Ёва 33 разьдзел

Кніга Ёва
Пераклад Чарняўскага 2017 → Пераклад Яна Станкевіча

 
 

Дык пачуй, Ёве, прамову маю і выслухай усе словы мае.
 
Слухай, адылі, калі ласка, Ёве, мову маю і на ўсю гутарку маю ўважай.

Вось, я адкрыў вусны свае, і язык мой гаворыць у горле маім.
 
Вось жа, я адчыніў вусны свае; язык мой гукае ў паднябеньню маім.

Ад шчырага сэрца мае словы, і чыстую праўду кажуць вусны мае.
 
Словы мае ад шчырасьці сэрца майго, і веданьне вусны мае ясна вымаўляюць.

Дух Божы ўчыніў мяне, і подых Усемагутнага ажывіў мяне.
 
Дух Божы ўчыніў мяне, і дых Усемагучага ажывіў мяне.

Калі можаш, адкажы мне, падрыхтуйся перада мною і падыміся.
 
Калі можаш, адказуй імне, прыгатуйся перад імною і стань.

Вось жа, я, як і ты, перад Богам, ды з таго ж самага бруду аддзелены і я.
 
Вось я, бы вусны твае перад Богам; з гліны ўхармаваны я.

Так што страх, які я наганяю, хай цябе не палохае, і цяжар мой хай не будзе цяжкі для цябе.
 
Вось, страх мой хай не палохае цябе, даланя мая на табе хай ня будзе цяжкая.

Тое, што ты сказаў, было ў вушах маіх, і голас слоў тваіх пачуў я:
 
Але, ты гукаў у вушы мае, і голас словаў тваіх я чуў.

“Чысты я, без граху, беззаганны; і няма правіннасці ўва мне.
 
Ты кажаш: "Я чысты, бяз выступу, нявінны я, і няма бяспраўя ў імне.

Паколькі ж Ён знайшоў падставы для скаргаў на мяне, то лічыць мяне Сваім ворагам;
 
Вось, Ён знаходзе прычыны непрыязьньства да мяне, Ён мае мяне за непрыяцеля Свайго.

ногі мае закаваў у кайданы, пільнуе ўсе шляхі мае”.
 
Пастанавіў у калодкі ногі мае, цікуе на ўсі сьцежкі мае".

Вось, ты ў гэтым несправядлівы, адкажу табе, бо Бог большы за чалавека.
 
Во ў гэтым не твая праўда, я адказую табе, бо Бог большы за людзіну.

Чаму ты спрачаешся з Ім, што Ён не адказвае табе на ўсе словы?
 
Чаму ты сьперачаешся зь Ім, што Ён не здаець табе лічбы з усіх справаў Сваіх?

Раз кажа Бог і другі раз таго самага не паўтарае.
 
Бо Бог гукае адным парадкам і другім, ня цяміцца гэта:

Праз сон і ў бачанні начным, калі агортвае сон людзей і калі дрэмлюць яны на ложку,
 
У сьне, у ночнай відзені, як нападае глыбокі сон на людзёў, як яны дрэмяць на ложках, —

тады адкрывае Ён вушы людзям і ўкладвае Сваё настаўленне,
 
Тады Ён адкрывае вушы людзкія і пячатавае навуку, даную ім,

каб адвярнуць чалавека ад таго, што ён чыніць, і вызваліць яго ад пыхлівасці,
 
Каб адвярнуць чалавека ад учынку, і гордасьць ад чалавека Ён хавае,

вырываючы душу яго ад магілы і жыццё яго, каб не трапіў ён у яму смерці.
 
Ён узьдзержуе душу ягоную ад загубы й жыцьцё ягонае ад зьнішчэньня мячом.

Дакарае яго таксама хваробаю на ложку яго, або болем безупынным у касцях яго.
 
І навучае болям на ягоным ложку і болям у ягоных касьцёх, —

І хлеб агідным становіцца яму ў жыцці яго, і раней прыемная страва — душы яго.
 
І жыцьцё ягонае збрыдзе хлеб, і душа ягоная ласую ежу.

Цела яго высыхае на вачах, і косці, якіх не было відаць, адкрываюцца.
 
Чэзьне цела ягонае, ажно яго ня відаць, і адкрываюцца косьці ягоныя, каторыя ня былі відаць.

Набліжаецца Ён да знішчэння ў магіле, і жыццё яго — да сядзібы памерлых.
 
І бліжыцца да ямы душа ягоная, і жыцьцё ягонае — да забіўцаў.

Калі будзе ў яго анёл-звястун, адзін з тысячы, каб абвясціць чалавеку справядлівасць,
 
Калі будзе ў яго Ангіл-прычынца, адзін із тысяча, азнайміць людзіне пасьцівасьць ейную;

то злітуецца Бог над ім і скажа: “Вызвалі яго, каб не ішоў ён у магілу, бо Я знайшоў тое, у чым яму можа быць літасць”.
 
І ён міласэрны да яго, і скажа: "Вывальні яго ад зыходу да долу; Я знайшоў выкуп".

Расквітнее цела яго лепш, чым у маладосці, і вернецца ён у дні юнацтва свайго.
 
Сьвежшае за дзяцюцкае стане цела ягонае, ён зьвернецца да дзён маладосьці свае.

Ён будзе маліць Бога, і Бог будзе спагадны да яго, і ўбачыць твар яго радасным, і верне чалавеку яго справядлівасць.
 
Моле Бога, і Ён прыйме яго, і Ён абача від ягоны з гуканьням, Ён зьверне людзіне справядлівасьць яе.

Спявае ён людзям і кажа: “Я зграшыў і парушыў справядлівасць, але я не адплачана мне.
 
І ён будзе глядзець на людзёў, і скажа: "Ізграшыў я, і скрывіў простае, і бескарысна было імне".

Ён вызваліў душу маю, каб не трапіла ў магілу, але, жывучы, бачыла святло”.
 
Ён вывальне душу ягоную ад зыходу да долу, і жыцьцё ягонае будзе аглядаць сьвятліню.

Вось, усё гэта робіць Бог два і тры разы з чалавекам,
 
Вось, усе гэта робе Бог разы два, тры з мужчынам.

каб адвесці душы іх ад магілы і прасвятліць святлом жывых.
 
Каб адвярнуць душу ягоную ад долу, каб ён сьвяціў у сьвятліні жыцьця.

Зважай, Ёве, і паслухай мяне, і памаўчы, пакуль я гавару.
 
Уважай, Ёве, слухай мяне, маўчы, і я буду гукаць.

Калі ж маеш, што сказаць, адкажы мне, гавары, бо хачу, каб ты аказаўся справядлівым.
 
Калі маеш што сказаць, адказаць імне, кажы, бо я зычу апраўленьня твайго.

Калі ж не маеш, то паслухай мяне; маўчы, і я навучу цябе мудрасці».
 
Калі не; ты слухай мяне, маўчы, а я наўчу цябя мудрасьці».