

Для мяне няма большай радасьці, як чуць, што дзеці мае ходзяць у праўдзе.

 

Для мяне няма большай радасці, як чуць, што мае дзеці жывуць у праўдзе.

Улюбёны! Ты робіш вернае ў тым, што робіш для братоў і для чужынцаў,

 

Умілаваны, ты паступаеш згодна з вераю ў тым, што робіш для братоў і чужаземцаў.

якія засьведчылі перад царквою пра тваю любоў. Ты добра зробіш, правёўшы іх, як належыцца перад Богам,

 

Яны засведчылі перад Касцёлам пра тваю любоў. Калі адправіш іх па-Божаму, добра зробіш.

бо яны дзеля імя Ягонага пайшлі, нічога ня ўзяўшы ад паганаў.

 

Бо дзеля імя Хрыстовага яны пайшлі, нічога не беручы ад язычнікаў.

А мы павінны прыймаць гэтакіх, каб стацца супрацоўнікамі праўдзе.

 

Таму мы павінны прымаць такіх людзей, каб стаць супрацоўнікамі праўды.

Я пісаў царкве, але Дыятрэф, які любіць у іх быць першым, не прызнае нас.

 

Я напісаў ужо Касцёлу, але Дыятрэф, што любіць першынство сярод іх, не прымае нас.

Дзеля гэтага, калі я прыйду, нагадаю пра ўчынкі ягоныя, якія ён робіць, абмаўляючы нас злымі словамі; і не задавольваючыся гэтым, і сам не прызнае братоў, і тым, якія хочуць, забараняе, і выганяе з царквы.

 

Таму, калі прыйду, узгадаю яго ўчынкі, якія робіць, зласловячы нас. Не задавольваючыся гэтым, і сам не прымае братоў, і забараняе тым, хто хоча прымаць, ды выганяе іх з Касцёла.

Улюбёны! Не пераймай ліхое, але добрае. Хто робіць дабро, той ад Бога; а хто робіць ліхое, ня бачыў Бога.

 

Умілаваны, не наследуй зло, але дабро. Хто чыніць дабро, той ад Бога, а хто чыніць зло, той не бачыў Бога.

Пра Дэмэтрыя засьведчана ўсімі і самой праўдаю, і мы сьведчым, і вы ведаеце, што сьведчаньне нашае праўдзівае.

 

Пра Дэметрыя ўсе сведчаць, нават сама праўда. І мы сведчым, а ты ведаеш, што сведчанне нашае праўдзівае.

Шмат меў я пісаць, але не хачу пісаць табе атрамантам і трысьцінай,

 

Пра многае меў напісаць табе, але не хацеў пісаць атрамантам і пяром,

а спадзяюся неўзабаве пабачыць цябе і гаварыць вуснамі ў вусны.

 

бо спадзяюся хутка ўбачыць цябе і паразмаўляць з табою.

Супакой табе! Вітаюць цябе сябры; прывітай сяброў паіменна.

 

Спакой табе. Вітаюць цябе сябры. І ты прывітай сяброў пайменна.