Ёва 8 разьдзел

Кніга Ёва
Пераклад Чарняўскага 2017 → Пераклад Яна Станкевіча

 
 

У адказ Балдад Сугіт сказаў:
 
І адказаў Вілдад Шугянін, і сказаў:

«Як доўга ты будзеш так гаварыць? А словы вуснаў тваіх — вецер навальнічны!
 
«Пакуль ты будзеш гукаць гэтак? і вялікі вецер словы вуснаў тваіх!

Ці ж Бог скажае прысуд або Усемагутны перакручвае тое, што справядліва?
 
Нягож Бог перакручуе суд, і Ўсемагучы перакручуе справядлівасьць?

І, калі сыны твае зграшылі супраць Яго і пакінуў Ён іх у руцэ правіннасці іх,
 
Калі сынове твае ізграшылі перад Ім, то Ён і аддаў іх у рукі бяспраўя іхнага.

ты, калі на світанні ўздымешся да Бога і будзеш маліцца Усемагутнаму,
 
Калі ты глядзіш золкам Бога й моліш Усемагучага,

калі падыдзеш [да Яго] чысты і справядлівы, зараз устане Ён да цябе і дасць супакойнае жытло справядлівасці тваёй;
 
І калі ты чысты а пасьцівы, тады Ён прачхнецца дзеля цябе і надгародзе цябе справядліваю сялібаю;

настолькі, што, калі пачаткі твае былі малыя, то рэшткі твае памножацца значна.
 
І калі спачатку было ў цябе мала, то пасьлей будзе вельмі шмат.

Спытай у даўнейшага пакалення і спасцігні глыбока ўспаміны бацькоў.
 
Бо папытайся, калі ласка, у мінулых пакаленьняў і прыгатуйся да скуманьня сваіх айцоў;

Мы — учарашнія і нічога не ведаем, бо дні нашыя на зямлі, быццам цень.
 
А мы ўчорашнія, і нічога ня ведаем, бо сьцень дні нашыя на зямлі.

Хіба ж яны не навучаць цябе, не пагавораць з табою і ад шчырага сэрца не прамовяць слова?
 
Ці яны не навучаць цябе, скажуць табе і ад сэрца свайго выкажуць словы.

Ці ж можа зелянець трыснёг без вільгаці або чарот расці без вады?
 
Ці падыймаецца папірус без балота? ці расьцець трысьнік без вады?

Нават калі ён у квецені і не вырываецца рукою, то засыхае раней за ўсе травы.
 
Не зразаны ў квеце, уперад за ўсялякае зяленіва, вяне.

Такія дарогі ўсіх, што забываюцца пра Бога, і надзея бязбожнага загіне.
 
Гэткія сьцежкі ўсіх забываючых Бога; і надзея падлыжніка загіне;

Спадзяванне яго — тонкая нітка, а надзея яго — быццам павуцінне.
 
Спадзева падцята, і пэўнасьць яго — дом павукоў.

Абапрэцца ён на дом свой, але той не ўстаіць, падапрэ яго, але ён не ўздымецца.
 
Абапрэцца аб дом свой, і ня ўстое; схопіцца за яго, і ня ўдзержыцца,

Здаецца ён вільготным да таго, як узыдзе сонца, і ў садзе яго праб’ецца парастак яго;
 
Вагкі ён на сонцу, за сад выцягнецца гольле ягонае;

на кучы камянёў скопяцца карані яго, і застанецца жыць ён сярод камянёў.
 
У крушню ўплятаецца карэньне ягонае, каменны дом аглядае.

Калі выкараняць яго з месца яго, яно адмовіцца ад яго і скажа: “Не ведаю цябе”.
 
Але калі выкараняць яго зь месца ягонага, яно адмовіцца ад яго: "Я ня бачыла цябе!"

Гэта вось радасць дарогі яго, каб ізноў з зямлі вырасталі іншыя.
 
Вось гэта радасьць дарогі ягонае! а ізь зямлі растуць іншыя.

Бог не адкіне шчырага і не падасць рукі ліхадзеям,
 
Бач, Бог ня брыдзіцца беззаганным і не паддзержуе рукі ліхадзеяў.

яшчэ напоўняцца вусны твае смехам і рот твой — радасным ускліканнем.
 
Ён яшчэ напоўне сьмехам рот твой і вусны твае радасным гуканьням.

Тыя, што ненавідзяць цябе, агорнуцца сорамам, і не выстаіць палатка бязбожных».
 
Ненавідзячыя цябе апрануцца ў сорам, і будану нягодных ня будзе».