Ёва 26 разьдзел

Кніга Ёва
Пераклад Чарняўскага 2017 → Пераклад Яна Станкевіча

 
 

І сказаў у адказ Ёў:
 
І адказаў Ёў, і сказаў:

«Як жа выслухаў ты кволага? І [так] ты падтрымліваеш плячо таго, хто нядужы?
 
«Як ты памог нясілу, як выбавіў плячо нямоцнага!

Якую параду даў ты таму, хто не мае мудрасці? І разважнасць сваю паказаў ты вялікую.
 
Як ты парадзіў нямудраму і мудрых падумкаў шмат азнайміў!

Каго ты захацеў павучыць? І чый гэта дух, што выходзіць з цябе?
 
Каму ты азнайміў гэтыя словы, і чый дых выходзіў зь Цябе?

Вось жа цені дрыжаць пад водамі і тыя, што жывуць разам з імі.
 
Рэфаімы дрыжаць пад водамі і жывучыя ў іх.

Пекла аголена перад Ім, і няма ніякай заслоны для Абадону.
 
Аголены шэоль перад Ім, і ня мае закрыцьця загуба.

Ён расцягвае поўнач над пусткаю і павесіў зямлю на нічым.
 
Ён расьцягнуў поўнач над пусьцінёю, павесіў зямлю на нічым.

Ён закрывае воды ў хмарах Сваіх, каб не зліваліся яны адначасна на зямлю.
 
Ён зьвязуе воды ў булакох Сваіх, і булак ня ськепіцца пад імі.

Ён закрывае выгляд пасада Свайго, расцягваючы над ім хмару Сваю.
 
Ён дзяржыць відзеньне пасаду, расьцягнуў над ім булак Свой.

Ён акрэсліў наўкола мяжу водам, аж пакуль скончацца святло і цемра.
 
Рысу правёў над зьверхам вады аж да граніцаў сьвятла зь цемняю.

Слупы нябесныя дрыжаць і баяцца гневу Яго.
 
Стаўпы нябёс дрыжаць а жахаюцца ад вайцяньня Ягонага.

Магутнасцю Сваёю Ён прыстрашыў мора і мудрасцю Сваёй перамог Рагаба.
 
Сілаю Сваёй сьцішыў мора і розумам Сваім паразіў Рагаба.

Дух Яго распагодзіў нябёсы, і рука Яго знішчыла ўцякаючага скарпіёна.
 
Ветрам Ягоным нябёсы прыбраны; рука Ягоная схармавала ўцякаючага гада.

Вось такія межы шляхоў Яго; і, паколькі мы чулі хіба што малую кроплю слоў Яго, то хто змог бы адчуваць грымоты велічы Яго?»
 
Вось, гэта часьці дарогаў Ягоных; і як мала мы чулі празь Яго! А гром магутнасьці Ягонае хто можа ўцяміць?»