Ёва 27 разьдзел

Кніга Ёва
Пераклад Чарняўскага 2017 → Пераклад Яна Станкевіча

 
 

І дадаў Ёў, прцягваючы прыпавесць сваю, і сказаў:
 
І ўзноў рабіў Ёў свае адумысловае прыраўнаньне, і сказаў:

«Жыве Бог, Які пазбавіў мяне суда, і Усемагутны, Які прывёў да горычы душу маю,
 
«Жыў Бог, што адвярнуў суд мой, і Ўсемагучы, што зьнемарасьціў душу маю,

бо, пакуль яшчэ трывае дыханне ўва мне і [пакуль] Дух Божы — у ноздрах маіх,
 
Што, пакуль яшчэ дых мой у імне, і дух Божы ў ноздрах маіх,

не скажуць вусны мае несправядлівасці і язык мой не будзе гаварыць хлусні!
 
Ня будуць гукаць вусны мае несправядлівасьці, і язык мой ня выдумае маны!

Барані, Божа, каб я лічыў вас справядлівымі; пакуль не памру, не адступлюся ад сваёй невінаватасці.
 
Далёка я ад тога, каб прызнаць вас за справядлівых; пакуль не сканаю, не адракуся ад беззаганнасьці свае.

Апраўдання свайго, якога пачаў я трымацца, не адкіну, не асуджае мяне сэрца маё за цэлае жыццё маё.
 
Моцна дзяржаў я справядлівасьць сваю і ня скволю яе; ня ўпікнець імне сэрца мае ўсі дні мае.

Непрыяцель мой хай будзе, як бязбожнік, і праціўнік мой — як злачынца.
 
Хай непрыяцель мой будзе, як нягоднік, і паўстаючы на мяне, як несправядлівы;

Якая ж надзея бязбожніка, калі сцінае, калі забірае Бог душу яго?
 
Бо што за надзея падлыжніку, як будзе ён адцяты, як Бог возьме душу ягоную?

Ці выслухае Бог крык яго, калі прыйдзе да яго бяда?
 
Ці галашэньне ягонае пачуе Бог, як прыйдзе на яго бяда?

Ці зможа ён цешыцца Усемагутным і прызываць Бога ўвесь час?
 
Ці будзе мець пацеху ў Усемагучым? ці будзе гукаць Бога ў кажным часе?

Я апавяшчу вам пра руку Божую, нічога не буду ўтойваць з таго, што мае Усемагутны.
 
Наўчу вас, што ў руццэ Божай; што ў Усемагучага, не схаваю.

Вось жа, вы ўсё гэта бачылі, дык нашто пустая гаворка без прычыны?
 
Вось, усі вы сузіралі самы; дык нашто вам марнасьцяй марнавацца?

Такая вось доля грэшнага чалавека ў Бога і спадчына крыўдзіцеляў, якую атрымаюць ад Усемагутнага.
 
Гэта дзель нягодніку ад БОГА, і спадак, што ўцісканьнікі ад Усемагучага возьмуць.

Калі размножацца сыны яго, пад мечам будуць, і нашчадкі яго не насыцяцца хлебам.
 
Калі памножацца сыны ягоныя, то пад меч; і патомкі ягоныя не насыцяцца хлебам.

Тыя, што застануцца ад яго, будуць пахаваныя ў згубе, і ўдовы яго не будуць плакаць.
 
Засталых па ім сьмерць зьвядзець да гробу, і ўдовы іх ня будуць плакаць.

Калі наносіць ён срэбра, як пяску, і нарыхтуе адзення, як гліны,
 
Хоць ён назьбірае срэбра, як пылу, і на спраўляе адзецьця, як гліны;

ён, сапраўды, прыгатуе, але апранецца ў іх справядлівы, і срэбра падзеліць бязгрэшны.
 
Дык ён наспраўляе, але адзявацца будзе справядлівы, і срэбра падзеле нявінны.

Пабудаваў ён, як павук, дом сабе і, як вартаўнік, зрабіў сабе шалаш.
 
Як павучыньне, дом, што ён станове, як буда, якую вартаўнік робе.

Багаты, калі засне, нічога з сабой не забярэ; расплюшчыць ён вочы свае і нічога не знойдзе.
 
Кладзецца спаць багатыром, а гэткім ня ўстане; адчыне вочы, і ён ужо ня тый.

Ахопіць яго нястача, як вада, ноччу прыцісне яго навальніца.
 
Як воды, стрэнуць яго жахі; ночы ўхопе яго віхор.

Падхопіць яго вецер гарачы і панясе, ды, быццам віхура, сарве яго з месца яго.
 
Падыйме яго вецер усходні, і ён пойдзе, і зь месца ягонага абура яго.

Ён нашле ўсё гэта на яго і не пашкадуе; і будзе ўцякаць, каб уцячы з рукі Яго.
 
Пусьце на яго, і не пажалее; ад рукі Ягонае ён уцякае стрым галаву.

Будзе пляскаць над ім Сваімі рукамі і асвішча яго са Свайго месца.
 
Плясьне сваімі рукамі па ім, і засьвішча па ім зь месца свайго!